{"collection":"Bible & Christianity","html_url":"https://unchartedknowledge.5gfusion.net/browse/bib/vul/sir032.htm","path":"bib/vul/sir032.htm","source_url":"https://sacred-texts.com/bib/vul/sir032.htm","text":"1\u00a0[Rectorem te posuerunt? noli extolli:\n esto in illis quasi unus ex ipsis.\n2\u00a0Curam illorum habe, et sic conside,\n et omni cura tua explicita recumbe:\n3\u00a0ut l\u00e6teris propter illos,\n et ornamentum grati\u00e6 accipias coronam,\n et dignationem consequaris corrogationis.\n4\u00a0Loquere major natu:\n decet enim te\n5\u00a0primum verbum diligenti scientia,\n et non impedias musicam.\n6\u00a0Ubi auditus non est, non effundas sermonem,\n et importune noli extolli in sapientia tua.\n7\u00a0Gemmula carbunculi in ornamento auri,\n et comparatio musicorum in convivio vini.\n8\u00a0Sicut in fabricatione auri signum est smaragdi,\n sic numerus musicorum in jucundo et moderato vino.\n9\u00a0Audi tacens,\n et pro reverentia accedet tibi bona gratia.\n10\u00a0Adolescens, loquere in tua causa vix.\n11\u00a0Si bis interrogatus fueris,\n habeat caput responsum tuum.\n12\u00a0In multis esto quasi inscius,\n et audi tacens simul et qu\u00e6rens.\n13\u00a0In medio magnatorum non pr\u00e6sumas:\n et ubi sunt senes non multum loquaris.\n14\u00a0Ante grandinem pr\u00e6ibit coruscatio:\n et ante verecundiam pr\u00e6ibit gratia,\n et pro reverentia accedet tibi bona gratia.\n15\u00a0Et hora surgendi non te trices:\n pr\u00e6curre autem prior in domum tuam,\n et illic avocare, et illic lude,\n16\u00a0et age conceptiones tuas,\n et non in delictis et verbo superbo:\n17\u00a0et super his omnibus benedicito Dominum, qui fecit,\n et inebriantem te ab omnibus bonis suis.]\n \n18\u00a0[Qui timet Dominum excipiet doctrinam ejus:\n et qui vigilaverint ad illum invenient benedictionem.\n19\u00a0Qui qu\u00e6rit legem replebitur ab ea,\n et qui insidiose agit scandalizabitur in ea.\n20\u00a0Qui timent Dominum invenient judicium justum,\n et justitias quasi lumen accendent.\n21\u00a0Peccator homo vitabit correptionem,\n et secundum voluntatem suam inveniet comparationem.\n22\u00a0Vir consilii non disperdet intelligentiam:\n alienus et superbus non pertimescet timorem:\n23\u00a0etiam postquam fecit cum eo sine consilio,\n et suis insectationibus arguetur.\n24\u00a0Fili, sine consilio nihil facias,\n et post factum non p\u0153nitebis.\n25\u00a0In via ruin\u00e6 non eas, et non offendes in lapides:\n nec credas te vi\u00e6 laborios\u00e6, ne ponas anim\u00e6 tu\u00e6 scandalum.\n26\u00a0Et a filiis tuis cave,\n et a domesticis tuis attende.\n27\u00a0In omni opere tuo crede ex fide anim\u00e6 tu\u00e6,\n hoc est enim conservatio mandatorum.\n28\u00a0Qui credit Deo attendit mandatis:\n et qui confidit in illo non minorabitur.]","title":"Vulgate: Sirach: Sirach Chapter 32","type":"page"}