{"collection":"Bible & Christianity","html_url":"https://unchartedknowledge.5gfusion.net/browse/bib/vul/sir038.htm","path":"bib/vul/sir038.htm","source_url":"https://sacred-texts.com/bib/vul/sir038.htm","text":"1\u00a0[Honora medicum propter necessitatem:\n etenim illum creavit Altissimus.\n2\u00a0A Deo est enim omnis medela,\n et a rege accipiet donationem.\n3\u00a0Disciplina medici exaltabit caput illius,\n et in conspectu magnatorum collaudabitur.\n4\u00a0Altissimus creavit de terra medicamenta,\n et vir prudens non abhorrebit illa.\n5\u00a0Nonne a ligno indulcata est aqua amara?\n6\u00a0Ad agnitionem hominum virtus illorum:\n et dedit hominibus scientiam Altissimus,\n honorari in mirabilibus suis.\n7\u00a0In his curans mitigabit dolorem:\n et unguentarius faciet pigmenta suavitatis,\n et unctiones conficiet sanitatis:\n et non consummabuntur opera ejus.\n8\u00a0Pax enim Dei super faciem terr\u00e6.\n9\u00a0Fili, in tua infirmitate ne despicias teipsum:\n sed ora Dominum, et ipse curabit te.\n10\u00a0Averte a delicto, et dirige manus,\n et ab omni delicto munda cor tuum.\n11\u00a0Da suavitatem et memoriam similaginis,\n et impingua oblationem, et da locum medico:\n12\u00a0etenim illum Dominus creavit, et non discedat a te,\n quia opera ejus sunt necessaria.\n13\u00a0Est enim tempus quando in manus illorum incurras:\n14\u00a0ipsi vero Dominum deprecabuntur, ut dirigat requiem eorum,\n et sanitatem, propter conversationem illorum.\n15\u00a0Qui delinquit in conspectu ejus qui fecit eum,\n incidet in manus medici.]\n \n16\u00a0[Fili, in mortuum produc lacrimas,\n et quasi dira passus incipe plorare:\n et secundum judicium contege corpus illius,\n et non despicias sepulturam illius.\n17\u00a0Propter delaturam autem amare fer luctum illius uno die,\n et consolare propter tristitiam:\n18\u00a0et fac luctum secundum meritum ejus\n uno die, vel duobus, propter detractionem:\n19\u00a0a tristitia enim festinat mors, et cooperit virtutem,\n et tristitia cordis flectit cervicem.\n20\u00a0In abductione permanet tristitia,\n et substantia inopis secundum cor ejus.\n21\u00a0Ne dederis in tristitia cor tuum,\n sed repelle eam a te, et memento novissimorum.\n22\u00a0Noli oblivisci, neque enim est conversio:\n et huic nihil proderis, et teipsum pessimabis.\n23\u00a0Memor esto judicii mei: sic enim erit et tuum:\n mihi heri, et tibi hodie.\n24\u00a0In requie mortui requiescere fac memoriam ejus,\n et consolare illum in exitu spiritus sui.]\n \n25\u00a0[Sapientia scrib\u00e6 in tempore vacuitatis,\n et qui minoratur actu sapientiam percipiet,\n qua sapientia replebitur.\n26\u00a0Qui tenet aratrum,\n et qui gloriatur in jaculo, stimulo boves agitat,\n et conversatur in operibus eorum,\n et enarratio ejus in filiis taurorum.\n27\u00a0Cor suum dabit ad versandos sulcos,\n et vigilia ejus in sagina vaccarum.\n28\u00a0Sic omnis faber et architectus,\n qui noctem tamquam diem transigit:\n qui sculpit signacula sculptilia,\n et assiduitas ejus variat picturam:\n cor suum dabit in similitudinem pictur\u00e6,\n et vigilia sua perficiet opus.\n29\u00a0Sic faber ferrarius sedens juxta incudem,\n et considerans opus ferri:\n vapor ignis uret carnes ejus,\n et in calore fornacis concertatur.\n30\u00a0Vox mallei innovat aurem ejus,\n et contra similitudinem vasis oculus ejus.\n31\u00a0Cor suum dabit in consummationem operum,\n et vigilia sua ornabit in perfectionem.\n32\u00a0Sic figulus sedens ad opus suum,\n convertens pedibus suis rotam,\n qui in sollicitudine positus est semper propter opus suum,\n et in numero est omnis operatio ejus.\n33\u00a0In brachio suo formabit lutum,\n et ante pedes suos curvabit virtutem suam.\n34\u00a0Cor suum dabit ut consummet linitionem,\n et vigilia sua mundabit fornacem.\n35\u00a0Omnes hi in manibus suis speraverunt,\n et unusquisque in arte sua sapiens est.\n36\u00a0Sine his omnibus non \u00e6dificatur civitas,\n37\u00a0et non inhabitabunt, nec inambulabunt,\n et in ecclesiam non transilient.\n38\u00a0Super sellam judicis non sedebunt,\n et testamentum judicii non intelligent,\n neque palam facient disciplinam et judicium,\n et in parabolis non invenientur:\n39\u00a0sed creaturam \u00e6vi confirmabunt:\n et deprecatio illorum in operatione artis,\n accomodantes animam suam,\n et conquirentes in lege Altissimi.]","title":"Vulgate: Sirach: Sirach Chapter 38","type":"page"}