{"collection":"Bible & Christianity","html_url":"https://unchartedknowledge.5gfusion.net/browse/bib/vul/sir024.htm","path":"bib/vul/sir024.htm","source_url":"https://sacred-texts.com/bib/vul/sir024.htm","text":"1\u00a0[Sapientia laudabit animam suam,\n et in Deo honorabitur,\n et in medio populi sui gloriabitur,\n2\u00a0et in ecclesiis Altissimi aperiet os suum,\n et in conspectu virtutis illius gloriabitur,\n3\u00a0et in medio populi sui exaltabitur,\n et in plenitudine sancta admirabitur,\n4\u00a0et in multitudine electorum habebit laudem,\n et inter benedictos benedicetur, dicens:\n5\u00a0Ego ex ore Altissimi prodivi,\n primogenita ante omnem creaturam.\n6\u00a0Ego feci in c\u00e6lis ut oriretur lumen indeficiens,\n et sicut nebula texi omnem terram.\n7\u00a0Ego in altissimis habitavi,\n et thronus meus in columna nubis.\n8\u00a0Gyrum c\u00e6li circuivi sola,\n et profundum abyssi penetravi:\n in fluctibus maris ambulavi.\n9\u00a0Et in omni terra steti:\n et in omni populo,\n10\u00a0et in omni gente primatum habui:\n11\u00a0et omnium excellentium et humilium corda virtute calcavi.\n Et in his omnibus requiem qu\u00e6sivi,\n et in h\u00e6reditate Domini morabor.\n12\u00a0Tunc pr\u00e6cepit, et dixit mihi Creator omnium:\n et qui creavit me, requievit in tabernaculo meo.\n13\u00a0Et dixit mihi: In Jacob inhabita,\n et in Isra\u00ebl h\u00e6reditare,\n et in electis meis mitte radices.]\n \n14\u00a0[Ab initio et ante s\u00e6cula creata sum,\n et usque ad futurum s\u00e6culum non desinam:\n et in habitatione sancta coram ipso ministravi.\n15\u00a0Et sic in Sion firmata sum,\n et in civitate sanctificata similiter requievi,\n et in Jerusalem potestas mea.\n16\u00a0Et radicavi in populo honorificato,\n et in parte Dei mei h\u00e6reditas illius,\n et in plenitudine sanctorum detentio mea.]\n \n17\u00a0[Quasi cedrus exaltata sum in Libano,\n et quasi cypressus in monte Sion:\n18\u00a0quasi palma exaltata sum in Cades,\n et quasi plantatio ros\u00e6 in Jericho:\n19\u00a0quasi oliva speciosa in campis,\n et quasi platanus exaltata sum juxta aquam in plateis.\n20\u00a0Sicut cinnamomum et balsamum aromatizans odorem dedi;\n quasi myrrha electa dedi suavitatem odoris:\n21\u00a0et quasi storax, et galbanus, et ungula, et gutta,\n et quasi Libanus non incisus vaporavi habitationem meam,\n et quasi balsamum non mistum odor meus.\n22\u00a0Ego quasi terebinthus extendi ramos meos,\n et rami mei honoris et grati\u00e6.\n23\u00a0Ego quasi vitis fructificavi suavitatem odoris:\n et flores mei fructus honoris et honestatis.\n24\u00a0Ego mater pulchr\u00e6 dilectionis, et timoris,\n et agnitionis, et sanct\u00e6 spei.\n25\u00a0In me gratia omnis vi\u00e6 et veritatis:\n in me omnis spes vit\u00e6 et virtutis.\n26\u00a0Transite ad me, omnes qui concupiscitis me,\n et a generationibus meis implemini:\n27\u00a0spiritus enim meus super mel dulcis,\n et h\u00e6reditas mea super mel et favum.\n28\u00a0Memoria mea in generatione s\u00e6culorum.\n29\u00a0Qui edunt me, adhuc esurient,\n et qui bibunt me, adhuc sitient.\n30\u00a0Qui audit me non confundetur,\n et qui operantur in me non peccabunt:\n31\u00a0qui elucidant me, vitam \u00e6ternam habebunt.]\n \n32\u00a0[H\u00e6c omnia liber vit\u00e6,\n et testamentum Altissimi, et agnitio veritatis.\n33\u00a0Legem mandavit Moyses in pr\u00e6ceptis justitiarum,\n et h\u00e6reditatem domui Jacob,\n et Isra\u00ebl promissiones.\n34\u00a0Posuit David, puero suo,\n excitare regem ex ipso fortissimum,\n et in throno honoris sedentem in sempiternum.\n35\u00a0Qui implet quasi Phison sapientiam,\n et sicut Tigris in diebus novorum:\n36\u00a0qui adimplet quasi Euphrates sensum,\n qui multiplicat quasi Jordanis in tempore messis:\n37\u00a0qui mittit disciplinam sicut lucem,\n et assistens quasi Gehon in die vindemi\u00e6.\n38\u00a0Qui perficit primus scire ipsam,\n et infirmior non investigabit eam.\n39\u00a0A mari enim abundavit cogitatio ejus,\n et consilium illius ab abysso magna.\n40\u00a0Ego sapientiam effudi flumina:\n41\u00a0ego quasi trames aqu\u00e6 immens\u00e6 de fluvio:\n ego quasi fluvii dioryx,\n et sicut aqu\u00e6ductus exivi de paradiso.\n42\u00a0Dixi: Rigabo hortum meum plantationum,\n et inebriabo prati mei fructum.\n43\u00a0Et ecce factus est mihi trames abundans,\n et fluvius meus appropinquavit ad mare:\n44\u00a0quoniam doctrinam quasi antelucanum illumino omnibus,\n et enarrabo illam usque ad longinquum.\n45\u00a0Penetrabo omnes inferiores partes terr\u00e6,\n et inspiciam omnes dormientes,\n et illuminabo omnes sperantes in Domino.\n46\u00a0Adhuc doctrinam quasi prophetiam effundam,\n et relinquam illam qu\u00e6rentibus sapientiam,\n et non desinam in progenies illorum usque in \u00e6vum sanctum.\n47\u00a0Videte quoniam non soli mihi laboravi,\n sed omnibus exquirentibus veritatem.]","title":"Vulgate: Sirach: Sirach Chapter 24","type":"page"}