{"collection":"Bible & Christianity","html_url":"https://unchartedknowledge.5gfusion.net/browse/bib/vul/sa1017.htm","path":"bib/vul/sa1017.htm","source_url":"https://sacred-texts.com/bib/vul/sa1017.htm","text":"1 Congregantes autem Philisthiim agmina sua in pr\u00e6lium, convenerunt in Socho Jud\u00e6: et castrametati sunt inter Socho et Azeca in finibus Dommim.\n2 Porro Saul et filii Isra\u00ebl congregati venerunt in Vallem terebinthi, et direxerunt aciem ad pugnandum contra Philisthiim.\n3 Et Philisthiim stabant super montem ex parte hac, et Isra\u00ebl stabat supra montem ex altera parte: vallisque erat inter eos.\n4 Et egressus est vir spurius de castris Philisthinorum nomine Goliath, de Geth, altitudinis sex cubitorum et palmi:\n5 et cassis \u00e6rea super caput ejus, et lorica squamata induebatur. Porro pondus loric\u00e6 ejus, quinque millia siclorum \u00e6ris erat:\n6 et ocreas \u00e6reas habebat in cruribus, et clypeus \u00e6reus tegebat humeros ejus.\n7 Hastile autem hast\u00e6 ejus erat quasi liciatorium texentium: ipsum autem ferrum hast\u00e6 ejus sexcentos siclos habebat ferri: et armiger ejus antecedebat eum.\n8 Stansque clamabat adversum phalangas Isra\u00ebl, et dicebat eis: Quare venistis parati ad pr\u00e6lium? numquid ego non sum Philisth\u00e6us, et vos servi Saul? eligite ex vobis virum, et descendat ad singulare certamen.\n9 Si quiverit pugnare mecum, et percusserit me, erimus vobis servi: si autem ego pr\u00e6valuero, et percussero eum, vos servi eritis, et servietis nobis.\n10 Et aiebat Philisth\u00e6us: Ego exprobravi agminibus Isra\u00ebl hodie: date mihi virum, et ineat mecum singulare certamen.\n11\u00a0Audiens autem Saul et omnes Isra\u00eblit\u00e6 sermones Philisth\u00e6i hujuscemodi, stupebant, et metuebant nimis.\n \n12 David autem erat filius viri Ephrath\u00e6i, de quo supra dictum est, de Bethlehem Juda, cui nomen erat Isai, qui habebat octo filios, et erat vir in diebus Saul senex, et grand\u00e6vus inter viros.\n13 Abierunt autem tres filii ejus majores post Saul in pr\u00e6lium: et nomina trium filiorum ejus qui perrexerunt ad bellum, Eliab primogenitus, et secundus Abinadab, tertiusque Samma.\n14 David autem erat minimus. Tribus ergo majoribus secutis Saulem,\n15 abiit David, et reversus est a Saul ut pasceret gregem patris sui in Bethlehem.\n16 Procedebat vero Philisth\u00e6us mane et vespere, et stabat quadraginta diebus.\n17 Dixit autem Isai ad David filium suum: Accipe fratribus tuis ephi polent\u00e6, et decem panes istos, et curre in castra ad fratres tuos,\n18 et decem formellas casei has deferes ad tribunum: et fratres tuos visitabis, si recte agant: et cum quibus ordinati sunt, disce.\n19 Saul autem, et illi, et omnes filii Isra\u00ebl, in Valle terebinthi pugnabant adversum Philisthiim.\n20 Surrexit itaque David mane, et commendavit gregem custodi: et onustus abiit, sicut pr\u00e6ceperat ei Isai. Et venit ad locum Magala, et ad exercitum, qui egressus ad pugnam vociferatus erat in certamine.\n21 Direxerat enim aciem Isra\u00ebl, sed et Philisthiim ex adverso fuerant pr\u00e6parati.\n22 Derelinquens ergo David vasa qu\u00e6 attulerat sub manu custodis ad sarcinas, cucurrit ad locum certaminis, et interrogabat si omnia recte agerentur erga fratres suos.\n23 Cumque adhuc ille loqueretur eis, apparuit vir ille spurius ascendens, Goliath nomine, Philisth\u00e6us de Geth, de castris Philisthinorum: et loquente eo h\u00e6c eadem verba audivit David.\n24\u00a0Omnes autem Isra\u00eblit\u00e6, cum vidissent virum, fugerunt a facie ejus, timentes eum valde.\n \n25 Et dixit unus quispiam de Isra\u00ebl: Num vidistis virum hunc, qui ascendit? ad exprobrandum enim Isra\u00ebli ascendit. Virum ergo qui percusserit eum, ditabit rex divitiis magnis, et filiam suam dabit ei, et domum patris ejus faciet absque tributo in Isra\u00ebl.\n26 Et ait David ad viros qui stabant secum, dicens: Quid dabitur viro qui percusserit Philisth\u00e6um hunc, et tulerit opprobrium de Isra\u00ebl? quis enim est hic Philisth\u00e6us incircumcisus, qui exprobravit acies Dei viventis?\n27 Referebat autem ei populus eumdem sermonem, dicens: H\u00e6c dabuntur viro qui percusserit eum.\n28 Quod cum audisset Eliab frater ejus major, loquente eo cum aliis, iratus est contra David, et ait: Quare venisti, et quare dereliquisti pauculas oves illas in deserto? Ego novi superbiam tuam, et nequitiam cordis tui: quia ut videres pr\u00e6lium, descendisti.\n29 Et dixit David: Quid feci? numquid non verbum est?\n30\u00a0Et declinavit paululum ab eo ad alium: dixitque eumdem sermonem. Et respondit ei populus verbum sicut prius.