{"collection":"Bible & Christianity","html_url":"https://unchartedknowledge.5gfusion.net/browse/bib/vul/sir004.htm","path":"bib/vul/sir004.htm","source_url":"https://sacred-texts.com/bib/vul/sir004.htm","text":"1\u00a0[Fili, eleemosynam pauperis ne defraudes,\n et oculos tuos ne transvertas a paupere.\n2\u00a0Animam esurientem ne despexeris,\n et non exasperes pauperem in inopia sua.\n3\u00a0Cor inopis ne afflixeris,\n et non protrahas datum angustianti.\n4\u00a0Rogationem contribulati ne abjicias,\n et non avertas faciem tuam ab egeno.\n5\u00a0Ab inope ne avertas oculos tuos propter iram:\n et non relinquas qu\u00e6rentibus tibi retro maledicere.\n6\u00a0Maledicentis enim tibi in amaritudine anim\u00e6,\n exaudietur deprecatio illius:\n exaudiet autem eum qui fecit illum.\n7\u00a0Congregationi pauperum affabilem te facito:\n et presbytero humilia animam tuam,\n et magnato humilia caput tuum.\n8\u00a0Declina pauperi sine tristitia aurem tuam,\n et redde debitum tuum,\n et responde illi pacifica in mansuetudine.\n9\u00a0Libera eum qui injuriam patitur de manu superbi,\n et non acide feras in anima tua.\n10\u00a0In judicando esto pupillis misericors ut pater,\n et pro viro matri illorum:\n11\u00a0et eris tu velut filius Altissimi obediens,\n et miserebitur tui magis quam mater.]\n \n12\u00a0[Sapientia filiis suis vitam inspirat:\n et suscipit inquirentes se,\n et pr\u00e6ibit in via justiti\u00e6.\n13\u00a0Et qui illam diligit, diligit vitam,\n et qui vigilaverint ad illam complectentur placorem ejus.\n14\u00a0Qui tenuerint illam, vitam h\u00e6reditabunt:\n et quo introibit benedicet Deus.\n15\u00a0Qui serviunt ei obsequentes erunt sancto:\n et eos qui diligunt illam, diligit Deus.\n16\u00a0Qui audit illam judicabit gentes:\n et qui intuetur illam permanebit confidens.\n17\u00a0Si crediderit ei, h\u00e6reditabit illam,\n et erunt in confirmatione creatur\u00e6 illius:\n18\u00a0quoniam in tentatione ambulat cum eo,\n et in primis eligit eum.\n19\u00a0Timorem, et metum, et probationem inducet super illum:\n et cruciabit illum in tribulatione doctrin\u00e6 su\u00e6,\n donec tentet eum in cogitationibus suis,\n et credat anim\u00e6 illius.\n20\u00a0Et firmabit illum, et iter adducet directum ad illum,\n et l\u00e6tificabit illum:\n21\u00a0et denudabit absconsa sua illi,\n et thesaurizabit super illum scientiam et intellectum justiti\u00e6.\n22\u00a0Si autem oberraverit, derelinquet eum,\n et tradet eum in manus inimici sui.]\n \n23\u00a0[Fili, conserva tempus,\n et devita a malo.\n24\u00a0Pro anima tua ne confundaris dicere verum:\n25\u00a0est enim confusio adducens peccatum,\n et est confusio adducens gloriam et gratiam.\n26\u00a0Ne accipias faciem adversus faciem tuam,\n nec adversus animam tuam mendacium.\n27\u00a0Ne reverearis proximum tuum in casu suo,\n28\u00a0nec retineas verbum in tempore salutis.\n Non abscondas sapientiam tuam in decore suo:\n29\u00a0in lingua enim sapientia dignoscitur:\n et sensus, et scientia, et doctrina in verbo sensati,\n et firmamentum in operibus justiti\u00e6.\n30\u00a0Non contradicas verbo veritatis ullo modo,\n et de mendacio ineruditionis tu\u00e6 confundere.\n31\u00a0Non confundaris confiteri peccata tua,\n et ne subjicias te omni homini pro peccato.\n32\u00a0Noli resistere contra faciem potentis,\n nec coneris contra ictum fluvii.\n33\u00a0Pro justitia agonizare pro anima tua,\n et usque ad mortem certa pro justitia:\n et Deus expugnabit pro te inimicos tuos.\n34\u00a0Noli citatus esse in lingua tua,\n et inutilis, et remissus in operibus tuis.\n35\u00a0Noli esse sicut leo in domo tua,\n evertens domesticos tuos, et opprimens subjectos tibi.\n36\u00a0Non sit porrecta manus tua ad accipiendum,\n et ad dandum collecta.]","title":"Vulgate: Sirach: Sirach Chapter 4","type":"page"}