{"collection":"Bible & Christianity","html_url":"https://unchartedknowledge.5gfusion.net/browse/bib/vul/sir021.htm","path":"bib/vul/sir021.htm","source_url":"https://sacred-texts.com/bib/vul/sir021.htm","text":"1\u00a0[Fili, peccasti, non adjicias iterum:\n sed et de pristinis deprecare, ut tibi dimittantur.\n2\u00a0Quasi a facie colubri fuge peccata:\n et si accesseris ad illa, suscipient te.\n3\u00a0Dentes leonis dentes ejus,\n interficientes animas hominum.\n4\u00a0Quasi rhomph\u00e6a bis acuta omnis iniquitas:\n plag\u00e6 illius non est sanitas.\n5\u00a0Objurgatio et injuri\u00e6 annullabunt substantiam,\n et domus qu\u00e6 nimis locuples est annullabitur superbia:\n sic substantia superbi eradicabitur.\n6\u00a0Deprecatio pauperis ex ore usque ad aures ejus perveniet,\n et judicium festinato adveniet illi.\n7\u00a0Qui odit correptionem vestigium est peccatoris,\n et qui timet Deum convertetur ad cor suum.\n8\u00a0Notus a longe potens lingua audaci,\n et sensatus scit labi se ab ipso.\n9\u00a0Qui \u00e6dificat domum suam impendiis alienis,\n quasi qui colligat lapides suos in hieme.\n10\u00a0Stupa collecta synagoga peccantium,\n et consummatio illorum flamma ignis.\n11\u00a0Via peccatorum complanata lapidibus:\n et in fine illorum inferi, et tenebr\u00e6, et p\u0153n\u00e6.]\n \n12\u00a0[Qui custodit justitiam, continebit sensum ejus.\n13\u00a0Consummatio timoris Dei, sapientia et sensus.\n14\u00a0Non erudietur\n qui non est sapiens in bono.\n15\u00a0Est autem sapientia qu\u00e6 abundat in malo,\n et non est sensus ubi est amaritudo.\n16\u00a0Scientia sapientis tamquam inundatio abundabit,\n et consilium illius sicut fons vit\u00e6 permanet.\n17\u00a0Cor fatui quasi vas confractum,\n et omnem sapientiam non tenebit.\n18\u00a0Verbum sapiens quodcumque audierit scius,\n laudabit, et ad se adjiciet:\n audivit luxuriosus, et displicebit illi,\n et projiciet illud post dorsum suum.\n19\u00a0Narratio fatui quasi sarcina in via:\n nam in labiis sensati invenietur gratia.\n20\u00a0Os prudentis qu\u00e6ritur in ecclesia,\n et verba illius cogitabunt in cordibus suis.\n21\u00a0Tamquam domus exterminata, sic fatuo sapientia:\n et scientia insensati inenarrabilia verba.\n22\u00a0Compedes in pedibus, stulto doctrina:\n et quasi vincula manuum super manum dextram.\n23\u00a0Fatuus in risu exaltat vocem suam:\n vir autem sapiens vix tacite ridebit.\n24\u00a0Ornamentum aureum prudenti doctrina,\n et quasi brachiale in brachio dextro.\n25\u00a0Pes fatui facilis in domum proximi:\n et homo peritus confundetur a persona potentis.\n26\u00a0Stultus a fenestra respiciet in domum:\n vir autem eruditus foris stabit.\n27\u00a0Stultitia hominis auscultare per ostium:\n et prudens gravabitur contumelia.\n28\u00a0Labia imprudentium stulta narrabunt;\n verba autem prudentium statera ponderabuntur.\n29\u00a0In ore fatuorum cor illorum,\n et in corde sapientium os illorum.\n30\u00a0Dum maledicit impius diabolum,\n maledicit ipse animam suam.\n31\u00a0Susurro coinquinabit animam suam, et in omnibus odietur,\n et qui cum eo manserit odiosus erit:\n tacitus et sensatus honorabitur.]","title":"Vulgate: Sirach: Sirach Chapter 21","type":"page"}