{"collection":"Bible & Christianity","html_url":"https://unchartedknowledge.5gfusion.net/browse/bib/vul/sir023.htm","path":"bib/vul/sir023.htm","source_url":"https://sacred-texts.com/bib/vul/sir023.htm","text":"1\u00a0[Domine, pater et dominator vit\u00e6 me\u00e6,\n ne derelinquas me in consilio eorum,\n nec sinas me cadere in illis.\n2\u00a0Quis superponet in cogitatu meo flagella,\n et in corde meo doctrinam sapienti\u00e6,\n ut ignorationibus eorum non parcant mihi,\n et non appareant delicta eorum,\n3\u00a0et ne adincrescant ignoranti\u00e6 me\u00e6,\n et multiplicentur delicta mea,\n et peccata mea abundent,\n et incidam in conspectu adversariorum meorum,\n et gaudeat super me inimicus meus?\n4\u00a0Domine, pater et Deus vit\u00e6 me\u00e6,\n ne derelinquas me in cogitatu illorum.\n5\u00a0Extollentiam oculorum meorum ne dederis mihi,\n et omne desiderium averte a me.\n6\u00a0Aufer a me ventris concupiscentias,\n et concubitus concupiscenti\u00e6 ne apprehendant me,\n et anim\u00e6 irreverenti et infrunit\u00e6 ne tradas me.]\n \n7\u00a0[Doctrinam oris audite, filii:\n et qui custodierit illam non periet labiis,\n nec scandalizabitur in operibus nequissimis.\n8\u00a0In vanitate sua apprehenditur peccator:\n et superbus et maledicus scandalizabitur in illis.\n9\u00a0Jurationi non assuescat os tuum:\n multi enim casus in illa.\n10\u00a0Nominatio vero Dei non sit assidua in ore tuo,\n et nominibus sanctorum non admiscearis,\n quoniam non erit immunis ab eis.\n11\u00a0Sicut enim servus interrogatus assidue a livore non minuitur,\n sic omnis jurans et nominans in toto a peccato non purgabitur.\n12\u00a0Vir multum jurans implebitur iniquitate,\n et non discedet a domo illius plaga.\n13\u00a0Et si frustraverit, delictum illius super ipsum erit:\n et si dissimulaverit, delinquit dupliciter:\n14\u00a0et si in vacuum juraverit, non justificabitur:\n replebitur enim retributione domus illius.\n15\u00a0Est et alia loquela contraria morti:\n non inveniatur in h\u00e6reditate Jacob.\n16\u00a0Etenim a misericordibus omnia h\u00e6c auferentur,\n et in delictis non volutabuntur.\n17\u00a0Indisciplinat\u00e6 loquel\u00e6 non assuescat os tuum:\n est enim in illa verbum peccati.\n18\u00a0Memento patris et matris tu\u00e6:\n in medio enim magnatorum consistis:\n19\u00a0ne forte obliviscatur te Deus in conspectu illorum,\n et assiduitate tua infatuatus, improperium patiaris,\n et maluisses non nasci,\n et diem nativitatis tu\u00e6 maledicas.\n20\u00a0Homo assuetus in verbis improperii\n in omnibus diebus suis non erudietur.]\n \n21\u00a0[Duo genera abundant in peccatis,\n et tertium adducit iram et perditionem.\n22\u00a0Anima calida quasi ignis ardens,\n non extinguetur donec aliquid glutiat:\n23\u00a0et homo nequam in ore carnis su\u00e6\n non desinet donec incendat ignem.\n24\u00a0Homini fornicario omnis panis dulcis:\n non fatigabitur transgrediens usque ad finem.\n25\u00a0Omnis homo qui transgreditur lectum suum,\n contemnens in animam suam, et dicens: Quis me videt?\n26\u00a0Tenebr\u00e6 circumdant me, et parietes cooperiunt me,\n et nemo circumspicit me: quem vereor?\n delictorum meorum non memorabitur Altissimus.\n27\u00a0Et non intelligit quoniam omnia videt oculus illius,\n quoniam expellit a se timorem Dei hujusmodi hominis timor,\n et oculi hominum timentes illum:\n28\u00a0et non cognovit quoniam oculi Domini\n multo plus lucidiores sunt super solem,\n circumspicientes omnes vias hominum,\n et profundum abyssi, et hominum corda,\n intuentes in absconditas partes.\n29\u00a0Domino enim Deo antequam crearentur omnia sunt agnita:\n sic et post perfectum respicit omnia.\n30\u00a0Hic in plateis civitatis vindicabitur,\n et quasi pullus equinus fugabitur,\n et ubi non speravit apprehendetur.\n31\u00a0Et erit dedecus omnibus,\n eo quod non intellexerit timorem Domini.\n32\u00a0Sic et mulier omnis relinquens virum suum,\n et statuens h\u00e6reditatem ex alieno matrimonio:\n33\u00a0primo enim in lege Altissimi incredibilis fuit:\n secundo in virum suum deliquit:\n tertio in adulterio fornicata est,\n et ex alio viro filios statuit sibi.\n34\u00a0H\u00e6c in ecclesiam adducetur,\n et in filios ejus respicietur:\n35\u00a0non tradent filii ejus radices,\n et rami ejus non dabunt fructum:\n36\u00a0derelinquet in maledictum memoriam ejus,\n et dedecus illius non delebitur.\n37\u00a0Et agnoscent qui derelicti sunt,\n quoniam nihil melius est quam timor Dei,\n et nihil dulcius quam respicere in mandatis Domini.\n38\u00a0Gloria magna est sequi Dominum:\n longitudo enim dierum assumetur ab eo.]","title":"Vulgate: Sirach: Sirach Chapter 23","type":"page"}