{"collection":"Bible & Christianity","html_url":"https://unchartedknowledge.5gfusion.net/browse/bib/vul/sir002.htm","path":"bib/vul/sir002.htm","source_url":"https://sacred-texts.com/bib/vul/sir002.htm","text":"1\u00a0[Fili, accedens ad servitutem Dei\n sta in justitia et timore,\n et pr\u00e6para animam tuam ad tentationem.\n2\u00a0Deprime cor tuum, et sustine:\n inclina aurem tuam, et suscipe verba intellectus:\n et ne festines in tempore obductionis.\n3\u00a0Sustine sustentationes Dei:\n conjungere Deo, et sustine,\n ut crescat in novissimo vita tua.\n4\u00a0Omne quod tibi applicitum fuerit accipe:\n et in dolore sustine,\n et in humilitate tua patientiam habe:\n5\u00a0quoniam in igne probatur aurum et argentum,\n homines vero receptibiles in camino humiliationis.\n6\u00a0Crede Deo, et recuperabit te:\n et dirige viam tuam, et spera in illum:\n serva timorem illius, et in illo veterasce.]\n \n7\u00a0[Metuentes Dominum, sustinete misericordiam ejus:\n et non deflectatis ab illo, ne cadatis.\n8\u00a0Qui timetis Dominum, credite illi,\n et non evacuabitur merces vestra.\n9\u00a0Qui timetis Dominum, sperate in illum,\n et in oblectationem veniet vobis misericordia.\n10\u00a0Qui timetis Dominum, diligite illum,\n et illuminabuntur corda vestra.\n11\u00a0Respicite, filii, nationes hominum:\n et scitote quia nullus speravit in Domino et confusus est.\n12\u00a0Quis enim permansit in mandatis ejus, et derelictus est?\n aut quis invocavit eum, et despexit illum?\n13\u00a0Quoniam pius et misericors est Deus,\n et remittet in die tribulationis peccata,\n et protector est omnibus exquirentibus se in veritate.]\n \n14\u00a0[V\u00e6 duplici corde, et labiis scelestis,\n et manibus malefacientibus,\n et peccatori terram ingredienti duabus viis!\n15\u00a0V\u00e6 dissolutis corde, qui non credunt Deo,\n et ideo non protegentur ab eo!\n16\u00a0V\u00e6 his qui perdiderunt sustinentiam,\n et qui dereliquerunt vias rectas,\n et diverterunt in vias pravas!\n17\u00a0Et quid facient cum inspicere c\u0153perit Dominus?\n18\u00a0Qui timent Dominum non erunt incredibiles verbo illius:\n et qui diligunt illum conservabunt viam illius.\n19\u00a0Qui timent Dominum inquirent qu\u00e6 beneplacita sunt ei,\n et qui diligunt eum replebuntur lege ipsius.\n20\u00a0Qui timent Dominum pr\u00e6parabunt corda sua,\n et in conspectu illius sanctificabunt animas suas.\n21\u00a0Qui timent Dominum custodiunt mandata illius,\n et patientiam habebunt usque ad inspectionem illius,\n22\u00a0dicentes: Si p\u0153nitentiam non egerimus,\n incidemus in manus Domini, et non in manus hominum.\n23\u00a0Secundum enim magnitudinem ipsius,\n sic et misericordia illius cum ipso est.]","title":"Vulgate: Sirach: Sirach Chapter 2","type":"page"}