{"collection":"Bible & Christianity","html_url":"https://unchartedknowledge.5gfusion.net/browse/bib/vul/sir001.htm","path":"bib/vul/sir001.htm","source_url":"https://sacred-texts.com/bib/vul/sir001.htm","text":"1\u00a0\n et cum illo fuit semper, et est ante \u00e6vum.\n2\u00a0Arenam maris, et pluvi\u00e6 guttas,\n et dies s\u00e6culi, quis dinumeravit?\n altitudinem c\u00e6li, et latitudinem terr\u00e6,\n et profundum abyssi, quis dimensus est?\n3\u00a0sapientiam Dei pr\u00e6cedentem omnia, quis investigavit?\n4\u00a0Prior omnium creata est sapientia,\n et intellectus prudenti\u00e6 ab \u00e6vo.\n5\u00a0Fons sapienti\u00e6 verbum Dei in excelsis,\n et ingressus illius mandata \u00e6terna.\n6\u00a0Radix sapienti\u00e6 cui revelata est?\n et astutias illius quis agnovit?\n7\u00a0disciplina sapienti\u00e6 cui revelata est et manifestata?\n et multiplicationem ingressus illius quis intellexit?\n8\u00a0Unus est altissimus, Creator omnipotens,\n et rex potens et metuendus nimis,\n sedens super thronum illius, et dominans Deus.\n9\u00a0Ipse creavit illam in Spiritu Sancto,\n et vidit, et dinumeravit, et mensus est:\n10\u00a0et effudit illam super omnia opera sua,\n et super omnem carnem, secundum datum suum,\n et pr\u00e6buit illam diligentibus se.]\n \n11\u00a0[Timor Domini gloria, et gloriatio,\n et l\u00e6titia, et corona exsultationis.\n12\u00a0Timor Domini delectabit cor,\n et dabit l\u00e6titiam, et gaudium, et longitudinem dierum.\n13\u00a0Timenti Dominum bene erit in extremis,\n et in die defunctionis su\u00e6 benedicetur.\n14\u00a0Dilectio Dei honorabilis sapientia:\n15\u00a0quibus autem apparuerit in visu diligunt eam in visione,\n et in agnitione magnalium suorum.\n16\u00a0Initium sapienti\u00e6 timor Domini:\n et cum fidelibus in vulva concreatus est:\n cum electis feminis graditur,\n et cum justis et fidelibus agnoscitur.\n17\u00a0Timor Domini scienti\u00e6 religiositas:\n18\u00a0religiositas custodiet et justificabit cor;\n jucunditatem atque gaudium dabit.\n19\u00a0Timenti Dominum bene erit,\n et in diebus consummationis illius benedicetur.\n20\u00a0Plenitudo sapienti\u00e6 est timere Deum,\n et plenitudo a fructibus illius.\n21\u00a0Omnem domum illius implebit a generationibus,\n et receptacula a thesauris illius.\n22\u00a0Corona sapienti\u00e6 timor Domini,\n replens pacem et salutis fructum:\n23\u00a0et vidit, et dinumeravit eam:\n utraque autem sunt dona Dei.\n24\u00a0Scientiam et intellectum prudenti\u00e6 sapientia compartietur,\n et gloriam tenentium se exaltat.\n25\u00a0Radix sapienti\u00e6 est timere Dominum,\n et rami illius long\u00e6vi.\n26\u00a0In thesauris sapienti\u00e6 intellectus et scienti\u00e6 religiositas:\n execratio autem peccatoribus sapientia.\n27\u00a0Timor Domini expellit peccatum:\n28\u00a0nam qui sine timore est non poterit justificari:\n iracundia enim animositatis illius subversio illius est.\n29\u00a0Usque in tempus sustinebit patiens,\n et postea redditio jucunditatis.\n30\u00a0Bonus sensus usque in tempus abscondet verba illius,\n et labia multorum enarrabunt sensum illius.\n31\u00a0In thesauris sapienti\u00e6 significatio disciplin\u00e6:\n32\u00a0execratio autem peccatori cultura Dei.\n33\u00a0Fili, concupiscens sapientiam, conserva justitiam,\n et Deus pr\u00e6bebit illam tibi.\n34\u00a0Sapientia enim et disciplina timor Domini:\n et quod beneplacitum est illi,\n35\u00a0fides et mansuetudo,\n et adimplebit thesauros illius.\n36\u00a0Ne sis incredibilis timori Domini,\n et ne accesseris ad illum duplici corde.\n37\u00a0Ne fueris hypocrita in conspectu hominum,\n et non scandalizeris in labiis tuis.\n38\u00a0Attende in illis, ne forte cadas,\n et adducas anim\u00e6 tu\u00e6 inhonorationem:\n39\u00a0et revelet Deus absconsa tua,\n et in medio synagog\u00e6 elidat te:\n40\u00a0quoniam accessisti maligne ad Dominum,\n et cor tuum plenum est dolo et fallacia.]","title":"Vulgate: Sirach: Sirach Chapter 1","type":"page"}