{"collection":"Bible & Christianity","html_url":"https://unchartedknowledge.5gfusion.net/browse/bib/vul/sa2022.htm","path":"bib/vul/sa2022.htm","source_url":"https://sacred-texts.com/bib/vul/sa2022.htm","text":"1 Locutus est autem David Domino verba carminis hujus in die qua liberavit eum Dominus de manu omnium inimicorum suorum, et de manu Saul.\n2\u00a0Et ait: [Dominus petra mea, et robur meum, et salvator meus.\n3\u00a0Deus fortis meus: sperabo in eum;\n scutum meum, et cornu salutis me\u00e6:\n elevator meus, et refugium meum;\n salvator meus: de iniquitate liberabis me.\n4\u00a0Laudabilem invocabo Dominum,\n et ab inimicis meis salvus ero.\n5\u00a0Quia circumdederunt me contritiones mortis:\n torrentes Belial terruerunt me.\n6\u00a0Funes inferni circumdederunt me:\n pr\u00e6venerunt me laquei mortis.\n7\u00a0In tribulatione mea invocabo Dominum,\n et ad Deum meum clamabo:\n et exaudiet de templo suo vocem meam,\n et clamor meus veniet ad aures ejus.\n8\u00a0Commota est et contremuit terra;\n fundamenta montium concussa sunt, et conquassata:\n quoniam iratus est eis.\n9\u00a0Ascendit fumus de naribus ejus,\n et ignis de ore ejus vorabit:\n carbones succensi sunt ab eo.\n10\u00a0Inclinavit c\u00e6los, et descendit:\n et caligo sub pedibus ejus.\n11\u00a0Et ascendit super cherubim, et volavit:\n et lapsus est super pennas venti.\n12\u00a0Posuit tenebras in circuitu suo latibulum,\n cribrans aquas de nubibus c\u00e6lorum.\n13\u00a0Pr\u00e6 fulgore in conspectu ejus,\n succensi sunt carbones ignis.\n14\u00a0Tonabit de c\u00e6lo Dominus,\n et excelsus dabit vocem suam.\n15\u00a0Misit sagittas et dissipavit eos;\n fulgur, et consumpsit eos.\n16\u00a0Et apparuerunt effusiones maris,\n et revelata sunt fundamenta orbis\n ab increpatione Domini,\n ab inspiratione spiritus furoris ejus.\n17\u00a0Misit de excelso, et assumpsit me,\n et extraxit me de aquis multis.\n18\u00a0Liberavit me ab inimico meo potentissimo,\n et ab his qui oderant me:\n quoniam robustiores me erant.\n19\u00a0Pr\u00e6venit me in die afflictionis me\u00e6,\n et factus est Dominus firmamentum meum.\n20\u00a0Et eduxit me in latitudinem:\n liberavit me, quia complacui ei.\n21\u00a0Retribuet mihi Dominus secundum justitiam meam:\n et secundum munditiam manuum mearum reddet mihi.\n22\u00a0Quia custodivi vias Domini,\n et non egi impie a Deo meo.\n23\u00a0Omnia enim judicia ejus in conspectu meo,\n et pr\u00e6cepta ejus non amovi a me.\n24\u00a0Et ero perfectus cum eo,\n et custodiam me ab iniquitate mea.\n25\u00a0Et restituet mihi Dominus secundum justitiam meam,\n et secundum munditiam manuum mearum in conspectu oculorum suorum.\n26\u00a0Cum sancto sanctus eris,\n et cum robusto perfectus.\n27\u00a0Cum electo electus eris,\n et cum perverso perverteris.\n28\u00a0Et populum pauperem salvum facies:\n oculisque tuis excelsos humiliabis.\n29\u00a0Quia tu lucerna mea, Domine,\n et tu, Domine, illuminabis tenebras meas.\n30\u00a0In te enim curram accinctus:\n in Deo meo transiliam murum.\n31\u00a0Deus, immaculata via ejus;\n eloquium Domini igne examinatum:\n scutum est omnium sperantium in se.\n32\u00a0Quis est Deus pr\u00e6ter Dominum,\n et quis fortis pr\u00e6ter Deum nostrum?\n33\u00a0Deus qui accinxit me fortitudine,\n et complanavit perfectam viam meam.\n34\u00a0Co\u00e6quans pedes meos cervis,\n et super excelsa mea statuens me;\n35\u00a0docens manus meas ad pr\u00e6lium,\n et componens quasi arcum \u00e6reum brachia mea.\n36\u00a0Dedisti mihi clypeum salutis tu\u00e6,\n et mansuetudo tua multiplicavit me.\n37\u00a0Dilatabis gressus meos subtus me,\n et non deficient tali mei.\n38\u00a0Persequar inimicos meos, et conteram,\n et non convertar donec consumam eos.\n39\u00a0Consumam eos et confringam, ut non consurgant:\n cadent sub pedibus meis.\n40\u00a0Accinxisti me fortitudine ad pr\u00e6lium:\n incurvasti resistentes mihi subtus me.\n41\u00a0Inimicos meos dedisti mihi dorsum;\n odientes me, et disperdam eos.\n42\u00a0Clamabunt, et non erit qui salvet;\n ad Dominum, et non exaudiet eos.\n43\u00a0Delebo eos ut pulverem terr\u00e6;\n quasi lutum platearum comminuam eos atque confringam.\n44\u00a0Salvabis me a contradictionibus populi mei;\n custodies me in caput gentium:\n populus quem ignoro serviet mihi.\n45\u00a0Filii alieni resistent mihi;\n auditu auris obedient mihi.\n46\u00a0Filii alieni defluxerunt,\n et contrahentur in angustiis suis.\n47\u00a0Vivit Dominus, et benedictus Deus meus,\n et exaltabitur Deus fortis salutis me\u00e6.\n48\u00a0Deus qui das vindictas mihi,\n et dejicis populos sub me.\n49\u00a0Qui educis me ab inimicis meis,\n et a resistentibus mihi elevas me:\n a viro iniquo liberabis me.\n50\u00a0Propterea confitebor tibi, Domine, in gentibus,\n et nomini tuo cantabo:\n51\u00a0magnificans salutes regis sui,\n et faciens misericordiam christo suo David,\n et semini ejus in sempiternum.]","title":"Vulgate: 2 Samuel: 2 Samuel Chapter 22","type":"page"}