{"collection":"Bible & Christianity","html_url":"https://unchartedknowledge.5gfusion.net/browse/bib/vul/sir042.htm","path":"bib/vul/sir042.htm","source_url":"https://sacred-texts.com/bib/vul/sir042.htm","text":"1\u00a0[Non duplices sermonem auditus de revelatione sermonis absconditi:\n et eris vere sine confusione,\n et invenies gratiam in conspectu omnium hominum.\n Ne pro his omnibus confundaris,\n et ne accipias personam ut delinquas:\n2\u00a0de lege Altissimi, et testamento,\n et de judicio justificare impium,\n3\u00a0de verbo sociorum et viatorum,\n et de datione h\u00e6reditatis amicorum,\n4\u00a0de \u00e6qualitate stater\u00e6 et ponderum,\n de acquisitione multorum et paucorum,\n5\u00a0de corruptione emptionis et negotiatorum,\n et de multa disciplina filiorum,\n et servo pessimo latus sanguinare.\n6\u00a0Super mulierem nequam bonum est signum.\n7\u00a0Ubi manus mult\u00e6 sunt, claude:\n et quodcumque trades, numera et appende:\n datum vero et acceptum omne describe.\n8\u00a0De disciplina insensati et fatui,\n et de senioribus qui judicantur ab adolescentibus:\n et eris eruditus in omnibus,\n et probabilis in conspectu omnium vivorum.]\n \n9\u00a0[Filia patris abscondita est vigilia,\n et sollicitudo ejus aufert somnum:\n ne forte in adolescentia sua adulta efficiatur,\n et cum viro commorata odibilis fiat:\n10\u00a0nequando polluatur in virginitate sua,\n et in paternis suis gravida inveniatur:\n ne forte cum viro commorata transgrediatur,\n aut certe sterilis efficiatur.\n11\u00a0Super filiam luxuriosam confirma custodiam,\n nequando faciat te in opprobrium venire inimicis,\n a detractione in civitate, et objectione plebis,\n et confundat te in multitudine populi.\n12\u00a0Omni homini noli intendere in specie,\n et in medio mulierum noli commorari:\n13\u00a0de vestimentis enim procedit tinea,\n et a muliere iniquitas viri.\n14\u00a0Melior est enim iniquitas viri quam mulier benefaciens,\n et mulier confundens in opprobrium.]\n \n15\u00a0[Memor ero igitur operum Domini,\n et qu\u00e6 vidi annuntiabo.\n In sermonibus Domini opera ejus.\n16\u00a0Sol illuminans per omnia respexit,\n et gloria Domini plenum est opus ejus.\n17\u00a0Nonne Dominus fecit sanctos enarrare omnia mirabilia sua,\n qu\u00e6 confirmavit Dominus omnipotens stabiliri in gloria sua?\n18\u00a0Abyssum et cor hominum investigavit,\n et in astutia eorum excogitavit.\n19\u00a0Cognovit enim Dominus omnem scientiam,\n et inspexit in signum \u00e6vi,\n annuntians qu\u00e6 pr\u00e6terierunt et qu\u00e6 superventura sunt,\n revelans vestigia occultorum.\n20\u00a0Non pr\u00e6terit illum omnis cogitatus,\n et non abscondit se ab eo ullus sermo.\n21\u00a0Magnalia sapienti\u00e6 su\u00e6 decoravit,\n qui est ante s\u00e6culum et usque in s\u00e6culum:\n neque adjectum est,\n22\u00a0neque minuitur,\n et non eget alicujus consilio.\n23\u00a0Quam desiderabilia omnia opera ejus!\n et tamquam scintilla qu\u00e6 est considerare!\n24\u00a0Omnia h\u00e6c vivunt, et manent in s\u00e6culum,\n et in omni necessitate omnia obaudiunt ei.\n25\u00a0Omnia duplicia, unum contra unum,\n et non fecit quidquam deesse.\n26\u00a0Uniuscujusque confirmavit bona:\n et quis satiabitur videns gloriam ejus?]","title":"Vulgate: Sirach: Sirach Chapter 42","type":"page"}