{"collection":"Bible & Christianity","html_url":"https://unchartedknowledge.5gfusion.net/browse/bib/vul/sir019.htm","path":"bib/vul/sir019.htm","source_url":"https://sacred-texts.com/bib/vul/sir019.htm","text":"1\u00a0[Operarius ebriosus non locupletabitur:\n et qui spernit modica paulatim decidet.\n2\u00a0Vinum et mulieres apostatare faciunt sapientes,\n et arguent sensatos.\n3\u00a0Et qui se jungit fornicariis erit nequam:\n putredo et vermes h\u00e6reditabunt illum:\n et extolletur in exemplum majus,\n et tolletur de numero anima ejus.]\n \n4\u00a0[Qui credit cito levis corde est, et minorabitur:\n et qui delinquit in animam suam, insuper habebitur.\n5\u00a0Qui gaudet iniquitate, denotabitur:\n et qui odit correptionem, minuetur vita:\n et qui odit loquacitatem, extinguit malitiam.\n6\u00a0Qui peccat in animam suam, p\u0153nitebit:\n et qui jucundatur in malitia, denotabitur.\n7\u00a0Ne iteres verbum nequam et durum,\n et non minoraberis.\n8\u00a0Amico et inimico noli narrare sensum tuum:\n et si est tibi delictum, noli denudare:\n9\u00a0audiet enim te, et custodiet te,\n et quasi defendens peccatum, odiet te,\n et sic aderit tibi semper.\n10\u00a0Audisti verbum adversus proximum tuum?\n commoriatur in te, fidens quoniam non te dirumpet.\n11\u00a0A facie verbi parturit fatuus,\n tamquam gemitus partus infantis.\n12\u00a0Sagitta infixa femori carnis,\n sic verbum in corde stulti.\n13\u00a0Corripe amicum,\n ne forte non intellexerit, et dicat: Non feci:\n aut, si fecerit, ne iterum addat facere.\n14\u00a0Corripe proximum, ne forte non dixerit:\n et si dixerit, ne forte iteret.\n15\u00a0Corripe amicum, s\u00e6pe enim fit commissio:\n16\u00a0et non omni verbo credas.\n Est qui labitur lingua, sed non ex animo:\n17\u00a0quis est enim qui non deliquerit in lingua sua?]\n [Corripe proximum antequam commineris,\n18\u00a0et da locum timori Altissimi:\n quia omnis sapientia timor Dei, et in illa timere Deum,\n et in omni sapientia dispositio legis.\n19\u00a0Et non est sapientia nequiti\u00e6 disciplina,\n et non est cogitatus peccatorum prudentia.\n20\u00a0Est nequitia, et in ipsa execratio,\n et est insipiens qui minuitur sapientia.\n21\u00a0Melior est homo qui minuitur sapientia,\n et deficiens sensu, in timore,\n quam qui abundat sensu,\n et transgreditur legem Altissimi.\n22\u00a0Est solertia certa, et ipsa iniqua:\n23\u00a0et est qui emittit verbum certum enarrans veritatem.\n Est qui nequiter humiliat se,\n et interiora ejus plena sunt dolo:\n24\u00a0et est qui se nimium submittit a multa humilitate:\n et est qui inclinat faciem suam,\n et fingit se non videre quod ignoratum est:\n25\u00a0et si ab imbecillitate virium vetetur peccare,\n si invenerit tempus malefaciendi, malefaciet.\n26\u00a0Ex visu cognoscitur vir,\n et ab occursu faciei cognoscitur sensatus.\n27\u00a0Amictus corporis, et risus dentium,\n et ingressus hominis, enuntiant de illo.\n28\u00a0Est correptio mendax in ira contumeliosi,\n et est judicium quod non probatur esse bonum:\n et est tacens, et ipse est prudens.]","title":"Vulgate: Sirach: Sirach Chapter 19","type":"page"}