{"collection":"Bible & Christianity","html_url":"https://unchartedknowledge.5gfusion.net/browse/bib/vul/sir043.htm","path":"bib/vul/sir043.htm","source_url":"https://sacred-texts.com/bib/vul/sir043.htm","text":"1\u00a0[Altitudinis firmamentum pulchritudo ejus est,\n species c\u00e6li in visione glori\u00e6.\n2\u00a0Sol in aspectu annuntians in exitu,\n vas admirabile, opus Excelsi.\n3\u00a0In meridiano exurit terram,\n et in conspectu ardoris ejus quis poterit sustinere?\n fornacem custodiens in operibus ardoris:\n4\u00a0tripliciter sol exurens montes,\n radios igneos exsufflans,\n et refulgens radiis suis obc\u00e6cat oculos.\n5\u00a0Magnus Dominus qui fecit illum,\n et in sermonibus ejus festinavit iter.]\n \n6\u00a0[Et luna in omnibus in tempore suo,\n ostensio temporis, et signum \u00e6vi.\n7\u00a0A luna signum diei festi:\n luminare quod minuitur in consummatione.\n8\u00a0Mensis secundum nomen ejus est,\n crescens mirabiliter in consummatione.\n9\u00a0Vas castrorum in excelsis,\n in firmamento c\u00e6li resplendens gloriose.\n10\u00a0Species c\u00e6li gloria stellarum:\n mundum illuminans in excelsis Dominus.\n11\u00a0In verbis Sancti stabunt ad judicium,\n et non deficient in vigiliis suis.]\n \n12\u00a0[Vide arcum, et benedic eum qui fecit illum:\n valde speciosus est in splendore suo.\n13\u00a0Gyravit c\u00e6lum in circuitu glori\u00e6 su\u00e6:\n manus Excelsi aperuerunt illum.\n14\u00a0Imperio suo acceleravit nivem,\n et accelerat coruscationes emittere judicii sui.\n15\u00a0Propterea aperti sunt thesauri,\n et evolaverunt nebul\u00e6 sicut aves.\n16\u00a0In magnitudine sua posuit nubes,\n et confracti sunt lapides grandinis.\n17\u00a0In conspectu ejus commovebuntur montes,\n et in voluntate ejus aspirabit notus.\n18\u00a0Vox tonitrui ejus verberavit terram,\n tempestas aquilonis, et congregatio spiritus:\n19\u00a0et sicut avis deponens ad sedendum, aspergit nivem,\n et sicut locusta demergens descensus ejus.\n20\u00a0Pulchritudinem candoris ejus admirabitur oculus,\n et super imbrem ejus expavescet cor.\n21\u00a0Gelu sicut salem effundet super terram:\n et dum gelaverit, fiet tamquam cacumina tribuli.\n22\u00a0Frigidus ventus aquilo flavit,\n et gelavit crystallus ab aqua:\n super omnem congregationem aquarum requiescet,\n et sicut lorica induet se aquis:\n23\u00a0et devorabit montes, et exuret desertum,\n et extinguet viride, sicut igne.\n24\u00a0Medicina omnium in festinatione nebul\u00e6:\n et ros obvians ab ardore venienti humilem efficiet eum.\n25\u00a0In sermone ejus siluit ventus,\n et cogitatione sua placavit abyssum:\n et plantavit in illa Dominus insulas.\n26\u00a0Qui navigant mare enarrent pericula ejus,\n et audientes auribus nostris admirabimur.\n27\u00a0Illic pr\u00e6clara opera et mirabilia,\n varia bestiarum genera, et omnium pecorum, et creatura belluarum.\n28\u00a0Propter ipsum confirmatus est itineris finis,\n et in sermone ejus composita sunt omnia.]\n \n29\u00a0[Multa dicemus, et deficiemus in verbis:\n consummatio autem sermonum ipse est in omnibus.\n30\u00a0Gloriantes ad quid valebimus?\n ipse enim omnipotens super omnia opera sua.\n31\u00a0Terribilis Dominus, et magnus vehementer,\n et mirabilis potentia ipsius.\n32\u00a0Glorificantes Dominum quantumcumque potueritis,\n supervalebit enim adhuc: et admirabilis magnificentia ejus.\n33\u00a0Benedicentes Dominum, exaltate illum quantum potestis:\n major enim est omni laude.\n34\u00a0Exaltantes eum, replemini virtute, ne laboretis,\n non enim comprehendetis.\n35\u00a0Quis videbit eum et enarrabit?\n et quis magnificabit eum sicut est ab initio?\n36\u00a0Multa abscondita sunt majora his:\n pauca enim vidimus operum ejus.\n37\u00a0Omnia autem Dominus fecit,\n et pie agentibus dedit sapientiam.]","title":"Vulgate: Sirach: Sirach Chapter 43","type":"page"}