\n \n31 Audita sunt autem verba qu\u00e6 locutus est David, et annuntiata in conspectu Saul.\n32 Ad quem cum fuisset adductus, locutus est ei: Non concidat cor cujusquam in eo: ego servus tuus vadam, et pugnabo adversus Philisth\u00e6um.\n33 Et ait Saul ad David: Non vales resistere Philisth\u00e6o isti, nec pugnare adversus eum, quia puer es: hic autem vir bellator est ab adolescentia sua.\n34 Dixitque David ad Saul: Pascebat servus tuus patris sui gregem, et veniebat leo vel ursus, et tollebat arietem de medio gregis:\n35 et persequebar eos, et percutiebam, eruebamque de ore eorum: et illi consurgebant adversum me, et apprehendebam mentum eorum, et suffocabam, interficiebamque eos.\n36 Nam et leonem et ursum interfeci ego servus tuus: erit igitur et Philisth\u00e6us hic incircumcisus quasi unus ex eis. Nunc vadam, et auferam opprobrium populi: quoniam quis est iste Philisth\u00e6us incircumcisus, qui ausus est maledicere exercitui Dei viventis?\n37 Et ait David: Dominus qui eripuit me de manu leonis, et de manu ursi, ipse me liberabit de manu Philisth\u00e6i hujus. Dixit autem Saul ad David: Vade, et Dominus tecum sit.\n38 Et induit Saul David vestimentis suis, et imposuit galeam \u00e6ream super caput ejus, et vestivit eum lorica.\n39\u00a0Accinctus ergo David gladio ejus super vestem suam, c\u0153pit tentare si armatus posset incedere: non enim habebat consuetudinem. Dixitque David ad Saul: Non possum sic incedere, quia non usum habeo.\n Et deposuit ea,\n40 et tulit baculum suum, quem semper habebat in manibus: et elegit sibi quinque limpidissimos lapides de torrente, et misit eos in peram pastoralem quam habebat secum, et fundam manu tulit: et processit adversum Philisth\u00e6um.\n41 Ibat autem Philisth\u00e6us incedens, et appropinquans adversum David, et armiger ejus ante eum.\n42 Cumque inspexisset Philisth\u00e6us, et vidisset David, despexit eum. Erat enim adolescens, rufus, et pulcher aspectu.\n43 Et dixit Philisth\u00e6us ad David: Numquid ego canis sum, quod tu venis ad me cum baculo? Et maledixit Philisth\u00e6us David in diis suis:\n44 dixitque ad David: Veni ad me, et dabo carnes tuas volatilibus c\u00e6li et bestiis terr\u00e6.\n45 Dixit autem David ad Philisth\u00e6um: Tu venis ad me cum gladio, et hasta, et clypeo: ego autem venio ad te in nomine Domini exercituum, Dei agminum Isra\u00ebl quibus exprobrasti\n46 hodie, et dabit te Dominus in manu mea, et percutiam te, et auferam caput tuum a te: et dabo cadavera castrorum Philisthiim hodie volatilibus c\u00e6li, et bestiis terr\u00e6, ut sciat omnis terra quia est Deus in Isra\u00ebl,\n47 et noverit universa ecclesia h\u00e6c, quia non in gladio nec in hasta salvat Dominus: ipsius enim est bellum, et tradet vos in manus nostras.\n48 Cum ergo surrexisset Philisth\u00e6us, et veniret, et appropinquaret contra David, festinavit David et cucurrit ad pugnam ex adverso Philisth\u00e6i.\n49 Et misit manum suam in peram, tulitque unum lapidem, et funda jecit, et circumducens percussit Philisth\u00e6um in fronte: et infixus est lapis in fronte ejus, et cecidit in faciem suam super terram.\n50 Pr\u00e6valuitque David adversum Philisth\u00e6um in funda et lapide, percussumque Philisth\u00e6um interfecit. Cumque gladium non haberet in manu David,\n51 cucurrit, et stetit super Philisth\u00e6um, et tulit gladium ejus, et eduxit eum de vagina sua: et interfecit eum, pr\u00e6ciditque caput ejus. Videntes autem Philisthiim quod mortuus esset fortissimus eorum, fugerunt.\n52 Et consurgentes viri Isra\u00ebl et Juda vociferati sunt, et persecuti sunt Philisth\u00e6os usque dum venirent in vallem, et usque ad portas Accaron: cecideruntque vulnerati de Philisthiim in via Saraim, et usque ad Geth, et usque ad Accaron.\n53 Et revertentes filii Isra\u00ebl postquam persecuti fuerant Philisth\u00e6os, invaserunt castra eorum.\n54\u00a0Assumens autem David caput Philisth\u00e6i, attulit illud in Jerusalem: arma vero ejus posuit in tabernaculo suo.\n \n55 Eo autem tempore quo viderat Saul David egredientem contra Philisth\u00e6um, ait ad Abner principem militi\u00e6: De qua stirpe descendit hic adolescens, Abner? Dixitque Abner: Vivit anima tua, rex, si novi.\n56 Et ait rex: Interroga tu, cujus filius sit iste puer.\n57 Cumque regressus esset David, percusso Philisth\u00e6o, tulit eum Abner, et introduxit coram Saule, caput Philisth\u00e6i habentem in manu.\n58 Et ait ad eum Saul: De qua progenie es, o adolescens? Dixitque David: Filius servi tui Isai Bethlehemit\u00e6 ego sum.","title":"Vulgate: 1 Samuel: 1 Samuel Chapter 17","type":"page"}