{"collection":"Bible & Christianity","html_url":"https://unchartedknowledge.5gfusion.net/browse/bib/vul/sir037.htm","path":"bib/vul/sir037.htm","source_url":"https://sacred-texts.com/bib/vul/sir037.htm","text":"1\u00a0[Omnis amicus dicet: Et ego amicitiam copulavi:\n sed est amicus solo nomine amicus.\n Nonne tristitia inest usque ad mortem?\n2\u00a0sodalis autem et amicus ad inimicitiam convertentur.\n3\u00a0O pr\u00e6sumptio nequissima, unde create es\n cooperire aridam malitia et dolositate illius?\n4\u00a0Sodalis amico conjucundatur in oblectationibus,\n et in tempore tribulationis adversarius erit.\n5\u00a0Sodalis amico condolet causa ventris,\n et contra hostem accipiet scutum.\n6\u00a0Non obliviscaris amici tui in animo tuo,\n et non immemor sis illius in opibus tuis.\n7\u00a0Noli consiliari cum eo qui tibi insidiatur,\n et a zelantibus te absconde consilium.]\n \n8\u00a0[Omnis consiliarius prodit consilium,\n sed est consiliarius in semetipso.\n9\u00a0A consiliario serva animam tuam:\n prius scito qu\u00e6 sit illius necessitas:\n et ipse enim animo suo cogitabit:\n10\u00a0ne forte mittat sudem in terram,\n et dicat tibi:\n11\u00a0Bona est via tua:\n et stet e contrario videre quid tibi eveniat.\n12\u00a0Cum viro irreligioso tracta de sanctitate,\n et cum injusto de justitia,\n et cum muliere de ea qu\u00e6 \u00e6mulatur,\n cum timido de bello,\n cum negotiatore de trajectione,\n cum emptore de venditione,\n cum viro livido de gratiis agendis,\n13\u00a0cum impio de pietate,\n cum inhonesto de honestate,\n cum operario agrario de omni opere,\n14\u00a0cum operario annuali de consummatione anni,\n cum servo pigro de multa operatione.\n Non attendas his in omni consilio:\n15\u00a0sed cum viro sancto assiduus esto,\n quemcumque cognoveris observantem timorem Dei:\n16\u00a0cujus anima est secundum animam tuam,\n et qui, cum titubaveris in tenebris, condolebit tibi.\n17\u00a0Cor boni consilii statue tecum:\n non est enim tibi aliud pluris illo.\n18\u00a0Anima viri sancti enuntiat aliquando vera,\n quam septem circumspectores sedentes in excelso ad speculandum.\n19\u00a0Et in his omnibus deprecare Altissimum,\n ut dirigat in veritate viam tuam.]\n \n20\u00a0[Ante omnia opera verbum verax pr\u00e6cedat te,\n et ante omnem actum consilium stabile.\n21\u00a0Verbum nequam immutabit cor:\n ex quo partes quatuor oriuntur:\n bonum et malum, vita et mors:\n et dominatrix illorum est assidua lingua.\n Est vir astutus multorum eruditor,\n et anim\u00e6 su\u00e6 inutilis est.\n22\u00a0Vir peritus multos erudivit,\n et anim\u00e6 su\u00e6 suavis est.\n23\u00a0Qui sophistice loquitur odibilis est:\n in omni re defraudabitur.\n24\u00a0Non est illi data a Domino gratia,\n omni enim sapientia defraudatus est.\n25\u00a0Est sapiens anim\u00e6 su\u00e6 sapiens,\n et fructus sensus illius laudabilis.\n26\u00a0Vir sapiens plebem suam erudit,\n et fructus sensus illius fideles sunt.\n27\u00a0Vir sapiens implebitur benedictionibus,\n et videntes illum laudabunt.\n28\u00a0Vita viri in numero dierum:\n dies autem Isra\u00ebl innumerabiles sunt.\n29\u00a0Sapiens in populo h\u00e6reditabit honorem,\n et nomen illius erit vivens in \u00e6ternum.]\n \n30\u00a0[Fili, in vita tua tenta animam tuam,\n et si fuerit nequam non des illi potestatem:\n31\u00a0non enim omnia omnibus expediunt,\n et non omni anim\u00e6 omne genus placet.\n32\u00a0Noli avidus esse in omni epulatione,\n et non te effundas super omnem escam:\n33\u00a0in multis enim escis erit infirmitas,\n et aviditas appropinquabit usque ad choleram.\n34\u00a0Propter crapulam multi obierunt:\n qui autem abstinens est adjiciet vitam.]","title":"Vulgate: Sirach: Sirach Chapter 37","type":"page"}