{"collection":"Bible & Christianity","html_url":"https://unchartedknowledge.5gfusion.net/browse/bib/vul/sir022.htm","path":"bib/vul/sir022.htm","source_url":"https://sacred-texts.com/bib/vul/sir022.htm","text":"1\u00a0[In lapide luteo lapidatus est piger:\n et omnes loquentur super aspernationem illius.\n2\u00a0De stercore boum lapidatus est piger:\n et omnis qui tetigerit eum excutiet manus.]\n \n3\u00a0[Confusio patris est de filio indisciplinato:\n filia autem in deminoratione fiet.\n4\u00a0Filia prudens h\u00e6reditas viro suo:\n nam qu\u00e6 confundit, in contumeliam fit genitoris.\n5\u00a0Patrem et virum confundit audax,\n et ab impiis non minorabitur:\n ab utrisque autem inhonorabitur.\n6\u00a0Musica in luctu importuna narratio:\n flagella et doctrina in omni tempore sapientia.]\n \n7\u00a0[Qui docet fatuum,\n quasi qui conglutinat testam.\n8\u00a0Qui narrat verbum non audienti,\n quasi qui excitat dormientem de gravi somno.\n9\u00a0Cum dormiente loquitur qui enarrat stulto sapientiam:\n et in fine narrationis dicit: Quis est hic?\n10\u00a0Supra mortuum plora, defecit enim lux ejus:\n et supra fatuum plora, defecit enim sensus.\n11\u00a0Modicum plora super mortuum, quoniam requievit:\n12\u00a0nequissimi enim nequissima vita super mortem fatui.\n13\u00a0Luctus mortui septem dies:\n fatui autem et impii omnes dies vit\u00e6 illorum.\n14\u00a0Cum stulto ne multum loquaris,\n et cum insensato ne abieris.\n15\u00a0Serva te ab illo, ut non molestiam habeas,\n et non coinquinaberis peccato illius.\n16\u00a0Deflecte ab illo, et invenies requiem,\n et non acediaberis in stultitia illius.\n17\u00a0Super plumbum quid gravabitur?\n et quod illi aliud nomen quam fatuus?\n18\u00a0Arenam, et salem, et massam ferri facilius est ferre\n quam hominem imprudentem, et fatuum, et impium.]\n \n19\u00a0[Loramentum ligneum colligatum in fundamento \u00e6dificii non dissolvetur,\n sic et cor confirmatum in cogitatione consilii.\n20\u00a0Cogitatus sensati in omni tempore metu non depravabitur.\n21\u00a0Sicut pali in excelsis, et c\u00e6menta sine impensa posita,\n contra faciem venti non permanebunt:\n22\u00a0sic et cor timidum in cogitatione stulti\n contra impetum timoris non resistet.\n23\u00a0Sicut cor trepidum in cogitatione fatui omni tempore non metuet,\n sic et qui in pr\u00e6ceptis Dei permanet semper.]\n \n24\u00a0[Pungens oculum deducit lacrimas,\n et qui pungit cor profert sensum.\n25\u00a0Mittens lapidem in volatilia, dejiciet illa:\n sic et qui conviciatur amico, dissolvit amicitiam.\n26\u00a0Ad amicum etsi produxeris gladium, non desperes:\n est enim regressus.\n Ad amicum\n27\u00a0si aperueris os triste, non timeas:\n est enim concordatio:\n excepto convitio, et improperio, et superbia,\n et mysterii revelatione, et plaga dolosa:\n in his omnibus effugiet amicus.\n28\u00a0Fidem posside cum amico in paupertate illius,\n ut et in bonis illius l\u00e6teris.\n29\u00a0In tempore tribulationis illius permane illi fidelis,\n ut et in h\u00e6reditate illius coh\u00e6res sis.\n30\u00a0Ante ignem camini vapor et fumus ignis inaltatur:\n sic et ante sanguinem maledicta, et contumeli\u00e6, et min\u00e6.\n31\u00a0Amicum salutare non confundar,\n a facie illius non me abscondam:\n et si mala mihi evenerint per illum, sustinebo.\n32\u00a0Omnis qui audiet cavebit se ab eo.]\n \n33\u00a0[Quis dabit ori meo custodiam,\n et super labia mea signaculum certum,\n ut non cadam ab ipsis,\n et lingua mea perdat me?]","title":"Vulgate: Sirach: Sirach Chapter 22","type":"page"}