{"collection":"Bible & Christianity","html_url":"https://unchartedknowledge.5gfusion.net/browse/bib/vul/sir027.htm","path":"bib/vul/sir027.htm","source_url":"https://sacred-texts.com/bib/vul/sir027.htm","text":"1\u00a0[Propter inopiam multi deliquerunt:\n et qui qu\u00e6rit locupletari avertit oculum suum.\n2\u00a0Sicut in medio compaginis lapidum palus figitur,\n sic et inter medium venditionis et emptionis angustiabitur peccatum:\n3\u00a0conteretur cum delinquente delictum.\n4\u00a0Si non in timore Domini tenueris te instanter,\n cito subvertetur domus tua.]\n \n5\u00a0[Sicut in percussura cribri remanebit pulvis,\n sic aporia hominis in cogitatu illius.\n6\u00a0Vasa figuli probat fornax,\n et homines justos tentatio tribulationis.\n7\u00a0Sicut rusticatio de ligno ostendit fructum illius,\n sic verbum ex cogitatu cordis hominis.\n8\u00a0Ante sermonem non laudes virum:\n h\u00e6c enim tentatio est hominum.\n9\u00a0Si sequaris justitiam, apprehendes illam,\n et indues quasi poderem honoris:\n et inhabitabis cum ea, et proteget te in sempiternum,\n et in die agnitionis invenies firmamentum.\n10\u00a0Volatilia ad sibi similia conveniunt:\n et veritas ad eos qui operantur illam revertetur.\n11\u00a0Leo venationi insidiatur semper:\n sic peccata operantibus iniquitates.\n12\u00a0Homo sanctus in sapientia manet sicut sol:\n nam stultus sicut luna mutatur.\n13\u00a0In medio insensatorum serva verbum tempori:\n in medio autem cogitantium assiduus esto.\n14\u00a0Narratio peccantium odiosa,\n et risus illorum in deliciis peccati.\n15\u00a0Loquela multum jurans horripilationem capiti statuet,\n et irreverentia ipsius obturatio aurium.\n16\u00a0Effusio sanguinis in rixa superborum,\n et maledictio illorum auditus gravis.\n17\u00a0Qui denudat arcana amici fidem perdit,\n et non inveniet amicum ad animum suum.\n18\u00a0Dilige proximum,\n et conjungere fide cum illo.\n19\u00a0Quod si denudaveris absconsa illius,\n non persequeris post eum.\n20\u00a0Sicut enim homo qui perdit amicum suum,\n sic et qui perdit amicitiam proximi sui.\n21\u00a0Et sicut qui dimittit avem de manu sua,\n sic dereliquisti proximum tuum, et non eum capies.\n22\u00a0Non illum sequaris, quoniam longe abest:\n effugit enim quasi caprea de laqueo, quoniam vulnerata est anima ejus:\n23\u00a0ultra eum non poteris colligare.\n Et maledicti est concordatio:\n24\u00a0denudare autem amici mysteria, desperatio est anim\u00e6 infelicis.]\n \n25\u00a0[Annuens oculo fabricat iniqua,\n et nemo eum abjiciet.\n26\u00a0In conspectu oculorum tuorum condulcabit os suum,\n et super sermones tuos admirabitur:\n novissime autem pervertet os suum,\n et in verbis tuis dabit scandalum.\n27\u00a0Multa odivi, et non co\u00e6quavi ei,\n et Dominus odiet illum.\n28\u00a0Qui in altum mittit lapidem, super caput ejus cadet:\n et plaga dolosa dolosi dividet vulnera.\n29\u00a0Et qui foveam fodit incidet in eam:\n et qui statuit lapidem proximo offendet in eo:\n et qui laqueum alii ponit, peribit in illo.\n30\u00a0Facienti nequissimum consilium, super ipsum devolvetur,\n et non agnoscet unde adveniat illi.\n31\u00a0Illusio et improperium superborum,\n et vindicta sicut leo insidiabitur illi.\n32\u00a0Laqueo peribunt qui oblectantur casu justorum,\n dolor autem consumet illos antequam moriantur.]\n \n33\u00a0[Ira et furor utraque execrabilia sunt,\n et vir peccator continens erit illorum.]","title":"Vulgate: Sirach: Sirach Chapter 27","type":"page"}