{"collection":"Bible & Christianity","html_url":"https://unchartedknowledge.5gfusion.net/browse/bib/vul/sir040.htm","path":"bib/vul/sir040.htm","source_url":"https://sacred-texts.com/bib/vul/sir040.htm","text":"1\u00a0[Occupatio magna creata est omnibus hominibus,\n et jugum grave super filios Adam,\n a die exitus de ventre matris eorum\n usque in diem sepultur\u00e6 in matrem omnium.\n2\u00a0Cogitationes eorum, et timores cordis,\n adinventio exspectationis, et dies finitionis,\n3\u00a0a residente super sedem gloriosam,\n usque ad humiliatum in terra et cinere:\n4\u00a0ab eo qui utitur hyacintho et portat coronam,\n usque ad eum qui operitur lino crudo:\n furor, zelus, tumultus, fluctuatio, et timor mortis,\n iracundia perseverans, et contentio:\n5\u00a0et in tempore refectionis in cubili,\n somnus noctis immutat scientiam ejus.\n6\u00a0Modicum tamquam nihil in requie,\n et ab eo in somnis, quasi in die respectus.\n7\u00a0Conturbatus est in visu cordis sui,\n tamquam qui evaserit in die belli:\n in tempore salutis su\u00e6 exsurrexit,\n et admirans ad nullum timorem:\n8\u00a0cum omni carne, ab homine usque ad pecus,\n et super peccatores septuplum.\n9\u00a0Ad h\u00e6c mors, sanguis, contentio, et rhomph\u00e6a,\n oppressiones, fames, et contritio, et flagella:\n10\u00a0super iniquos creata sunt h\u00e6c omnia:\n et propter illos factus est cataclysmus.]\n \n11\u00a0[Omnia qu\u00e6 de terra sunt in terram convertentur,\n et omnes aqu\u00e6 in mare revertentur.\n12\u00a0Omne munus et iniquitas delebitur,\n et fides in s\u00e6culum stabit.\n13\u00a0Substanti\u00e6 injustorum sicut fluvius siccabuntur,\n et sicut tonitruum magnum in pluvia personabunt.\n14\u00a0In aperiendo manus suas l\u00e6tabitur:\n sic pr\u00e6varicatores in consummatione tabescent.\n15\u00a0Nepotes impiorum non multiplicabunt ramos:\n et radices immund\u00e6 super cacumen petr\u00e6 sonant.\n16\u00a0Super omnem aquam viriditas,\n et ad oram fluminis ante omne f\u0153num evelletur.]\n \n17\u00a0[Gratia sicut paradisus in benedictionibus,\n et misericordia in s\u00e6culum permanet.\n18\u00a0Vita sibi sufficientis operarii condulcabitur,\n et in ea invenies thesaurum.\n19\u00a0Filii et \u00e6dificatio civitatis confirmabit nomen:\n et super h\u00e6c mulier immaculata computabitur.\n20\u00a0Vinum et musica l\u00e6tificant cor:\n et super utraque dilectio sapienti\u00e6.\n21\u00a0Tibi\u00e6 et psalterium suavem faciunt melodiam:\n et super utraque lingua suavis.\n22\u00a0Gratiam et speciem desiderabit oculus tuus:\n et super h\u00e6c virides sationes.\n23\u00a0Amicus et sodalis in tempore convenientes,\n et super utrosque mulier cum viro.\n24\u00a0Fratres in adjutorium in tempore tribulationis:\n et super eos misericordia liberabit.\n25\u00a0Aurum et argentum est constitutio pedum:\n et super utrumque consilium beneplacitum.\n26\u00a0Facultates et virtutes exaltant cor,\n et super h\u00e6c timor Domini.\n27\u00a0Non est in timore Domini minoratio:\n et non est in eo inquirere adjutorium.\n28\u00a0Timor Domini sicut paradisus benedictionis,\n et super omnem gloriam operuerunt illum.]\n \n29\u00a0[Fili, in tempore vit\u00e6 tu\u00e6 ne indigeas:\n melius est enim mori quam indigere.\n30\u00a0Vir respiciens in mensam alienam,\n non est vita ejus in cogitatione victus:\n alit enim animam suam cibis alienis:\n31\u00a0vir autem disciplinatus et eruditus custodiet se.\n32\u00a0In ore imprudentis condulcabitur inopia,\n et in ventre ejus ignis ardebit.]","title":"Vulgate: Sirach: Sirach Chapter 40","type":"page"}