{"collection":"Bible & Christianity","html_url":"https://unchartedknowledge.5gfusion.net/browse/bib/vul/sir008.htm","path":"bib/vul/sir008.htm","source_url":"https://sacred-texts.com/bib/vul/sir008.htm","text":"1\u00a0[Non litiges cum homine potente,\n ne forte incidas in manus illius.\n2\u00a0Non contendas cum viro locuplete,\n ne forte contra te constituat litem tibi:\n3\u00a0multos enim perdidit aurum et argentum,\n et usque ad cor regum extendit et convertit.\n4\u00a0Non litiges cum homine linguato,\n et non strues in ignem illius ligna.\n5\u00a0Non communices homini indocto,\n ne male de progenie tua loquatur.\n6\u00a0Ne despicias hominem avertentem se a peccato,\n neque improperes ei:\n memento quoniam omnes in correptione sumus.\n7\u00a0Ne spernas hominem in sua senectute,\n etenim ex nobis senescunt.\n8\u00a0Noli de mortuo inimico tuo gaudere:\n sciens quoniam omnes morimur,\n et in gaudium nolumus venire.\n9\u00a0Ne despicias narrationem presbyterorum sapientium,\n et in proverbiis eorum conversare:\n10\u00a0ab ipsis enim disces sapientiam et doctrinam intellectus,\n et servire magnatis sine querela.\n11\u00a0Non te pr\u00e6tereat narratio seniorum,\n ipsi enim didicerunt a patribus suis:\n12\u00a0quoniam ab ipsis disces intellectum,\n et in tempore necessitatis dare responsum.\n13\u00a0Non incendas carbones peccatorum arguens eos,\n et ne incendaris flamma ignis peccatorum illorum.\n14\u00a0Ne contra faciem stes contumeliosi,\n ne sedeat quasi insidiator ori tuo.\n15\u00a0Noli f\u0153nerari homini fortiori te:\n quod si f\u0153neraveris, quasi perditum habe.\n16\u00a0Non spondeas super virtutem tuam:\n quod si spoponderis, quasi restituens cogita.\n17\u00a0Non judices contra judicem,\n quoniam secundum quod justum est judicat.\n18\u00a0Cum audace non eas in via,\n ne forte gravet mala sua in te:\n ipse enim secundum voluntatem suam vadit,\n et simul cum stultitia illius peries.\n19\u00a0Cum iracundo non facias rixam,\n et cum audace non eas in desertum:\n quoniam quasi nihil est ante illum sanguis,\n et ubi non est adjutorium, elidet te.\n20\u00a0Cum fatuis consilium non habeas:\n non enim poterunt diligere nisi qu\u00e6 eis placent.\n21\u00a0Coram extraneo ne facias consilium:\n nescis enim quid pariet.\n22\u00a0Non omni homini cor tuum manifestes,\n ne forte inferat tibi gratiam falsam, et convicietur tibi.]","title":"Vulgate: Sirach: Sirach Chapter 8","type":"page"}