{"collection":"Bible & Christianity","html_url":"https://unchartedknowledge.5gfusion.net/browse/bib/vul/sir012.htm","path":"bib/vul/sir012.htm","source_url":"https://sacred-texts.com/bib/vul/sir012.htm","text":"1\u00a0[Si benefeceris, scito cui feceris,\n et erit gratia in bonis tuis multa.\n2\u00a0Benefac justo, et invenies retributionem magnam:\n et si non ab ipso, certe a Domino.\n3\u00a0Non est enim ei bene qui assiduus est in malis,\n et eleemosynas non danti:\n quoniam et Altissimus odio habet peccatores,\n et misertus est p\u0153nitentibus.\n4\u00a0Da misericordi, et ne suscipias peccatorem:\n et impiis et peccatoribus reddet vindictam,\n custodiens eos in diem vindict\u00e6.\n5\u00a0Da bono, et non receperis peccatorem.\n6\u00a0Benefac humili, et non dederis impio:\n prohibe panes illi dari, ne in ipsis potentior te sit:\n7\u00a0nam duplicia mala invenies in omnibus bonis qu\u00e6cumque feceris illi,\n quoniam et Altissimus odio habet peccatores,\n et impiis reddet vindictam.]\n \n8\u00a0[Non agnoscetur in bonis amicus,\n et non abscondetur in malis inimicus.\n9\u00a0In bonis viri, inimici illius in tristitia:\n et in malitia illius, amicus agnitus est.\n10\u00a0Non credas inimico tuo in \u00e6ternum:\n sicut enim \u00e6ramentum \u00e6ruginat nequitia illius:\n11\u00a0et si humiliatus vadat curvus,\n adjice animum tuum, et custodi te ab illo.\n12\u00a0Non statuas illum penes te,\n nec sedeat ad dexteram tuam,\n ne forte conversus in locum tuum, inquirat cathedram tuam,\n et in novissimo agnosces verba mea,\n et in sermonibus meis stimuleris.\n13\u00a0Quis miserebitur incantatori a serpente percusso,\n et omnibus qui appropiant bestiis?\n et sic qui comitatur cum viro iniquo,\n et obvolutus est in peccatis ejus.\n14\u00a0Una hora tecum permanebit:\n si autem declinaveris, non supportabit.\n15\u00a0In labiis suis indulcat inimicus,\n et in corde suo insidiatur ut subvertat te in foveam.\n16\u00a0In oculis suis lacrimatur inimicus,\n et si invenerit tempus, non satiabitur sanguine.\n17\u00a0Et si incurrerint tibi mala,\n invenies eum illic priorem.\n18\u00a0In oculis suis lacrimatur inimicus,\n et quasi adjuvans suffodiet plantas tuas.\n19\u00a0Caput suum movebit, et plaudet manu,\n et multa susurrans commutabit vultum suum.]","title":"Vulgate: Sirach: Sirach Chapter 12","type":"page"}