{"collection":"Bible & Christianity","html_url":"https://unchartedknowledge.5gfusion.net/browse/bib/vul/sa1021.htm","path":"bib/vul/sa1021.htm","source_url":"https://sacred-texts.com/bib/vul/sa1021.htm","text":"1 Venit autem David in Nobe ad Achimelech sacerdotem: et obstupuit Achimelech, eo quod venisset David. Et dixit ei: Quare tu solus, et nullus est tecum?\n2 Et ait David ad Achimelech sacerdotem: Rex pr\u00e6cepit mihi sermonem, et dixit: Nemo sciat rem propter quam missus es a me, et cujusmodi pr\u00e6cepta tibi dederim: nam et pueris condixi in illum et illum locum.\n3 Nunc ergo si quid habes ad manum, vel quinque panes, da mihi, aut quidquid inveneris.\n4 Et respondens sacerdos ad David, ait illi: Non habeo laicos panes ad manum, sed tantum panem sanctum: si mundi sunt pueri, maxime a mulieribus?\n5 Et respondit David sacerdoti, et dixit ei: Equidem, si de mulieribus agitur: continuimus nos ab heri et nudiustertius quando egrediebamur, et fuerunt vasa puerorum sancta. Porro via h\u00e6c polluta est, sed et ipsa hodie sanctificabitur in vasis.\n6 Dedit ergo ei sacerdos sanctificatum panem: neque enim erat ibi panis, nisi tantum panes propositionis, qui sublati fuerant a facie Domini, ut ponerentur panes calidi.\n7 Erat autem ibi vir quidam de servis Saul in die illa, intus in tabernaculo Domini: et nomen ejus Do\u00ebg Idum\u00e6us, potentissimus pastorum Saul.\n8 Dixit autem David ad Achimelech: Si habes hic ad manum hastam aut gladium? quia gladium meum et arma mea non tuli mecum: sermo enim regis urgebat.\n9\u00a0Et dixit sacerdos: Ecce hic gladius Goliath Philisth\u00e6i, quem percussisti in Valle terebinthi: est involutus pallio post ephod: si istum vis tollere, tolle: neque enim hic est alius absque eo. Et ait David: Non est huic alter similis: da mihi eum.\n \n10 Surrexit itaque David, et fugit in die illa a facie Saul: et venit ad Achis regem Geth.\n11\u00a0Dixeruntque servi Achis ad eum cum vidissent David: Numquid non iste est David rex terr\u00e6? nonne huic cantabant per choros, dicentes: [Percussit Saul mille,\n et David decem millia?]\n12 Posuit autem David sermones istos in corde suo, et extimuit valde a facie Achis regis Geth.\n13 Et immutavit os suum coram eis, et collabebatur inter manus eorum: et impingebat in ostia port\u00e6, defluebantque saliv\u00e6 ejus in barbam.\n14 Et ait Achis ad servos suos: Vidistis hominem insanum: quare adduxistis eum ad me?\n15 an desunt nobis furiosi, quod introduxistis istum, ut fureret me pr\u00e6sente? hiccine ingredietur domum meam?","title":"Vulgate: 1 Samuel: 1 Samuel Chapter 21","type":"page"}