{"collection":"Bible & Christianity","html_url":"https://unchartedknowledge.5gfusion.net/browse/bib/vul/sa1014.htm","path":"bib/vul/sa1014.htm","source_url":"https://sacred-texts.com/bib/vul/sa1014.htm","text":"1 Et accidit quadam die ut diceret Jonathas filius Saul ad adolescentem armigerum suum: Veni, et transeamus ad stationem Philisthinorum, qu\u00e6 est trans locum illum. Patri autem suo hoc ipsum non indicavit.\n2 Porro Saul morabatur in extrema parte Gabaa sub malogranato, qu\u00e6 erat in Magron: et erat populus cum eo quasi sexcentorum virorum.\n3 Et Achias filius Achitob fratris Ichabod filii Phinees, qui ortus fuerat ex Heli sacerdote Domini in Silo, portabat ephod. Sed et populus ignorabat quo isset Jonathas.\n4 Erant autem inter ascensus per quos nitebatur Jonathas transire ad stationem Philisthinorum, eminentes petr\u00e6 ex utraque parte, et quasi in modum dentium scopuli hinc et inde pr\u00e6rupti: nomen uni Boses, et nomen alteri Sene:\n5 unus scopulus prominens ad aquilonem ex adverso Machmas, et alter ad meridiem contra Gabaa.\n6 Dixit autem Jonathas ad adolescentem armigerum suum: Veni, transeamus ad stationem incircumcisorum horum, si forte faciat Dominus pro nobis: quia non est Domino difficile salvare, vel in multis, vel in paucis.\n7 Dixitque ei armiger suus: Fac omnia qu\u00e6 placent animo tuo: perge quo cupis, et ero tecum ubicumque volueris.\n8 Et ait Jonathas: Ecce nos transimus ad viros istos. Cumque apparuerimus eis,\n9 si taliter locuti fuerint ad nos: Manete donec veniamus ad vos: stemus in loco nostro, nec ascendamus ad eos.\n10 Si autem dixerint: Ascendite ad nos: ascendamus, quia tradidit eos Dominus in manibus nostris: hoc erit nobis signum.\n11 Apparuit igitur uterque stationi Philisthinorum: dixeruntque Philisthiim: En Hebr\u00e6i egrediuntur de cavernis in quibus absconditi fuerant.\n12 Et locuti sunt viri de statione ad Jonathan et ad armigerum ejus, dixeruntque: Ascendite ad nos, et ostendemus vobis rem. Et ait Jonathas ad armigerum suum: Ascendamus: sequere me: tradidit enim Dominus eos in manus Isra\u00ebl.\n13 Ascendit autem Jonathas manibus et pedibus reptans, et armiger ejus post eum. Itaque alii cadebant ante Jonathan, alios armiger ejus interficiebat sequens eum.\n14 Et facta est plaga prima qua percussit Jonathas et armiger ejus, quasi viginti virorum in media parte jugeri quam par boum in die arare consuevit.\n15 Et factum est miraculum in castris per agros: sed et omnis populus stationis eorum qui ierant ad pr\u00e6dandum, obstupuit, et conturbata est terra: et accidit quasi miraculum a Deo.\n16 Et respexerunt speculatores Saul qui erant in Gabaa Benjamin, et ecce multitudo prostrata, et huc illucque diffugiens.\n17 Et ait Saul populo qui erat cum eo: Requirite, et videte quis abierit ex nobis. Cumque requisissent, repertum est non adesse Jonathan et armigerum ejus.\n18 Et ait Saul ad Achiam: Applica arcam Dei. (Erat enim ibi arca Dei in die illa cum filiis Isra\u00ebl.)\n19\u00a0Cumque loqueretur Saul ad sacerdotem, tumultus magnus exortus est in castris Philisthinorum: crescebatque paulatim, et clarius resonabat. Et ait Saul ad sacerdotem: Contrahe manum tuam.\n \n20 Conclamavit ergo Saul, et omnis populus qui erat cum eo, et venerunt usque ad locum certaminis: et ecce versus fuerat gladius uniuscujusque ad proximum suum, et c\u00e6des magna nimis.\n21 Sed et Hebr\u00e6i qui fuerant cum Philisthiim heri et nudiustertius, ascenderantque cum eis in castris, reversi sunt ut essent cum Isra\u00ebl qui erant cum Saul et Jonatha.\n22 Omnes quoque Isra\u00eblit\u00e6 qui se absconderant in monte Ephraim, audientes quod fugissent Philisth\u00e6i, sociaverunt se cum suis in pr\u00e6lio. Et erant cum Saul quasi decem millia virorum.\n23 Et salvavit Dominus in die illa Isra\u00ebl: pugna autem pervenit usque ad Bethaven.\n24 Et viri Isra\u00ebl sociati sunt sibi in die illa: adjuravit autem Saul populum, dicens: Maledictus vir qui comederit panem usque ad vesperam, donec ulciscar de inimicis meis. Et non manducavit universus populus panem:\n25 omneque terr\u00e6 vulgus venit in saltum, in quo erat mel super faciem agri.\n26\u00a0Ingressus est itaque populus saltum, et apparuit fluens mel, nullusque applicuit manum ad os suum: timebat enim populus juramentum.