{"collection":"Bible & Christianity","html_url":"https://unchartedknowledge.5gfusion.net/browse/bib/vul/sa2005.htm","path":"bib/vul/sa2005.htm","source_url":"https://sacred-texts.com/bib/vul/sa2005.htm","text":"1 Et venerunt univers\u00e6 tribus Isra\u00ebl ad David in Hebron, dicentes: Ecce nos os tuum et caro tua sumus.\n2 Sed et heri et nudiustertius cum esset Saul rex super nos, tu eras educens et reducens Isra\u00ebl: dixit autem Dominus ad te: Tu pasces populum meum Isra\u00ebl, et tu eris dux super Isra\u00ebl.\n3 Venerunt quoque et seniores Isra\u00ebl ad regem in Hebron, et percussit cum eis rex David f\u0153dus in Hebron coram Domino: unxeruntque David in regem super Isra\u00ebl.\n4 Filius triginta annorum erat David cum regnare c\u0153pisset, et quadraginta annis regnavit.\n5\u00a0In Hebron regnavit super Judam septem annis et sex mensibus: in Jerusalem autem regnavit triginta tribus annis super omnem Isra\u00ebl et Judam.\n \n6 Et abiit rex, et omnes viri qui erant cum eo, in Jerusalem, ad Jebus\u00e6um habitatorem terr\u00e6: dictumque est David ab eis: Non ingredieris huc, nisi abstuleris c\u00e6cos et claudos dicentes: Non ingredietur David huc.\n7 Cepit autem David arcem Sion: h\u00e6c est civitas David.\n8 Proposuerat enim David in die illa pr\u00e6mium, qui percussisset Jebus\u00e6um, et tetigisset domatum fistulas, et abstulisset c\u00e6cos et claudos odientes animam David. Idcirco dicitur in proverbio: C\u00e6cus et claudus non intrabunt in templum.\n9 Habitavit autem David in arce, et vocavit eam civitatem David: et \u00e6dificavit per gyrum a Mello et intrinsecus.\n10 Et ingrediebatur proficiens atque succrescens, et Dominus Deus exercituum erat cum eo.\n11 Misit quoque Hiram rex Tyri nuntios ad David, et ligna cedrina, et artifices lignorum, artificesque lapidum ad parietes: et \u00e6dificaverunt domum David.\n12 Et cognovit David quoniam confirmasset eum Dominus regem super Isra\u00ebl, et quoniam exaltasset regnum ejus super populum suum Isra\u00ebl.\n13 Accepit ergo David adhuc concubinas et uxores de Jerusalem, postquam venerat de Hebron: natique sunt David et alii filii et fili\u00e6:\n14 et h\u00e6c nomina eorum, qui nati sunt ei in Jerusalem: Samua, et Sobab, et Nathan, et Salomon,\n15 et Jebahar, et Elisua, et Nepheg,\n16\u00a0et Japhia, et Elisama, et Elioda, et Eliphaleth.\n \n17 Audierunt ergo Philisthiim quod unxissent David in regem super Isra\u00ebl, et ascenderunt universi ut qu\u00e6rerent David: quod cum audisset David, descendit in pr\u00e6sidium.\n18 Philisthiim autem venientes diffusi sunt in valle Raphaim.\n19 Et consuluit David Dominum, dicens: Si ascendam ad Philisthiim? et si dabis eos in manu mea? Et dixit Dominus ad David: Ascende, quia tradens dabo Philisthiim in manu tua.\n20 Venit ergo David in Baal Pharasim: et percussit eos ibi, et dixit: Divisit Dominus inimicos meos coram me, sicut dividuntur aqu\u00e6. Propterea vocatum est nomen loci illius, Baal Pharasim.\n21 Et reliquerunt ibi sculptilia sua, qu\u00e6 tulit David et viri ejus.\n22 Et addiderunt adhuc Philisthiim ut ascenderent, et diffusi sunt in valle Raphaim.\n23 Consuluit autem David Dominum: Si ascendam contra Philisth\u00e6os, et tradas eos in manus meas? Qui respondit: Non ascendas contra eos, sed gyra post tergum eorum, et venies ad eos ex adverso pyrorum.\n24 Et cum audieris sonitum gradientis in cacumine pyrorum, tunc inibis pr\u00e6lium: quia tunc egredietur Dominus ante faciem tuam, ut percutiat castra Philisthiim.\n25 Fecit itaque David sicut pr\u00e6ceperat ei Dominus, et percussit Philisthiim de Gabaa usque dum venias Gezer.","title":"Vulgate: 2 Samuel: 2 Samuel Chapter 5","type":"page"}