{"collection":"Bible & Christianity","html_url":"https://unchartedknowledge.5gfusion.net/browse/bib/vul/sa2008.htm","path":"bib/vul/sa2008.htm","source_url":"https://sacred-texts.com/bib/vul/sa2008.htm","text":"1 Factum est autem post h\u00e6c, percussit David Philisthiim, et humiliavit eos, et tulit David frenum tributi de manu Philisthiim.\n2 Et percussit Moab, et mensus est eos funiculo, co\u00e6quans terr\u00e6: mensus est autem duos funiculos, unum ad occidendum, et unum ad vivificandum: factusque est Moab David serviens sub tributo.\n3 Et percussit David Adarezer filium Rohob regem Soba, quando profectus est ut dominaretur super flumen Euphraten.\n4 Et captis David ex parte ejus mille septingentis equitibus, et viginti millibus peditum, subnervavit omnes jugales curruum: dereliquit autem ex eis centum currus.\n5 Venit quoque Syria Damasci, ut pr\u00e6sidium ferret Adarezer regi Soba: et percussit David de Syria viginti duo millia virorum.\n6 Et posuit David pr\u00e6sidium in Syria Damasci: factaque est Syria David serviens sub tributo: servavitque Dominus David in omnibus ad qu\u00e6cumque profectus est.\n7 Et tulit David arma aurea qu\u00e6 habebant servi Adarezer, et detulit ea in Jerusalem.\n8 Et de Bete et de Beroth, civitatibus Adarezer, tulit rex David \u00e6s multum nimis.\n9 Audivit autem Thou rex Emath quod percussisset David omne robur Adarezer,\n10 et misit Thou Joram filium suum ad regem David, ut salutaret eum congratulans, et gratias ageret: eo quod expugnasset Adarezer, et percussisset eum. Hostis quippe erat Thou Adarezer, et in manu ejus erant vasa aurea, et vasa argentea, et vasa \u00e6rea:\n11 qu\u00e6 et ipsa sanctificavit rex David Domino cum argento et auro qu\u00e6 sanctificaverat de universis gentibus quas subegerat,\n12 de Syria, et Moab, et filiis Ammon, et Philisthiim, et Amalec, et de manubiis Adarezer filii Rohob regis Soba.\n13 Fecit quoque sibi David nomen cum reverteretur capta Syria in valle Salinarum, c\u00e6sis decem et octo millibus:\n14 et posuit in Idum\u00e6a custodes, statuitque pr\u00e6sidium: et facta est universa Idum\u00e6a serviens David, et servavit Dominus David in omnibus ad qu\u00e6cumque profectus est.\n15 Et regnavit David super omnem Isra\u00ebl: faciebat quoque David judicium et justitiam omni populo suo.\n16 Joab autem filius Sarvi\u00e6 erat super exercitum: porro Josaphat filius Ahilud erat a commentariis:\n17 et Sadoc filius Achitob, et Achimelech filius Abiathar, erant sacerdotes: et Saraias, scriba:\n18 Banaias autem filius Jojad\u00e6 super Cerethi et Phelethi: filii autem David sacerdotes erant.","title":"Vulgate: 2 Samuel: 2 Samuel Chapter 8","type":"page"}