{"collection":"Bible & Christianity","html_url":"https://unchartedknowledge.5gfusion.net/browse/bib/vul/sir028.htm","path":"bib/vul/sir028.htm","source_url":"https://sacred-texts.com/bib/vul/sir028.htm","text":"1\u00a0[Qui vindicari vult, a Domino inveniet vindictam,\n et peccata illius servans servabit.\n2\u00a0Relinque proximo tuo nocenti te,\n et tunc deprecanti tibi peccata solventur.\n3\u00a0Homo homini reservat iram,\n et a Deo qu\u00e6rit medelam:\n4\u00a0in hominem similem sibi non habet misericordiam,\n et de peccatis suis deprecatur.\n5\u00a0Ipse cum caro sit reservat iram,\n et propitiationem petit a Deo:\n quis exorabit pro delictis illius?\n6\u00a0Memento novissimorum, et desine inimicari:\n7\u00a0tabitudo enim et mors imminent in mandatis ejus.\n8\u00a0Memorare timorem Dei,\n et non irascaris proximo.\n9\u00a0Memorare testamentum Altissimi,\n et despice ignorantiam proximi.\n10\u00a0Abstine te a lite,\n et minues peccata.\n11\u00a0Homo enim iracundus incendit litem,\n et vir peccator turbabit amicos,\n et in medio pacem habentium immittet inimicitiam.\n12\u00a0Secundum enim ligna silv\u00e6 sic ignis exardescit:\n et secundum virtutem hominis sic iracundia illius erit,\n et secundum substantiam suam exaltabit iram suam.\n13\u00a0Certamen festinatum incendit ignem,\n et lis festinans effundit sanguinem:\n et lingua testificans adducit mortem.\n14\u00a0Si sufflaveris in scintillam, quasi ignis exardebit:\n et si exspueris super illam, extinguetur:\n utraque ex ore proficiscuntur.]\n \n15\u00a0[Susurro et bilinguis maledictus,\n multos enim turbabit pacem habentes.\n16\u00a0Lingua tertia multos commovit,\n et dispersit illos de gente in gentem.\n17\u00a0Civitates muratas divitum destruxit,\n et domus magnatorum effodit.\n18\u00a0Virtutes populorum concidit,\n et gentes fortes dissolvit.\n19\u00a0Lingua tertia mulieres viratas ejecit,\n et privavit illas laboribus suis.\n20\u00a0Qui respicit illam non habebit requiem,\n nec habebit amicum in quo requiescat.\n21\u00a0Flagelli plaga livorem facit:\n plaga autem lingu\u00e6 comminuet ossa.\n22\u00a0Multi ceciderunt in ore gladii:\n sed non sic quasi qui interierunt per linguam suam.\n23\u00a0Beatus qui tectus est a lingua nequam,\n qui in iracundiam illius non transivit,\n et qui non attraxit jugum illius,\n et in vinculis ejus non est ligatus:\n24\u00a0jugum enim illius jugum ferreum est,\n et vinculum illius vinculum \u00e6reum est;\n25\u00a0mors illius mors nequissima:\n et utilis potius infernus quam illa.\n26\u00a0Perseverantia illius non permanebit,\n sed obtinebit vias injustorum,\n et in flamma sua non comburet justos.\n27\u00a0Qui relinquunt Deum incident in illam,\n et exardebit in illis, et non extinguetur,\n et immittetur in illos quasi leo,\n et quasi pardus l\u00e6det illos.\n28\u00a0Sepi aures tuas spinis:\n linguam nequam noli audire:\n et ori tuo facito ostia et seras.\n29\u00a0Aurum tuum et argentum tuum confla,\n et verbis tuis facito stateram,\n et frenos ori tuo rectos:\n30\u00a0et attende ne forte labaris in lingua,\n et cadas in conspectu inimicorum insidiantium tibi,\n et sit casus tuus insanabilis in mortem.]","title":"Vulgate: Sirach: Sirach Chapter 28","type":"page"}