{"collection":"Bible & Christianity","html_url":"https://unchartedknowledge.5gfusion.net/browse/bib/vul/sir006.htm","path":"bib/vul/sir006.htm","source_url":"https://sacred-texts.com/bib/vul/sir006.htm","text":"1\u00a0[Noli fieri pro amico inimicus proximo:\n improperium enim et contumeliam malus h\u00e6reditabit:\n et omnis peccator invidus et bilinguis.]\n \n2\u00a0[Non te extollas in cogitatione anim\u00e6 tu\u00e6 velut taurus,\n ne forte elidatur virtus tua per stultitiam:\n3\u00a0et folia tua comedat, et fructus tuos perdat,\n et relinquaris velut lignum aridum in eremo.\n4\u00a0Anima enim nequam disperdet qui se habet,\n et in gaudium inimicis dat illum,\n et deducet in sortem impiorum.]\n \n5\u00a0[Verbum dulce multiplicat amicos et mitigat inimicos,\n et lingua eucharis in bono homine abundat.\n6\u00a0Multi pacifici sint tibi:\n et consiliarius sit tibi unus de mille.\n7\u00a0Si possides amicum, in tentatione posside eum,\n et ne facile credas ei.\n8\u00a0Est enim amicus secundum tempus suum,\n et non permanebit in die tribulationis.\n9\u00a0Et est amicus qui convertitur ad inimicitiam,\n et est amicus qui odium et rixam et convitia denudabit.\n10\u00a0Est autem amicus socius mens\u00e6,\n et non permanebit in die necessitatis.\n11\u00a0Amicus si permanserit fixus, erit tibi quasi co\u00e6qualis,\n et in domesticis tuis fiducialiter aget.\n12\u00a0Si humiliaverit se contra te,\n et a facie tua absconderit se,\n unanimem habebis amicitiam bonam.\n13\u00a0Ab inimicis tuis separare,\n et ab amicis tuis attende.\n14\u00a0Amicus fidelis protectio fortis:\n qui autem invenit illum, invenit thesaurum.\n15\u00a0Amico fideli nulla est comparatio,\n et non est digna ponderatio auri et argenti contra bonitatem fidei illius.\n16\u00a0Amicus fidelis medicamentum vit\u00e6 et immortalitatis:\n et qui metuunt Dominum, invenient illum.\n17\u00a0Qui timet Deum \u00e6que habebit amicitiam bonam,\n quoniam secundum illum erit amicus illius.]\n \n18\u00a0[Fili, a juventute tua excipe doctrinam,\n et usque ad canos invenies sapientiam.\n19\u00a0Quasi is qui arat et seminat accede ad eam,\n et sustine bonos fructus illius.\n20\u00a0In opere enim ipsius exiguum laborabis,\n et cito edes de generationibus illius.\n21\u00a0Quam aspera est nimium sapientia indoctis hominibus!\n et non permanebit in illa excors.\n22\u00a0Quasi lapidis virtus probatio erit in illis:\n et non demorabuntur projicere illam.\n23\u00a0Sapientia enim doctrin\u00e6 secundum nomen est ejus,\n et non est multis manifestata:\n quibus autem cognita est,\n permanet usque ad conspectum Dei.\n24\u00a0Audi, fili, et accipe consilium intellectus,\n et ne abjicias consilium meum.\n25\u00a0Injice pedem tuum in compedes illius,\n et in torques illius collum tuum.\n26\u00a0Subjice humerum tuum, et porta illam,\n et ne acedieris vinculis ejus.\n27\u00a0In omni animo tuo accede ad illam,\n et in omni virtute tua conserva vias ejus.\n28\u00a0Investiga illam, et manifestabitur tibi:\n et continens factus, ne derelinquas eam:\n29\u00a0in novissimis enim invenies requiem in ea,\n et convertetur tibi in oblectationem.\n30\u00a0Et erunt tibi compedes ejus in protectionem fortitudinis et bases virtutis,\n et torques illius in stolam glori\u00e6:\n31\u00a0decor enim vit\u00e6 est in illa,\n et vincula illius alligatura salutaris.\n32\u00a0Stolam glori\u00e6 indues eam,\n et coronam gratulationis superpones tibi.\n33\u00a0Fili, si attenderis mihi, disces:\n et si accommodaveris animum tuum, sapiens eris.\n34\u00a0Si inclinaveris aurem tuam, excipies doctrinam:\n et si dilexeris audire, sapiens eris.\n35\u00a0In multitudine presbyterorum prudentium sta,\n et sapienti\u00e6 illorum ex corde conjungere,\n ut omnem narrationem Dei possis audire,\n et proverbia laudis non effugiant a te.\n36\u00a0Et si videris sensatum, evigila ad eum,\n et gradus ostiorum illius exterat pes tuus.\n37\u00a0Cogitatum tuum habe in pr\u00e6ceptis Dei,\n et in mandatis illius maxime assiduus esto:\n et ipse dabit tibi cor,\n et concupiscentia sapienti\u00e6 dabitur tibi.]","title":"Vulgate: Sirach: Sirach Chapter 6","type":"page"}