{"collection":"Bible & Christianity","html_url":"https://unchartedknowledge.5gfusion.net/browse/bib/vul/sir030.htm","path":"bib/vul/sir030.htm","source_url":"https://sacred-texts.com/bib/vul/sir030.htm","text":"1\u00a0[Qui diligit filium suum assiduat illi flagella,\n ut l\u00e6tetur in novissimo suo,\n et non palpet proximorum ostia.\n2\u00a0Qui docet filium suum laudabitur in illo,\n et in medio domesticorum in illo gloriabitur.\n3\u00a0Qui docet filium suum in zelum mittit inimicum,\n et in medio amicorum gloriabitur in illo.\n4\u00a0Mortuus est pater ejus, et quasi non est mortuus:\n similem enim reliquit sibi post se.\n5\u00a0In vita sua vidit, et l\u00e6tatus est in illo:\n in obitu suo non est contristatus,\n nec confusus est coram inimicis:\n6\u00a0reliquit enim defensorem domus contra inimicos,\n et amicis reddentem gratiam.\n7\u00a0Pro animabus filiorum colligabit vulnera sua,\n et super omnem vocem turbabuntur viscera ejus.\n8\u00a0Equus indomitus evadit durus,\n et filius remissus evadet pr\u00e6ceps.\n9\u00a0Lacta filium, et paventem te faciet:\n lude cum eo, et contristabit te.\n10\u00a0Non corrideas illi, ne doleas,\n et in novissimo obstupescent dentes tui.\n11\u00a0Non des illi potestatem in juventute,\n et ne despicias cogitatus illius.\n12\u00a0Curva cervicem ejus in juventute,\n et tunde latera ejus dum infans est,\n ne forte induret, et non credat tibi,\n et erit tibi dolor anim\u00e6.\n13\u00a0Doce filium tuum, et operare in illo,\n ne in turpitudinem illius offendas.]\n \n14\u00a0[Melior est pauper sanus, et fortis viribus,\n quam dives imbecillis et flagellatus malitia.\n15\u00a0Salus anim\u00e6 in sanctitate justiti\u00e6\n melior est omni auro et argento:\n et corpus validum quam census immensus.\n16\u00a0Non est census super censum salutis corporis,\n et non est oblectamentum super cordis gaudium.\n17\u00a0Melior est mors quam vita amara,\n et requies \u00e6terna quam languor perseverans.\n18\u00a0Bona abscondita in ore clauso,\n quasi appositiones epularum circumposit\u00e6 sepulchro.\n19\u00a0Quid proderit libatio idolo?\n nec enim manducabit, nec odorabit.\n20\u00a0Sic qui effugatur a Domino,\n portans mercedes iniquitatis:\n21\u00a0videns oculis et ingemiscens,\n sicut spado complectens virginem, et suspirans.\n22\u00a0Tristitiam non des anim\u00e6 tu\u00e6,\n et non affligas temetipsum in consilio tuo.\n23\u00a0Jucunditas cordis, h\u00e6c est vita hominis,\n et thesaurus sine defectione sanctitatis:\n et exsultatio viri est long\u00e6vitas.\n24\u00a0Miserere anim\u00e6 tu\u00e6 placens Deo, et contine:\n congrega cor tuum in sanctitate ejus,\n et tristitiam longe repelle a te.\n25\u00a0Multos enim occidit tristitia,\n et non est utilitas in illa.\n26\u00a0Zelus et iracundia minuunt dies,\n et ante tempus senectam adducet cogitatus.\n27\u00a0Splendidum cor et bonum in epulis est:\n epul\u00e6 enim illius diligenter fiunt.]","title":"Vulgate: Sirach: Sirach Chapter 30","type":"page"}