{"collection":"Bible & Christianity","html_url":"https://unchartedknowledge.5gfusion.net/browse/bib/vul/sa2024.htm","path":"bib/vul/sa2024.htm","source_url":"https://sacred-texts.com/bib/vul/sa2024.htm","text":"1 Et addidit furor Domini irasci contra Isra\u00ebl, commovitque David in eis dicentem: Vade, numera Isra\u00ebl et Judam.\n2 Dixitque rex ad Joab principem exercitus sui: Perambula omnes tribus Isra\u00ebl a Dan usque Bersabee, et numerate populum, ut sciam numerum ejus.\n3 Dixitque Joab regi: Adaugeat Dominus Deus tuus ad populum tuum, quantus nunc est, iterumque centuplicet in conspectu domini mei regis: sed quid sibi dominus meus rex vult in re hujuscemodi?\n4 Obtinuit autem sermo regis verba Joab et principum exercitus: egressusque est Joab et princeps militum a facie regis, ut numerarent populum Isra\u00ebl.\n5 Cumque pertransissent Jordanem, venerunt in Aro\u00ebr ad dexteram urbis, qu\u00e6 est in valle Gad:\n6 et per Jazer transierunt in Galaad, et in terram inferiorem Hodsi, et venerunt in Dan silvestria. Circumeuntesque juxta Sidonem,\n7 transierunt prope m\u0153nia Tyri, et omnem terram Hev\u00e6i et Chanan\u00e6i, veneruntque ad meridiem Juda in Bersabee:\n8 et lustrata universa terra, affuerunt post novem menses et viginti dies in Jerusalem.\n9\u00a0Dedit ergo Joab numerum descriptionis populi regi, et inventa sunt de Isra\u00ebl octingenta millia virorum fortium qui educerent gladium, et de Juda quingenta millia pugnatorum.\n \n10 Percussit autem cor David eum, postquam numeratus est populus: et dixit David ad Dominum: Peccavi valde in hoc facto: sed precor, Domine, ut transferas iniquitatem servi tui, quia stulte egi nimis.\n11 Surrexit itaque David mane, et sermo Domini factus est ad Gad prophetam et videntem David, dicens:\n12 Vade, et loquere ad David: H\u00e6c dicit Dominus: Trium tibi datur optio: elige unum quod volueris ex his, ut faciam tibi.\n13 Cumque venisset Gad ad David, nuntiavit ei, dicens: Aut septem annis veniet tibi fames in terra tua: aut tribus mensibus fugies adversarios tuos, et ille te persequentur: aut certe tribus diebus erit pestilentia in terra tua. Nunc ergo delibera, et vide quem respondeam ei qui me misit sermonem.\n14\u00a0Dixit autem David ad Gad: Coarctor nimis: sed melius est ut incidam in manus Domini (mult\u00e6 enim misericordi\u00e6 ejus sunt) quam in manus hominum.\n \n15 Immisitque Dominus pestilentiam in Isra\u00ebl, de mane usque ad tempus constitutum, et mortui sunt ex populo a Dan usque ad Bersabee septuaginta millia virorum.\n16 Cumque extendisset manum suam angelus Domini super Jerusalem ut disperderet eam, misertus est Dominus super afflictione, et ait angelo percutienti populum: Sufficit: nunc contine manum tuam. Erat autem angelus Domini juxta aream Areuna Jebus\u00e6i.\n17\u00a0Dixitque David ad Dominum cum vidisset angelum c\u00e6dentem populum: Ego sum qui peccavi, ego inique egi: isti qui oves sunt, quid fecerunt? vertatur, obsecro, manus tua contra me, et contra domum patris mei.\n \n18 Venit autem Gad ad David in die illa, et dixit ei: Ascende, et constitue altare Domino in area Areuna Jebus\u00e6i.\n19 Et ascendit David juxta sermonem Gad, quem pr\u00e6ceperat ei Dominus.\n20 Conspiciensque Areuna, animadvertit regem et servos ejus transire ad se:\n21 et egressus adoravit regem prono vultu in terram, et ait: Quid caus\u00e6 est ut veniat dominus meus rex ad servum suum? Cui David ait: Ut emam a te aream, et \u00e6dificem altare Domino, et cesset interfectio qu\u00e6 grassatur in populo.\n22 Et ait Areuna ad David: Accipiat, et offerat dominus meus rex sicut placet ei: habes boves in holocaustum, et plaustrum, et juga boum in usum lignorum.\n23 Omnia dedit Areuna rex regi: dixitque Areuna ad regem: Dominus Deus tuus suscipiat votum tuum.\n24 Cui respondens rex, ait: Nequaquam ut vis, sed emam pretio a te, et non offeram Domino Deo meo holocausta gratuita. Emit ergo David aream, et boves, argenti siclis quinquaginta:\n25 et \u00e6dificavit ibi David altare Domino, et obtulit holocausta et pacifica: et propitiatus est Dominus terr\u00e6, et cohibita est plaga ab Isra\u00ebl.","title":"Vulgate: 2 Samuel: 2 Samuel Chapter 24","type":"page"}