{"collection":"Bible & Christianity","html_url":"https://unchartedknowledge.5gfusion.net/browse/bib/vul/sir031.htm","path":"bib/vul/sir031.htm","source_url":"https://sacred-texts.com/bib/vul/sir031.htm","text":"1\u00a0[Vigilia honestatis tabefaciet carnes,\n et cogitatus illius auferet somnum.\n2\u00a0Cogitatus pr\u00e6scienti\u00e6 avertit sensum,\n et infirmitas gravis sobriam facit animam.\n3\u00a0Laboravit dives in congregatione substanti\u00e6,\n et in requie sua replebitur bonis suis.\n4\u00a0Laboravit pauper in diminutione victus,\n et in fine inops fit.\n5\u00a0Qui aurum diligit non justificabitur,\n et qui insequitur consumptionem replebitur ex ea.\n6\u00a0Multi dati sunt in auri casus,\n et facta est in specie ipsius perditio illorum.\n7\u00a0Lignum offensionis est aurum sacrificantium:\n v\u00e6 illis qui sectantur illud!\n et omnis imprudens deperiet in illo.\n8\u00a0Beatus dives qui inventus est sine macula,\n et qui post aurum non abiit,\n nec speravit in pecunia et thesauris.\n9\u00a0Quis est hic? et laudabimus eum:\n fecit enim mirabilia in vita sua.\n10\u00a0Qui probatus est in illo, et perfectus est, erit illi gloria \u00e6terna:\n qui potuit transgredi, et non est transgressus;\n facere mala, et non fecit.\n11\u00a0Ideo stabilita sunt bona illius in Domino,\n et eleemosynas illius enarrabit omnis ecclesia sanctorum.]\n \n12\u00a0[Supra mensam magnam sedisti?\n non aperias super illam faucem tuam prior.\n13\u00a0Non dicas sic: Multa sunt, qu\u00e6 super illam sunt.\n14\u00a0Memento quoniam malus est oculus nequam.\n15\u00a0Nequius oculo quid creatum est?\n ideo ab omni facie sua lacrimabitur, cum viderit.\n16\u00a0Ne extendas manum tuam prior,\n et invidia contaminatus erubescas.\n17\u00a0Ne comprimaris in convivio.\n18\u00a0Intellige qu\u00e6 sunt proximi tui ex teipso.\n19\u00a0Utere quasi homo frugi his qu\u00e6 tibi apponuntur:\n ne, cum manducas multum, odio habearis.\n20\u00a0Cessa prior causa disciplin\u00e6:\n et noli nimius esse, ne forte offendas.\n21\u00a0Et si in medio multorum sedisti,\n prior illis ne extendas manum tuam,\n nec prior poscas bibere.\n22\u00a0Quam sufficiens est homini eruditio vinum exiguum!\n et in dormiendo non laborabis ab illo,\n et non senties dolorem.\n23\u00a0Vigilia, cholera et tortura viro infrunito,\n24\u00a0somnus sanitatis in homine parco:\n dormiet usque mane,\n et anima illius cum ipso delectabitur.\n25\u00a0Et si coactus fueris in edendo multum,\n surge e medio, evome, et refrigerabit te,\n et non adduces corpori tuo infirmitatem.\n26\u00a0Audi me, fili, et ne spernas me,\n et in novissimo invenies verba mea.\n27\u00a0In omnibus operibus tuis esto velox,\n et omnis infirmitas non occurret tibi.\n28\u00a0Splendidum in panibus benedicent labia multorum,\n et testimonium veritatis illius fidele.\n29\u00a0Nequissimo in pane murmurabit civitas,\n et testimonium nequiti\u00e6 illius verum est.\n30\u00a0Diligentes in vino noli provocare:\n multos enim exterminavit vinum.\n31\u00a0Ignis probat ferrum durum:\n sic vinum corda superborum arguet in ebrietate potatum.\n32\u00a0\u00c6qua vita hominibus vinum in sobrietate:\n si bibas illud moderate, eris sobrius.\n33\u00a0Qu\u00e6 vita est ei qui minuitur vino?\n34\u00a0Quid defraudat vitam? mors.\n35\u00a0Vinum in jucunditatem creatum est,\n et non in ebrietatem ab initio.\n36\u00a0Exsultatio anim\u00e6 et cordis vinum moderate potatum.\n37\u00a0Sanitas est anim\u00e6 et corpori sobrius potus.\n38\u00a0Vinum multum potatum irritationem,\n et iram, et ruinas multas facit.\n39\u00a0Amaritudo anim\u00e6\n vinum multum potatum.\n40\u00a0Ebrietatis animositas, imprudentis offensio,\n minorans virtutem, et faciens vulnera.\n41\u00a0In convivio vini non arguas proximum,\n et non despicias eum in jucunditate illius.\n42\u00a0Verba improperii non dicas illi,\n et non premas illum repetendo.]","title":"Vulgate: Sirach: Sirach Chapter 31","type":"page"}