{"collection":"Bible & Christianity","html_url":"https://unchartedknowledge.5gfusion.net/browse/bib/vul/sir009.htm","path":"bib/vul/sir009.htm","source_url":"https://sacred-texts.com/bib/vul/sir009.htm","text":"1\u00a0[Non zeles mulierem sinus tui,\n ne ostendat super te malitiam doctrin\u00e6 nequam.\n2\u00a0Non des mulieri potestatem anim\u00e6 tu\u00e6,\n ne ingrediatur in virtutem tuam, et confundaris.\n3\u00a0Ne respicias mulierem multivolam,\n ne forte incidas in laqueos illius.\n4\u00a0Cum saltatrice ne assiduus sis,\n nec audias illam, ne forte pereas in efficacia illius.\n5\u00a0Virginem ne conspicias,\n ne forte scandalizeris in decore illius.\n6\u00a0Ne des fornicariis animam tuam in ullo,\n ne perdas te et h\u00e6reditatem tuam.\n7\u00a0Noli circumspicere in vicis civitatis,\n nec oberraveris in plateis illius.\n8\u00a0Averte faciem tuam a muliere compta,\n et ne circumspicias speciem alienam.\n9\u00a0Propter speciem mulieris multi perierunt:\n et ex hoc concupiscentia quasi ignis exardescit.\n10\u00a0Omnis mulier qu\u00e6 est fornicaria,\n quasi stercus in via conculcabitur.\n11\u00a0Speciem mulieris alien\u00e6 multi admirati, reprobi facti sunt:\n colloquium enim illius quasi ignis exardescit.\n12\u00a0Cum aliena muliere ne sedeas omnino,\n nec accumbas cum ea super cubitum:\n13\u00a0et non alterceris cum illa in vino,\n ne forte declinet cor tuum in illam,\n et sanguine tuo labaris in perditionem.]\n \n14\u00a0[Ne derelinquas amicum antiquum:\n novus enim non erit similis illi.\n15\u00a0Vinum novum amicus novus:\n veterascet, et cum suavitate bibes illud.\n16\u00a0Non zeles gloriam et opes peccatoris:\n non enim scis qu\u00e6 futura sit illius subversio.\n17\u00a0Non placeat tibi injuria injustorum,\n sciens quoniam usque ad inferos non placebit impius.\n18\u00a0Longe abesto ab homine potestatem habente occidendi,\n et non suspicaberis timorem mortis.\n19\u00a0Et si accesseris ad illum, noli aliquid committere,\n ne forte auferat vitam tuam.\n20\u00a0Communionem mortis scito,\n quoniam in medio laqueorum ingredieris,\n et super dolentium arma ambulabis.\n21\u00a0Secundum virtutem tuam cave te a proximo tuo,\n et cum sapientibus et prudentibus tracta.\n22\u00a0Viri justi sint tibi conviv\u00e6,\n et in timore Dei sit tibi gloriatio:\n23\u00a0et in sensu sit tibi cogitatus Dei,\n et omnis enarratio tua in pr\u00e6ceptis Altissimi.\n24\u00a0In manu artificum opera laudabuntur,\n et princeps populi in sapientia sermonis sui,\n in sensu vero seniorum verbum.\n25\u00a0Terribilis est in civitate sua homo linguosus:\n et temerarius in verbo suo odibilis erit.]","title":"Vulgate: Sirach: Sirach Chapter 9","type":"page"}