{"collection":"Bible & Christianity","html_url":"https://unchartedknowledge.5gfusion.net/browse/bib/vul/sir044.htm","path":"bib/vul/sir044.htm","source_url":"https://sacred-texts.com/bib/vul/sir044.htm","text":"1\u00a0[Laudemus viros gloriosos,\n et parentes nostros in generatione sua.\n2\u00a0Multam gloriam fecit Dominus:\n magnificentia sua a s\u00e6culo.\n3\u00a0Dominantes in potestatibus suis,\n homines magni virtute et prudentia sua pr\u00e6diti,\n nuntiantes in prophetis dignitatem prophetarum:\n4\u00a0et imperantes in pr\u00e6senti populo,\n et virtute prudenti\u00e6 populis sanctissima verba:\n5\u00a0in peritia sua requirentes modos musicos,\n et narrantes carmina Scripturarum:\n6\u00a0homines divites in virtute,\n pulchritudinis studium habentes,\n pacificantes in domibus suis.\n7\u00a0Omnes isti in generationibus gentis su\u00e6 gloriam adepti sunt,\n et in diebus suis habentur in laudibus.\n8\u00a0Qui de illis nati sunt reliquerunt nomen\n narrandi laudes eorum.\n9\u00a0Et sunt quorum non est memoria:\n perierunt quasi qui non fuerint:\n et nati sunt quasi non nati,\n et filii ipsorum cum ipsis.\n10\u00a0Sed illi viri misericordi\u00e6 sunt,\n quorum pietates non defuerunt.\n11\u00a0Cum semine eorum permanent bona:\n12\u00a0h\u00e6reditas sancta nepotes eorum,\n et in testamentis stetit semen eorum:\n13\u00a0et filii eorum propter illos usque in \u00e6ternum manent:\n semen eorum et gloria eorum non derelinquetur.\n14\u00a0Corpora ipsorum in pace sepulta sunt,\n et nomen eorum vivit in generationem et generationem.\n15\u00a0Sapientiam ipsorum narrent populi,\n et laudem eorum nuntiet ecclesia.]\n \n16\u00a0[Enoch placuit Deo, et translatus est in paradisum,\n ut det gentibus p\u0153nitentiam.\n17\u00a0No\u00eb inventus est perfectus, justus,\n et in tempore iracundi\u00e6 factus est reconciliatio.\n18\u00a0Ideo dimissum est reliquum terr\u00e6,\n cum factum est diluvium.\n19\u00a0Testamenta s\u00e6culi posita sunt apud illum,\n ne deleri possit diluvio omnis caro.]\n \n20\u00a0[Abraham magnus pater multitudinis gentium,\n et non est inventus similis illi in gloria:\n qui conservavit legem Excelsi,\n et fuit in testamento cum illo.\n21\u00a0In carne ejus stare fecit testamentum,\n et in tentatione inventus est fidelis.\n22\u00a0Ideo jurejurando dedit illi gloriam in gente sua,\n crescere illum quasi terr\u00e6 cumulum,\n23\u00a0et ut stellas exaltare semen ejus,\n et h\u00e6reditare illos a mari usque ad mare,\n et a flumine usque ad terminos terr\u00e6.\n24\u00a0Et in Isaac eodem modo fecit,\n propter Abraham patrem ejus.\n25\u00a0Benedictionem omnium gentium dedit illi Dominus,\n et testamentum confirmavit super caput Jacob.\n26\u00a0Agnovit eum in benedictionibus suis,\n et dedit illi h\u00e6reditatem,\n et divisit illi partem in tribubus duodecim.\n27\u00a0Et conservavit illi homines misericordi\u00e6,\n invenientes gratiam in oculis omnis carnis.]","title":"Vulgate: Sirach: Sirach Chapter 44","type":"page"}