{"collection":"Bible & Christianity","html_url":"https://unchartedknowledge.5gfusion.net/browse/bib/vul/sir029.htm","path":"bib/vul/sir029.htm","source_url":"https://sacred-texts.com/bib/vul/sir029.htm","text":"1\u00a0[Qui facit misericordiam f\u0153neratur proximo suo:\n et qui pr\u00e6valet manu mandata servat.\n2\u00a0F\u0153nerare proximo tuo in tempore necessitatis illius:\n et iterum redde proximo in tempore suo.\n3\u00a0Confirma verbum, et fideliter age cum illo:\n et in omni tempore invenies quod tibi necessarium est.\n4\u00a0Multi quasi inventionem \u00e6stimaverunt f\u0153nus,\n et pr\u00e6stiterunt molestiam his qui se adjuverunt.\n5\u00a0Donec accipiant, osculantur manus dantis,\n et in promissionibus humiliant vocem suam:\n6\u00a0et in tempore redditionis postulabit tempus,\n et loquetur verba t\u00e6dii et murmurationum,\n et tempus causabitur.\n7\u00a0Si autem potuerit reddere, adversabitur:\n solidi vix reddet dimidium,\n et computabit illud quasi inventionem:\n8\u00a0sin autem, fraudabit illum pecunia sua,\n et possidebit illum inimicum gratis:\n9\u00a0et convitia et maledicta reddet illi,\n et pro honore et beneficio reddet illi contumeliam.\n10\u00a0Multi non causa nequiti\u00e6 non f\u0153nerati sunt,\n sed fraudari gratis timuerunt.\n11\u00a0Verumtamen super humilem animo fortior esto,\n et pro eleemosyna non trahas illum.\n12\u00a0Propter mandatum assume pauperem,\n et propter inopiam ejus ne dimittas eum vacuum.\n13\u00a0Perde pecuniam propter fratrem et amicum tuum,\n et non abscondas illam sub lapide in perditionem.\n14\u00a0Pone thesaurum tuum in pr\u00e6ceptis Altissimi,\n et proderit tibi magis quam aurum.\n15\u00a0Conclude eleemosynam in corde pauperis,\n et h\u00e6c pro te exorabit ab omni malo.\n16 Super scutum potentis\n17\u00a0et super lanceam\n18\u00a0adversus inimicum tuum pugnabit.]\n \n19\u00a0[Vir bonus fidem facit pro proximo suo:\n et qui perdiderit confusionem derelinquet sibi.\n20\u00a0Gratiam fidejussoris ne obliviscaris:\n dedit enim pro te animam suam.\n21\u00a0Repromissorem fugit peccator et immundus.\n22\u00a0Bona repromissoris sibi ascribit peccator:\n et ingratus sensu derelinquet liberantem se.\n23\u00a0Vir repromittit de proximo suo:\n et cum perdiderit reverentiam, derelinquetur ab eo.\n24\u00a0Repromissio nequissima multos perdidit dirigentes,\n et commovit illos quasi fluctus maris.\n25\u00a0Viros potentes gyrans migrare fecit,\n et vagati sunt in gentibus alienis.\n26\u00a0Peccator transgrediens mandatum Domini incidet in promissionem nequam:\n et qui conatur multa agere incidet in judicium.\n27\u00a0Recupera proximum secundum virtutem tuam,\n et attende tibi ne incidas.]\n \n28\u00a0[Initium vit\u00e6 hominis, aqua et panis,\n et vestimentum, et domus protegens turpitudinem.\n29\u00a0Melior est victus pauperis sub tegmine asserum\n quam epul\u00e6 splendid\u00e6 in peregre sine domicilio.\n30\u00a0Minimum pro magno placeat tibi,\n et improperium peregrinationis non audies.\n31\u00a0Vita nequam hospitandi de domo in domum:\n et ubi hospitabitur non fiducialiter aget, nec aperiet os.\n32\u00a0Hospitabitur, et pascet, et potabit ingratos,\n et ad h\u00e6c amara audiet:\n33\u00a0transi, hospes, et orna mensam,\n et qu\u00e6 in manu habes ciba ceteros.\n34\u00a0Exi a facie honoris amicorum meorum:\n necessitudine domus me\u00e6 hospitio mihi factus est frater.\n35\u00a0Gravia h\u00e6c homini habenti sensum:\n correptio domus, et improperium f\u0153neratoris.]","title":"Vulgate: Sirach: Sirach Chapter 29","type":"page"}