{"collection":"Bible & Christianity","html_url":"https://unchartedknowledge.5gfusion.net/browse/bib/vul/sir017.htm","path":"bib/vul/sir017.htm","source_url":"https://sacred-texts.com/bib/vul/sir017.htm","text":"1\u00a0[Deus creavit de terra hominem,\n et secundum imaginem suam fecit illum:\n2\u00a0et iterum convertit illum in ipsam,\n et secundum se vestivit illum virtute.\n3\u00a0Numerum dierum et tempus dedit illi,\n et dedit illi potestatem eorum qu\u00e6 sunt super terram.\n4\u00a0Posuit timorem illius super omnem carnem,\n et dominatus est bestiarum et volatilium.\n5\u00a0Creavit ex ipso adjutorium simile sibi:\n consilium, et linguam, et oculos, et aures,\n et cor dedit illis excogitandi,\n et disciplina intellectus replevit illos.\n6\u00a0Creavit illis scientiam spiritus,\n sensu implevit cor illorum,\n et mala et bona ostendit illis.\n7\u00a0Posuit oculum suum super corda illorum,\n ostendere illis magnalia operum suorum:\n8\u00a0ut nomen sanctificationis collaudent,\n et gloriari in mirabilibus illius;\n ut magnalia enarrent operum ejus.\n9\u00a0Addidit illis disciplinam,\n et legem vit\u00e6 h\u00e6reditavit illos.\n10\u00a0Testamentum \u00e6ternum constituit cum illis,\n et justitiam et judicia sua ostendit illis.\n11\u00a0Et magnalia honoris ejus vidit oculus illorum,\n et honorem vocis audierunt aures illorum.\n Et dixit illis: Attendite ab omni iniquo.\n12\u00a0Et mandavit illis unicuique de proximo suo.\n13\u00a0Vi\u00e6 illorum coram ipso sunt semper:\n non sunt abscons\u00e6 ab oculis ipsius.\n14\u00a0In unamquamque gentem pr\u00e6posuit rectorem:\n15\u00a0et pars Dei Isra\u00ebl facta est manifesta.\n16\u00a0Et omnia opera illorum velut sol in conspectu Dei:\n et oculi ejus sine intermissione inspicientes in viis eorum.\n17\u00a0Non sunt absconsa testamenta per iniquitatem illorum,\n et omnes iniquitates eorum in conspectu Dei.\n18\u00a0Eleemosyna viri quasi signaculum cum ipso,\n et gratiam hominis quasi pupillam conservabit.\n19\u00a0Et postea resurget,\n et retribuet illis retributionem, unicuique in caput ipsorum,\n et convertet in interiores partes terr\u00e6.\n20\u00a0P\u0153nitentibus autem dedit viam justiti\u00e6,\n et confirmavit deficientes sustinere,\n et destinavit illis sortem veritatis.]\n \n21\u00a0[Convertere ad Dominum, et relinque peccata tua:\n22\u00a0precare ante faciem Domini, et minue offendicula.\n23\u00a0Revertere ad Dominum, et avertere ab injustitia tua,\n et nimis odito execrationem:\n24\u00a0et cognosce justitias et judicia Dei,\n et sta in sorte propositionis, et orationis altissimi Dei.\n25\u00a0In partes vade s\u00e6culi sancti,\n cum vivis et dantibus confessionem Deo.\n26\u00a0Non demoreris in errore impiorum:\n ante mortem confitere:\n a mortuo, quasi nihil, perit confessio.\n27\u00a0Confiteberis vivens,\n vivus et sanus confiteberis:\n et laudabis Deum,\n et gloriaberis in miserationibus illius.\n28\u00a0Quam magna misericordia Domini,\n et propitiatio illius convertentibus ad se!\n29\u00a0Nec enim omnia possunt esse in hominibus,\n quoniam non est immortalis filius hominis,\n et in vanitate maliti\u00e6 placuerunt.\n30\u00a0Quid lucidius sole?\n et hic deficiet;\n aut quid nequius quam quod excogitavit caro et sanguis?\n et hoc arguetur.\n31\u00a0Virtutem altitudinis c\u00e6li ipse conspicit:\n et omnes homines terra et cinis.]","title":"Vulgate: Sirach: Sirach Chapter 17","type":"page"}