{"collection":"Bible & Christianity","html_url":"https://unchartedknowledge.5gfusion.net/browse/bib/vul/sa1028.htm","path":"bib/vul/sa1028.htm","source_url":"https://sacred-texts.com/bib/vul/sa1028.htm","text":"1 Factum est autem in diebus illis, congregaverunt Philisthiim agmina sua, ut pr\u00e6pararentur ad bellum contra Isra\u00ebl: dixitque Achis ad David: Sciens nunc scito quoniam mecum egredieris in castris, tu et viri tui.\n2 Dixitque David ad Achis: Nunc scies qu\u00e6 facturus est servus tuus. Et ait Achis ad David: Et ego custodem capitis mei ponam te cunctis diebus.\n3 Samuel autem mortuus est, planxitque eum omnis Isra\u00ebl, et sepelierunt eum in Ramatha urbe sua. Et Saul abstulit magos et hariolos de terra.\n4 Congregatique sunt Philisthiim, et venerunt, et castrametati sunt in Sunam: congregavit autem et Saul universum Isra\u00ebl, et venit in Gelbo\u00eb.\n5\u00a0Et vidit Saul castra Philisthiim, et timuit, et expavit cor ejus nimis.\n \n6 Consuluitque Dominum, et non respondit ei neque per somnia, neque per sacerdotes, neque per prophetas.\n7 Dixitque Saul servis suis: Qu\u00e6rite mihi mulierem habentem pythonem, et vadam ad eam, et sciscitabor per illam. Et dixerunt servi ejus ad eum: Est mulier pythonem habens in Endor.\n8 Mutavit ergo habitum suum, vestitusque est aliis vestimentis, et abiit ipse, et duo viri cum eo: veneruntque ad mulierem nocte, et ait illi: Divina mihi in pythone, et suscita mihi quem dixero tibi.\n9 Et ait mulier ad eum: Ecce, tu nosti quanta fecerit Saul, et quomodo eraserit magos et hariolos de terra: quare ergo insidiaris anim\u00e6 me\u00e6, ut occidar?\n10 Et juravit ei Saul in Domino, dicens: Vivit Dominus, quia non eveniet tibi quidquam mali propter hanc rem.\n11 Dixitque ei mulier: Quem suscitabo tibi? Qui ait: Samuelem mihi suscita.\n12 Cum autem vidisset mulier Samuelem, exclamavit voce magna, et dixit ad Saul: Quare imposuisti mihi? tu es enim Saul.\n13 Dixitque ei rex: Noli timere: quid vidisti? Et ait mulier ad Saul: Deos vidi ascendentes de terra.\n14 Dixitque ei: Qualis est forma ejus? Qu\u00e6 ait: Vir senex ascendit, et ipse amictus est pallio. Et intellexit Saul quod Samuel esset, et inclinavit se super faciem suam in terra, et adoravit.\n15 Dixit autem Samuel ad Saul: Quare inquietasti me ut suscitarer? Et ait Saul: Coarctor nimis: siquidem Philisthiim pugnant adversum me, et Deus recessit a me, et exaudire me noluit neque in manu prophetarum, neque per somnia: vocavi ergo te, ut ostenderes mihi quid faciam.\n16 Et ait Samuel: Quid interrogas me, cum Dominus recesserit a te, et transierit ad \u00e6mulum tuum?\n17 Faciet enim tibi Dominus sicut locutus est in manu mea, et scindet regnum tuum de manu tua et dabit illud proximo tuo David:\n18 quia non obedisti voci Domini, neque fecisti iram furoris ejus in Amalec: idcirco quod pateris, fecit tibi Dominus hodie.\n19 Et dabit Dominus etiam Isra\u00ebl tecum in manus Philisthiim: cras autem tu et filii tui mecum eritis: sed et castra Isra\u00ebl tradet Dominus in manus Philisthiim.\n20 Statimque Saul cecidit porrectus in terram: extimuerat enim verba Samuelis, et robur non erat in eo, quia non comederat panem tota die illa.\n21 Ingressa est itaque mulier illa ad Saul (conturbatus enim erat valde), dixitque ad eum: Ecce obedivit ancilla tua voci tu\u00e6, et posui animam meam in manu mea: et audivi sermones tuos, quos locutus es ad me.\n22 Nunc igitur audi et tu vocem ancill\u00e6 tu\u00e6, et ponam coram te buccellam panis, ut comedens convalescas, et possis iter agere.\n23 Qui renuit, et ait: Non comedam. Co\u00ebgerunt autem eum servi sui et mulier, et tandem audita voce eorum surrexit de terra, et sedit super lectum.\n24 Mulier autem illa habebat vitulum pascualem in domo, et festinavit, et occidit eum: tollensque farinam, miscuit eam, et coxit azyma,\n25 et posuit ante Saul et ante servos ejus. Qui cum comedissent, surrexerunt, et ambulaverunt per totam noctem illam.","title":"Vulgate: 1 Samuel: 1 Samuel Chapter 28","type":"page"}