{"collection":"Bible & Christianity","html_url":"https://unchartedknowledge.5gfusion.net/browse/bib/vul/sir014.htm","path":"bib/vul/sir014.htm","source_url":"https://sacred-texts.com/bib/vul/sir014.htm","text":"1\u00a0[Beatus vir qui non est lapsus verbo ex ore suo,\n et non est stimulatus in tristitia delicti.\n2\u00a0Felix qui non habuit animi sui tristitiam,\n et non excidit a spe sua.\n3\u00a0Viro cupido et tenaci sine ratione est substantia:\n et homini livido ad quid aurum?\n4\u00a0Qui acervat ex animo suo injuste, aliis congregat,\n et in bonis illius alius luxuriabitur.\n5\u00a0Qui sibi nequam est, cui alii bonus erit?\n et non jucundabitur in bonis suis.\n6\u00a0Qui sibi invidet, nihil est illo nequius:\n et h\u00e6c redditio est maliti\u00e6 illius.\n7\u00a0Et si bene fecerit, ignoranter et non volens facit:\n et in novissimo manifestat malitiam suam.\n8\u00a0Nequam est oculus lividi:\n et avertens faciem suam, et despiciens animam suam.\n9\u00a0Insatiabilis oculus cupidi in parte iniquitatis:\n non satiabitur donec consumat arefaciens animam suam.\n10\u00a0Oculus malus ad mala, et non saturabitur pane,\n sed indigens et in tristitia erit super mensam suam.\n11\u00a0Fili, si habes, benefac tecum,\n et Deo dignas oblationes offer.\n12\u00a0Memor esto quoniam mors non tardat,\n et testamentum inferorum, quia demonstratum est tibi:\n testamentum enim hujus mundi morte morietur.\n13\u00a0Ante mortem benefac amico tuo,\n et secundum vires tuas exporrigens da pauperi.\n14\u00a0Non defrauderis a die bono,\n et particula boni doni non te pr\u00e6tereat.\n15\u00a0Nonne aliis relinques dolores et labores tuos\n in divisione sortis?\n16\u00a0Da et accipe,\n et justifica animam tuam.\n17\u00a0Ante obitum tuum operare justitiam,\n quoniam non est apud inferos invenire cibum.\n18\u00a0Omnis caro sicut f\u0153num veterascet,\n et sicut folium fructificans in arbore viridi.\n19\u00a0Alia generantur, et alia dejiciuntur:\n sic generatio carnis et sanguinis, alia finitur, et alia nascitur.\n20\u00a0Omne opus corruptibile in fine deficiet,\n et qui illud operatur ibit cum illo.\n21\u00a0Et omne opus electum justificabitur,\n et qui operatur illud honorabitur in illo.]\n \n22\u00a0[Beatus vir qui in sapientia morabitur,\n et qui in justitia sua meditabitur,\n et in sensu cogitabit circumspectionem Dei:\n23\u00a0qui excogitat vias illius in corde suo,\n et in absconditis suis intelligens,\n vadens post illam quasi investigator,\n et in viis illius consistens:\n24\u00a0qui respicit per fenestras illius,\n et in januis illius audiens:\n25\u00a0qui requiescit juxta domum illius,\n et in parietibus illius figens palum,\n statuet casulam suam ad manus illius,\n et requiescent in casula illius bona per \u00e6vum.\n26\u00a0Statuet filios suos sub tegmine illius,\n et sub ramis ejus morabitur.\n27\u00a0Protegetur sub tegmine illius a fervore,\n et in gloria ejus requiescet.]","title":"Vulgate: Sirach: Sirach Chapter 14","type":"page"}