{"collection":"Bible & Christianity","html_url":"https://unchartedknowledge.5gfusion.net/browse/bib/vul/sir007.htm","path":"bib/vul/sir007.htm","source_url":"https://sacred-texts.com/bib/vul/sir007.htm","text":"1\u00a0[Noli facere mala, et non te apprehendent:\n2\u00a0discede ab iniquo, et deficient mala abs te.\n3\u00a0Fili, non semines mala in sulcis injustiti\u00e6,\n et non metes ea in septuplum.\n4\u00a0Noli qu\u00e6rere a Domino ducatum,\n neque a rege cathedram honoris.\n5\u00a0Non te justifices ante Deum,\n quoniam agnitor cordis ipse est:\n et penes regem noli velle videri sapiens.\n6\u00a0Noli qu\u00e6rere fieri judex,\n nisi valeas virtute irrumpere iniquitates:\n ne forte extimescas faciem potentis,\n et ponas scandalum in \u00e6quitate tua.\n7\u00a0Non pecces in multitudinem civitatis,\n nec te immittas in populum:\n8\u00a0neque alliges duplicia peccata,\n nec enim in uno eris immunis.\n9\u00a0Noli esse pusillanimis in animo tuo:\n10\u00a0exorare et facere eleemosynam ne despicias.\n11\u00a0Ne dicas: In multitudine munerum meorum respiciet Deus,\n et offerente me Deo altissimo, munera mea suscipiet.\n12\u00a0Non irrideas hominem in amaritudine anim\u00e6:\n est enim qui humiliat et exaltat circumspector Deus.\n13\u00a0Noli amare mendacium adversus fratrem tuum,\n neque in amicum similiter facias.\n14\u00a0Noli velle mentiri omne mendacium:\n assiduitas enim illius non est bona.\n15\u00a0Noli verbosus esse in multitudine presbyterorum,\n et non iteres verbum in oratione tua.\n16\u00a0Non oderis laboriosa opera,\n et rusticationem creatam ab Altissimo.\n17\u00a0Non te reputes in multitudine indisciplinatorum.\n18\u00a0Memento ir\u00e6, quoniam non tardabit.\n19\u00a0Humilia valde spiritum tuum,\n quoniam vindicta carnis impii ignis et vermis.]\n \n20\u00a0[Noli pr\u00e6varicari in amicum pecuniam differentem,\n neque fratrem carissimum auro spreveris.\n21\u00a0Noli discedere a muliere sensata et bona,\n quam sortitus es in timore Domini:\n gratia enim verecundi\u00e6 illius super aurum.\n22\u00a0Non l\u00e6das servum in veritate operantem,\n neque mercenarium dantem animam suam.\n23\u00a0Servus sensatus sit tibi dilectus quasi anima tua:\n non defraudes illum libertate,\n neque inopem derelinquas illum.\n24\u00a0Pecora tibi sunt, attende illis:\n et si sunt utilia, perseverent apud te.\n25\u00a0Filii tibi sunt? erudi illos,\n et curva illos a pueritia illorum.\n26\u00a0Fili\u00e6 tibi sunt? serva corpus illarum,\n et non ostendas hilarem faciem tuam ad illas.\n27\u00a0Trade filiam, et grande opus feceris:\n et homini sensato da illam.\n28\u00a0Mulier si est tibi secundum animam tuam, non projicias illam:\n et odibili non credas te.\n In toto corde tuo\n29\u00a0honora patrem tuum,\n et gemitus matris tu\u00e6 ne obliviscaris:\n30\u00a0memento quoniam nisi per illos natus non fuisses:\n et retribue illis, quomodo et illi tibi.]\n \n31\u00a0[In tota anima tua time Dominum,\n et sacerdotes illius sanctifica.\n32\u00a0In omni virtute tua dilige eum qui te fecit,\n et ministros ejus ne derelinquas.\n33\u00a0Honora Deum ex tota anima tua,\n et honorifica sacerdotes,\n et propurga te cum brachiis.\n34\u00a0Da illis partem, sicut mandatum est tibi, primitiarum et purgationis,\n et de negligentia tua purga te cum paucis.\n35\u00a0Datum brachiorum tuorum,\n et sacrificium sanctificationis offeres Domino,\n et initia sanctorum.\n36\u00a0Et pauperi porrige manum tuam,\n ut perficiatur propitiatio et benedictio tua.\n37\u00a0Gratia dati in conspectu omnis viventis,\n et mortuo non prohibeas gratiam.\n38\u00a0Non desis plorantibus in consolatione,\n et cum lugentibus ambula.\n39\u00a0Non te pigeat visitare infirmum:\n ex his enim in dilectione firmaberis.\n40\u00a0In omnibus operibus tuis memorare novissima tua,\n et in \u00e6ternum non peccabis.]","title":"Vulgate: Sirach: Sirach Chapter 7","type":"page"}