{"collection":"Bible & Christianity","html_url":"https://unchartedknowledge.5gfusion.net/browse/bib/vul/sir025.htm","path":"bib/vul/sir025.htm","source_url":"https://sacred-texts.com/bib/vul/sir025.htm","text":"1\u00a0[In tribus placitum est spiritui meo,\n qu\u00e6 sunt probata coram Deo et hominibus:\n2\u00a0concordia fratrum,\n et amor proximorum,\n et vir et mulier bene sibi consentientes.\n3\u00a0Tres species odivit anima mea,\n et aggravor valde anim\u00e6 illorum:\n4\u00a0pauperem superbum, divitem mendacem,\n senem fatuum et insensatum.]\n \n5\u00a0[Qu\u00e6 in juventute tua non congregasti,\n quomodo in senectute tua invenies?\n6\u00a0Quam speciosum canitiei judicium,\n et presbyteris cognoscere consilium!\n7\u00a0Quam speciosa veteranis sapientia,\n et gloriosus intellectus et consilium!\n8\u00a0Corona senum multa peritia,\n et gloria illorum timor Dei.]\n \n9\u00a0[Novem insuspicabilia cordis magnificavi:\n et decimum dicam in lingua hominibus:\n10\u00a0homo qui jucundatur in filiis,\n vivens et videns subversionem inimicorum suorum.\n11\u00a0Beatus qui habitat cum muliere sensata,\n et qui lingua sua non est lapsus,\n et qui non servivit indignis se.\n12\u00a0Beatus qui invenit amicum verum,\n et qui enarrat justitiam auri audienti.\n13\u00a0Quam magnus qui invenit sapientiam et scientiam!\n sed non est super timentem Dominum.\n14\u00a0Timor Dei super omnia se superposuit.\n15\u00a0Beatus homo cui donatum est habere timorem Dei:\n qui tenet illum, cui assimilabitur?\n16\u00a0Timor Dei initium dilectionis ejus:\n fidei autem initium agglutinandum est ei.]\n \n17\u00a0[Omnis plaga tristitia cordis est,\n et omnis malitia nequitia mulieris.\n18\u00a0Et omnem plagam, et non plagam videbit cordis:\n19\u00a0et omnem nequitiam, et non nequitiam mulieris:\n20\u00a0et omnem obductum, et non obductum odientium:\n21\u00a0et omnem vindictam, et non vindictam inimicorum.\n22\u00a0Non est caput nequius super caput colubri,\n23\u00a0et non est ira super iram mulieris.\n Commorari leoni et draconi placebit,\n quam habitare cum muliere nequam.\n24\u00a0Nequitia mulieris immutat faciem ejus:\n et obc\u00e6cat vultum suum tamquam ursus,\n et quasi saccum ostendit.\n In medio proximorum ejus\n25\u00a0ingemuit vir ejus,\n et audiens suspiravit modicum.\n26\u00a0Brevis omnis malitia super malitiam mulieris:\n sors peccatorum cadat super illam.\n27\u00a0Sicut ascensus arenosus in pedibus veterani,\n sic mulier linguata homini quieto.\n28\u00a0Ne respicias in mulieris speciem,\n et non concupiscas mulierem in specie.\n29\u00a0Mulieris ira, et irreverentia,\n et confusio magna.\n30\u00a0Mulier si primatum habeat,\n contraria est viro suo.\n31\u00a0Cor humile, et facies tristis,\n et plaga cordis, mulier nequam.\n32\u00a0Manus debiles et genua dissoluta,\n mulier qu\u00e6 non beatificat virum suum.\n33\u00a0A muliere initium factum est peccati,\n et per illam omnes morimur.\n34\u00a0Non des aqu\u00e6 tu\u00e6 exitum, nec modicum:\n nec mulieri nequam veniam prodeundi.\n35\u00a0Si non ambulaverit ad manum tuam,\n confundet te in conspectu inimicorum.\n36\u00a0A carnibus tuis abscinde illam,\n ne semper te abutatur.]","title":"Vulgate: Sirach: Sirach Chapter 25","type":"page"}