{"collection":"Bible & Christianity","html_url":"https://unchartedknowledge.5gfusion.net/browse/bib/vul/sir015.htm","path":"bib/vul/sir015.htm","source_url":"https://sacred-texts.com/bib/vul/sir015.htm","text":"1\u00a0[Qui timet Deum faciet bona,\n et qui continens est justiti\u00e6 apprehendet illam:\n2\u00a0et obviabit illi quasi mater honorificata,\n et quasi mulier a virginitate suscipiet illum.\n3\u00a0Cibabit illum pane vit\u00e6 et intellectus,\n et aqua sapienti\u00e6 salutaris potabit illum:\n et firmabitur in illo, et non flectetur:\n4\u00a0et continebit illum, et non confundetur:\n et exaltabit illum apud proximos suos,\n5\u00a0et in medio ecclesi\u00e6 aperiet os ejus,\n et adimplebit illum spiritu sapienti\u00e6 et intellectus,\n et stola glori\u00e6 vestiet illum.\n6\u00a0Jucunditatem et exsultationem thesaurizabit super illum,\n et nomine \u00e6terno h\u00e6reditabit illum.\n7\u00a0Homines stulti non apprehendent illam,\n et homines sensati obviabunt illi.\n Homines stulti non videbunt eam:\n longe enim abest a superbia et dolo.\n8\u00a0Viri mendaces non erunt illius memores:\n et viri veraces invenientur in illa,\n et successum habebunt usque ad inspectionem Dei.\n9\u00a0Non est speciosa laus in ore peccatoris,\n10\u00a0quoniam a Deo profecta est sapientia.\n Sapienti\u00e6 enim Dei astabit laus,\n et in ore fideli abundabit,\n et Dominator dabit eam illi.]\n \n11\u00a0[Non dixeris: Per Deum abest:\n qu\u00e6 enim odit ne feceris.\n12\u00a0Non dicas: Ille me implanavit:\n non enim necessarii sunt ei homines impii.\n13\u00a0Omne execramentum erroris odit Dominus,\n et non erit amabile timentibus eum.\n14\u00a0Deus ab initio constituit hominem,\n et reliquit illum in manu consilii sui:\n15\u00a0adjecit mandata et pr\u00e6cepta sua.\n16\u00a0Si volueris mandata servare, conservabunt te,\n et in perpetuum fidem placitam facere.\n17\u00a0Apposuit tibi aquam et ignem,\n ad quod volueris porrige manum tuam.\n18\u00a0Ante hominem vita et mors, bonum et malum:\n quod placuerit ei dabitur illi:\n19\u00a0quoniam multa sapientia Dei, et fortis in potentia,\n videns omnes sine intermissione.\n20\u00a0Oculi Domini ad timentes eum,\n et ipse agnoscit omnem operam hominis.\n21\u00a0Nemini mandavit impie agere,\n et nemini dedit spatium peccandi:\n22\u00a0non enim concupiscit multitudinem\n filiorum infidelium et inutilium.]","title":"Vulgate: Sirach: Sirach Chapter 15","type":"page"}