{"collection":"Bible & Christianity","html_url":"https://unchartedknowledge.5gfusion.net/browse/bib/vul/sa2006.htm","path":"bib/vul/sa2006.htm","source_url":"https://sacred-texts.com/bib/vul/sa2006.htm","text":"1 Congregavit autem rursum David omnes electos ex Isra\u00ebl, triginta millia.\n2 Surrexitque David, et abiit, et universus populus qui erat cum eo de viris Juda, ut adducerent arcam Dei, super quam invocatum est nomen Domini exercituum, sedentis in cherubim super eam.\n3 Et imposuerunt arcam Dei super plaustrum novum: tuleruntque eam de domo Abinadab, qui erat in Gabaa: Oza autem et Ahio, filii Abinadab, minabant plaustrum novum.\n4 Cumque tulissent eam de domo Abinadab, qui erat in Gabaa, custodiens arcam Dei Ahio pr\u00e6cedebat arcam.\n5 David autem et omnis Isra\u00ebl ludebant coram Domino in omnibus lignis fabrefactis, et citharis et lyris et tympanis et sistris et cymbalis.\n6 Postquam autem venerunt ad aream Nachon, extendit Oza manum ad arcam Dei, et tenuit eam: quoniam calcitrabant boves, et declinaverunt eam.\n7 Iratusque est indignatione Dominus contra Ozam, et percussit eum super temeritate: qui mortuus est ibi juxta arcam Dei.\n8 Contristatus est autem David, eo quod percussisset Dominus Ozam, et vocatum est nomen loci illius: Percussio Oz\u00e6, usque in diem hanc.\n9 Et extimuit David Dominum in die illa, dicens: Quomodo ingredietur ad me arca Domini?\n10 Et noluit divertere ad se arcam Domini in civitatem David: sed divertit eam in domum Obededom Geth\u00e6i.\n11\u00a0Et habitavit arca Domini in domo Obededom Geth\u00e6i tribus mensibus: et benedixit Dominus Obededom, et omnem domum ejus.\n \n12 Nuntiatumque est regi David quod benedixisset Dominus Obededom, et omnia ejus, propter arcam Dei. Abiit ergo David, et adduxit arcam Dei de domo Obededom in civitatem David cum gaudio: et erant cum David septem chori, et victima vituli.\n13 Cumque transcendissent qui portabant arcam Domini sex passus, immolabat bovem et arietem,\n14 et David saltabat totis viribus ante Dominum: porro David erat accinctus ephod lineo.\n15 Et David et omnis domus Isra\u00ebl ducebant arcam testamenti Domini in jubilo, et in clangore buccin\u00e6.\n16 Cumque intrasset arca Domini in civitatem David, Michol filia Saul, prospiciens per fenestram, vidit regem David subsilientem atque saltantem coram Domino: et despexit eum in corde suo.\n17 Et introduxerunt arcam Domini, et imposuerunt eam in loco suo in medio tabernaculi, quod tetenderat ei David: et obtulit David holocausta et pacifica coram Domino.\n18 Cumque complesset offerens holocausta et pacifica, benedixit populo in nomine Domini exercituum.\n19\u00a0Et partitus est univers\u00e6 multitudini Isra\u00ebl tam viro quam mulieri singulis collyridam panis unam, et assaturam bubul\u00e6 carnis unam, et similam frixam oleo: et abiit omnis populus, unusquisque in domum suam.\n \n20 Reversusque est David ut benediceret domui su\u00e6: et egressa Michol filia Saul in occursum David, ait: Quam gloriosus fuit hodie rex Isra\u00ebl discooperiens se ante ancillas servorum suorum, et nudatus est, quasi si nudetur unus de scurris.\n21 Dixitque David ad Michol: Ante Dominum, qui elegit me potius quam patrem tuum et quam omnem domum ejus, et pr\u00e6cepit mihi ut essem dux super populum Domini in Isra\u00ebl\n22 et Judam, et vilior fiam plus quam factus sum: et ero humilis in oculis meis, et cum ancillis de quibus locuta es, gloriosior apparebo.\n23 Igitur Michol fili\u00e6 Saul non est natus filius usque in diem mortis su\u00e6.","title":"Vulgate: 2 Samuel: 2 Samuel Chapter 6","type":"page"}