{"collection":"Bible & Christianity","html_url":"https://unchartedknowledge.5gfusion.net/browse/bib/vul/sir041.htm","path":"bib/vul/sir041.htm","source_url":"https://sacred-texts.com/bib/vul/sir041.htm","text":"1\u00a0[O mors, quam amara est memoria tua\n homini pacem habenti in substantiis suis:\n2\u00a0viro quieto, et cujus vi\u00e6 direct\u00e6 sunt in omnibus,\n et adhuc valenti accipere cibum!\n3\u00a0O mors, bonum est judicium tuum homini indigenti,\n et qui minoratur viribus,\n4\u00a0defecto \u00e6tate, et cui de omnibus cura est,\n et incredibili, qui perdit patientiam!\n5\u00a0Noli metuere judicium mortis:\n memento qu\u00e6 ante te fuerunt,\n et qu\u00e6 superventura sunt tibi:\n hoc judicium a Domino omni carni.\n6\u00a0Et quid superveniet tibi in beneplacito Altissimi?\n sive decem, sive centum, sive mille anni:\n7\u00a0non est enim in inferno accusatio vit\u00e6.]\n \n8\u00a0[Filii abominationum fiunt filii peccatorum,\n et qui conversantur secus domos impiorum.\n9\u00a0Filiorum peccatorum periet h\u00e6reditas,\n et cum semine illorum assiduitas opprobrii.\n10\u00a0De patre impio queruntur filii,\n quoniam propter illum sunt in opprobrio.\n11\u00a0V\u00e6 vobis, viri impii,\n qui dereliquistis legem Domini Altissimi!\n12\u00a0Et si nati fueritis, in maledictione nascemini:\n et si mortui fueritis, in maledictione erit pars vestra.\n13\u00a0Omnia qu\u00e6 de terra sunt in terram convertentur:\n sic impii a maledicto in perditionem.\n14\u00a0Luctus hominum in corpore ipsorum:\n nomen autem impiorum delebitur.\n15\u00a0Curam habe de bono nomine:\n hoc enim magis permanebit tibi\n quam mille thesauri pretiosi et magni.\n16\u00a0Bon\u00e6 vit\u00e6 numerus dierum:\n bonum autem nomen permanebit in \u00e6vum.]\n \n17\u00a0[Disciplinam in pace conservate, filii:\n sapientia enim abscondita, et thesaurus invisus,\n qu\u00e6 utilitas in utrisque?\n18\u00a0Melior est homo qui abscondit stultitiam suam,\n quam homo qui abscondit sapientiam suam.\n19\u00a0Verumtamen reveremini in his qu\u00e6 procedunt de ore meo:\n20\u00a0non est enim bonum omnem reverentiam observare,\n et non omnia omnibus bene placent in fide.\n21\u00a0Erubescite a patre et a matre de fornicatione:\n et a pr\u00e6sidente et a potente de mendacio:\n22\u00a0a principe et a judice de delicto:\n a synagoga et plebe de iniquitate:\n23\u00a0a socio et amico de injustitia,\n et de loco in quo habitas:\n24\u00a0de furto, de veritate Dei, et testamento:\n de discubitu in panibus, et ab obfuscatione dati et accepti:\n25\u00a0a salutantibus de silentio,\n a respectu mulieris fornicari\u00e6,\n et ab aversione vultus cognati.\n26\u00a0Ne avertas faciem a proximo tuo,\n et ab auferendo partem et non restituendo.\n27\u00a0Ne respicias mulierem alieni viri,\n et ne scruteris ancillam ejus,\n neque steteris ad lectum ejus.\n28\u00a0Ab amicis de sermonibus improperii:\n et cum dederis, ne improperes.]","title":"Vulgate: Sirach: Sirach Chapter 41","type":"page"}