{"collection":"Bible & Christianity","html_url":"https://unchartedknowledge.5gfusion.net/browse/bib/vul/sir033.htm","path":"bib/vul/sir033.htm","source_url":"https://sacred-texts.com/bib/vul/sir033.htm","text":"1\u00a0[Timenti Dominum non occurrent mala:\n sed in tentatione Deus illum conservabit, et liberabit a malis.\n Sapiens non odit mandata et justitias,\n2\u00a0et non illidetur quasi in procella navis.\n3\u00a0Homo sensatus credit legi Dei,\n et lex illi fidelis.]\n \n4\u00a0[Qui interrogationem manifestat parabit verbum,\n et sic deprecatus exaudietur:\n et conservabit disciplinam, et tunc respondebit.\n5\u00a0Pr\u00e6cordia fatui quasi rota carri,\n et quasi axis versatilis cogitatus illius.\n6\u00a0Equus emissarius, sic et amicus subsannator:\n sub omni supra sedente hinnit.]\n \n7\u00a0[Quare dies diem superat, et iterum lux lucem,\n et annus annum a sole?\n8\u00a0A Domini scientia separati sunt,\n facto sole, et pr\u00e6ceptum custodiente.\n9\u00a0Et immutavit tempora, et dies festos ipsorum,\n et in illis dies festos celebraverunt ad horam.\n10\u00a0Ex ipsis exaltavit et magnificavit Deus,\n et ex ipsis posuit in numerum dierum:\n et omnes homines de solo et ex terra unde creatus est Adam.\n11\u00a0In multitudine disciplin\u00e6 Dominus separavit eos,\n et immutavit vias eorum.\n12\u00a0Ex ipsis benedixit et exaltavit,\n et ex ipsis sanctificavit, et ad se applicavit,\n et ex ipsis maledixit, et humiliavit,\n et convertit illos a separatione ipsorum.\n13\u00a0Quasi lutum figuli in manu ipsius,\n plasmare illud et disponere.\n14\u00a0Omnes vi\u00e6 ejus secundum dispositionem ejus:\n sic homo in manu illius qui se fecit,\n et reddet illi secundum judicium suum.\n15\u00a0Contra malum bonum est, et contra mortem vita:\n sic et contra virum justum peccator,\n et sic intuere in omnia opera Altissimi,\n duo et duo, et unum contra unum.]\n \n16\u00a0[Et ego novissimus evigilavi,\n et quasi qui colligit acinos post vindemiatores.\n17\u00a0In benedictione Dei et ipse speravi,\n et quasi qui vindemiat replevi torcular.\n18\u00a0Respicite quoniam non mihi soli laboravi,\n sed omnibus exquirentibus disciplinam.\n19\u00a0Audite me, magnates et omnes populi:\n et rectores ecclesi\u00e6, auribus percipite.]\n \n20\u00a0[Filio et mulieri, fratri et amico,\n non des potestatem super te in vita tua:\n et non dederis alii possessionem tuam,\n ne forte p\u0153niteat te, et depreceris pro illis.\n21\u00a0Dum adhuc superes et aspiras,\n non immutabit te omnis caro.\n22\u00a0Melius est enim ut filii tui te rogent,\n quam te respicere in manus filiorum tuorum.\n23\u00a0In omnibus operibus tuis pr\u00e6cellens esto.\n24\u00a0Ne dederis maculam in gloria tua.\n In die consummationis dierum vit\u00e6 tu\u00e6, et in tempore exitus tui,\n distribue h\u00e6reditatem tuam.]\n \n25\u00a0[Cibaria, et virga, et onus asino:\n panis, et disciplina, et opus servo.\n26\u00a0Operatur in disciplina, et qu\u00e6rit requiescere:\n laxa manus illi, et qu\u00e6rit libertatem.\n27\u00a0Jugum et lorum curvant collum durum,\n et servum inclinant operationes assidu\u00e6.\n28\u00a0Servo malevolo tortura et compedes:\n mitte illum in operationem, ne vacet:\n29\u00a0multam enim malitiam docuit otiositas.\n30\u00a0In opera constitue eum:\n sic enim condecet illum.\n Quod si non obaudierit, curva illum compedibus,\n et non amplifices super omnem carnem:\n verum sine judicio nihil facias grave.\n31\u00a0Si est tibi servus fidelis, sit tibi quasi anima tua:\n quasi fratrem sic eum tracta,\n quoniam in sanguine anim\u00e6 comparasti illum.\n32\u00a0Si l\u00e6seris eum injuste,\n in fugam convertetur:\n33\u00a0et si extollens discesserit,\n quem qu\u00e6ras et in qua via qu\u00e6ras illum nescis.]","title":"Vulgate: Sirach: Sirach Chapter 33","type":"page"}