\n \n27 Porro Jonathas non audierat cum adjuraret pater ejus populum: extenditque summitatem virg\u00e6 quam habebat in manu, et intinxit in favum mellis: et convertit manum suam ad os suum, et illuminati sunt oculi ejus.\n28 Respondensque unus de populo, ait: Jurejurando constrinxit pater tuus populum, dicens: Maledictus vir qui comederit panem hodie. (Defecerat autem populus.)\n29 Dixitque Jonathas: Turbavit pater meus terram: vidistis ipsi quia illuminati sunt oculi mei, eo quod gustaverim paululum de melle isto:\n30 quanto magis si comedisset populus de pr\u00e6da inimicorum suorum, quam reperit? nonne major plaga facta fuisset in Philisthiim?\n31\u00a0Percusserunt ergo in die illa Philisth\u00e6os a Machmis usque in Ajalon.\n Defatigatus est autem populus nimis:\n32 et versus ad pr\u00e6dam tulit oves, et boves, et vitulos, et mactaverunt in terra: comeditque populus cum sanguine.\n33 Nuntiaverunt autem Sauli dicentes quod populus peccasset Domino, comedens cum sanguine. Qui ait: Pr\u00e6varicati estis: volvite ad me jam nunc saxum grande.\n34 Et dixit Saul: Dispergimini in vulgus, et dicite eis ut adducat ad me unusquisque bovem suum et arietem, et occidite super istud, et vescimini, et non peccabitis Domino comedentes cum sanguine. Adduxit itaque omnis populus unusquisque bovem in manu sua usque ad noctem: et occiderunt ibi.\n35\u00a0\u00c6dificavit autem Saul altare Domino, tuncque primum c\u0153pit \u00e6dificare altare Domino.\n \n36 Et dixit Saul: Irruamus super Philisth\u00e6os nocte, et vastemus eos usque dum illucescat mane, nec relinquamus ex eis virum. Dixitque populus: Omne quod bonum videtur in oculis tuis, fac. Et ait sacerdos: Accedamus huc ad Deum.\n37 Et consuluit Saul Dominum: Num persequar Philisthiim? si trades eos in manus Isra\u00ebl? Et non respondit ei in die illa.\n38 Dixitque Saul: Applicate huc universos angulos populi: et scitote, et videte per quem acciderit peccatum hoc hodie.\n39 Vivit Dominus salvator Isra\u00ebl, quia si per Jonathan filium meum factum est, absque retractione morietur. Ad quod nullus contradixit ei de omni populo.\n40\u00a0Et ait ad universum Isra\u00ebl: Separamini vos in partem unam, et ego cum Jonatha filio meo ero in parte altera. Responditque populus ad Saul: Quod bonum videtur in oculis tuis, fac.\n \n41 Et dixit Saul ad Dominum Deum Isra\u00ebl: Domine Deus Isra\u00ebl, da indicium: quid est quod non responderis servo tuo hodie? si in me, aut in Jonatha filio meo, est iniquitas h\u00e6c, da ostensionem: aut si h\u00e6c iniquitas est in populo tuo, da sanctitatem. Et deprehensus est Jonathas et Saul: populus autem exivit.\n42 Et ait Saul: Mittite sortem inter me et inter Jonathan filium meum. Et captus est Jonathas.\n43 Dixit autem Saul ad Jonathan: Indica mihi quid feceris. Et indicavit ei Jonathas, et ait: Gustans gustavi in summitate virg\u00e6 qu\u00e6 erat in manu mea, paululum mellis, et ecce ego morior.\n44 Et ait Saul: H\u00e6c faciat mihi Deus, et h\u00e6c addat, quia morte morieris, Jonatha.\n45 Dixitque populus ad Saul: Ergone Jonathas morietur, qui fecit salutem hanc magnam in Isra\u00ebl? hoc nefas est: vivit Dominus, si ceciderit capillus de capite ejus in terram, quia cum Deo operatus est hodie. Liberavit ergo populus Jonathan, ut non moreretur.\n46\u00a0Recessitque Saul, nec persecutus est Philisthiim: porro Philisthiim abierunt in loca sua.\n \n47 Et Saul, confirmato regno super Isra\u00ebl, pugnabat per circuitum adversum omnes inimicos ejus, contra Moab, et filios Ammon, et Edom, et reges Soba, et Philisth\u00e6os: et quocumque se verterat, superabat.\n48 Congregatoque exercitu, percussit Amalec, et eruit Isra\u00ebl de manu vastatorum ejus.\n49 Fuerunt autem filii Saul, Jonathas, et Jessui, et Melchisua: et nomina duarum filiarum ejus, nomen primogenit\u00e6 Merob, et nomen minoris Michol.\n50 Et nomen uxoris Saul Achinoam filia Achimaas: et nomen principis militi\u00e6 ejus Abner filius Ner, patruelis Saul.\n51 Porro Cis fuit pater Saul, et Ner pater Abner, filius Abiel.\n52 Erat autem bellum potens adversum Philisth\u00e6os omnibus diebus Saul. Nam quemcumque viderat Saul virum fortem, et aptum ad pr\u00e6lium, sociabat eum sibi.","title":"Vulgate: 1 Samuel: 1 Samuel Chapter 14","type":"page"}