{"collection":"Bible & Christianity","html_url":"https://unchartedknowledge.5gfusion.net/browse/bib/vul/sir011.htm","path":"bib/vul/sir011.htm","source_url":"https://sacred-texts.com/bib/vul/sir011.htm","text":"1\u00a0[Sapientia humiliati exaltabit caput illius,\n et in medio magnatorum consedere illum faciet.\n2\u00a0Non laudes virum in specie sua,\n neque spernas hominem in visu suo.\n3\u00a0Brevis in volatilibus est apis,\n et initium dulcoris habet fructus illius.\n4\u00a0In vestitu ne glorieris umquam,\n nec in die honoris tui extollaris:\n quoniam mirabilia opera Altissimi solius,\n et gloriosa, et absconsa, et invisa opera illius.\n5\u00a0Multi tyranni sederunt in throno:\n et insuspicabilis portavit diadema.\n6\u00a0Multi potentes oppressi sunt valide,\n et gloriosi traditi sunt in manus alterorum.\n7\u00a0Priusquam interroges, ne vituperes quemquam:\n et cum interrogaveris, corripe juste.]\n \n8\u00a0[Priusquam audias, ne respondeas verbum:\n et in medio sermonum ne adjicias loqui.\n9\u00a0De ea re qu\u00e6 te non molestat, ne certeris:\n et in judicio peccantium ne consistas.\n10\u00a0Fili, ne in multis sint actus tui:\n et si dives fueris, non eris immunis a delicto.\n Si enim secutus fueris, non apprehendes:\n et non effugies, si pr\u00e6cucurreris.\n11\u00a0Est homo laborans et festinans, et dolens:\n impius, et tanto magis non abundabit.\n12\u00a0Est homo marcidus egens recuperatione,\n plus deficiens virtute, et abundans paupertate:\n13\u00a0et oculus Dei respexit illum in bono,\n et erexit eum ab humilitate ipsius, et exaltavit caput ejus:\n et mirati sunt in illo multi, et honoraverunt Deum.]\n \n14\u00a0[Bona et mala, vita et mors,\n paupertas et honestas, a Deo sunt:\n15\u00a0sapientia, et disciplina, et scientia legis, apud Deum:\n dilectio, et vi\u00e6 bonorum, apud ipsum.\n16\u00a0Error et tenebr\u00e6 peccatoribus concreata sunt:\n qui autem exsultant in malis consenescunt in malo.\n17\u00a0Datio Dei permanet justis,\n et profectus illius successus habebit in \u00e6ternum.\n18\u00a0Est qui locupletatur parce agendo,\n et h\u00e6c est pars mercedis illius.\n19\u00a0In eo quod dicit: Inveni requiem mihi,\n et nunc manducabo de bonis meis solus:\n20\u00a0et nescit quod tempus pr\u00e6teriet, et mors appropinquet,\n et relinquat omnia aliis, et morietur.\n21\u00a0Sta in testamento tuo, et in illo colloquere,\n et in opere mandatorum tuorum veterasce.\n22\u00a0Ne manseris in operibus peccatorum:\n confide autem in Deo, et mane in loco tuo.\n23\u00a0Facile est enim in oculis Dei\n subito honestare pauperem.\n24\u00a0Benedictio Dei in mercedem justi festinat,\n et in hora veloci processus illius fructificat.\n25\u00a0Ne dicas: Quid est mihi opus?\n et qu\u00e6 erunt mihi ex hoc bona?\n26\u00a0Ne dicas: Sufficiens mihi sum:\n et quid ex hoc pessimabor?\n27\u00a0In die bonorum ne immemor sis malorum,\n et in die malorum ne immemor sis bonorum:\n28\u00a0quoniam facile est coram Deo in die obitus\n retribuere unicuique secundum vias suas.\n29\u00a0Malitia hor\u00e6 oblivionem facit luxuri\u00e6 magn\u00e6,\n et in fine hominis denudatio operum illius.\n30\u00a0Ante mortem ne laudes hominem quemquam:\n quoniam in filiis suis agnoscitur vir.]\n \n31\u00a0[Non omnem hominem inducas in domum tuam:\n mult\u00e6 enim sunt insidi\u00e6 dolosi.\n32\u00a0Sicut enim eructant pr\u00e6cordia f\u0153tentium,\n et sicut perdix inducitur in caveam, et ut caprea in laqueum:\n sic et cor superborum,\n et sicut prospector videns casum proximi sui.\n33\u00a0Bona enim in mala convertens insidiatur,\n et in electis imponet maculam.\n34\u00a0A scintilla una augetur ignis,\n et ab uno doloso augetur sanguis:\n homo vero peccator sanguini insidiatur.\n35\u00a0Attende tibi a pestifero, fabricat enim mala,\n ne inducat super te subsannationem in perpetuum.\n36\u00a0Admitte ad te alienigenam:\n et subvertet te in turbine,\n et abalienabit te a tuis propriis.]","title":"Vulgate: Sirach: Sirach Chapter 11","type":"page"}