{"collection":"Bible & Christianity","html_url":"https://unchartedknowledge.5gfusion.net/browse/bib/vul/sir045.htm","path":"bib/vul/sir045.htm","source_url":"https://sacred-texts.com/bib/vul/sir045.htm","text":"1\u00a0[Dilectus Deo et hominibus Moyses,\n cujus memoria in benedictione est.\n2\u00a0Similem illum fecit in gloria sanctorum,\n et magnificavit eum in timore inimicorum,\n et in verbis suis monstra placavit.\n3\u00a0Glorificavit illum in conspectu regum,\n et jussit illi coram populo suo,\n et ostendit illi gloriam suam.\n4\u00a0In fide et lenitate ipsius sanctum fecit illum,\n et elegit eum ex omni carne.\n5\u00a0Audivit enim eum, et vocem ipsius,\n et induxit illum in nubem.\n6\u00a0Et dedit illi coram pr\u00e6cepta,\n et legem vit\u00e6 et disciplin\u00e6,\n docere Jacob testamentum suum,\n et judicia sua Isra\u00ebl.]\n \n7\u00a0[Excelsum fecit Aaron fratrem ejus,\n et similem sibi, de tribu Levi.\n8\u00a0Statuit ei testamentum \u00e6ternum,\n et dedit illi sacerdotium gentis,\n et beatificavit illum in gloria:\n9\u00a0et circumcinxit eum zona glori\u00e6,\n et induit eum stolam glori\u00e6,\n et coronavit eum in vasis virtutis.\n10\u00a0Circumpedes, et femoralia, et humerale posuit ei:\n et cinxit illum tintinnabulis aureis plurimis in gyro:\n11\u00a0dare sonitum in incessu suo,\n auditum facere sonitum in templo\n in memoriam filiis gentis su\u00e6.\n12\u00a0Stolam sanctam auro, et hyacintho, et purpura,\n opus textile viri sapientis, judicio et veritate pr\u00e6diti:\n13\u00a0torto cocco opus artificis\n gemmis pretiosis figuratis in ligatura auri,\n et opere lapidarii sculptis,\n in memoriam secundum numerum tribuum Isra\u00ebl.\n14\u00a0Corona aurea super mitram ejus\n expressa signo sanctitatis, et gloria honoris:\n opus virtutis, et desideria oculorum ornata.\n15\u00a0Sic pulchra ante ipsum non fuerunt talia\n usque ad originem.\n16\u00a0Non est indutus illa alienigena aliquis,\n sed tantum filii ipsius soli,\n et nepotes ejus per omne tempus.\n17\u00a0Sacrificia ipsius\n consumpta sunt igne quotidie.\n18\u00a0Complevit Moyses manus ejus,\n et unxit illum oleo sancto.\n19\u00a0Factum est illi in testamentum \u00e6ternum,\n et semini ejus, sicut dies c\u00e6li,\n fungi sacerdotio, et habere laudem,\n et glorificare populum suum in nomine ejus.\n20\u00a0Ipsum elegit ab omni vivente,\n offerre sacrificium Deo, incensum, et bonum odorem,\n in memoriam placare pro populo suo:\n21\u00a0et dedit illi in pr\u00e6ceptis suis potestatem,\n in testamentis judiciorum:\n docere Jacob testimonia,\n et in lege sua lucem dare Isra\u00ebl.\n22\u00a0Quia contra illum steterunt alieni,\n et propter invidiam circumdederunt illum homines in deserto,\n qui erant cum Dathan et Abiron,\n et congregatio Core in iracundia.\n23\u00a0Vidit Dominus Deus, et non placuit illi,\n et consumpti sunt in impetu iracundi\u00e6.\n24\u00a0Fecit illis monstra,\n et consumpsit illos in flamma ignis.\n25\u00a0Et addidit Aaron gloriam,\n et dedit illi h\u00e6reditatem,\n et primitias frugum terr\u00e6 divisit illi.\n26\u00a0Panem ipsis in primis paravit in satietatem:\n nam et sacrificia Domini edent,\n qu\u00e6 dedit illi et semini ejus.\n27\u00a0Ceterum in terra gentes non h\u00e6reditabit,\n et pars non est illi in gente:\n ipse est enim pars ejus, et h\u00e6reditas.]\n \n28\u00a0[Phinees, filius Eleazari, tertius in gloria est,\n imitando eum in timore Domini,\n29\u00a0et stare in reverentia gentis:\n in bonitate et alacritate anim\u00e6 su\u00e6 placuit Deo pro Isra\u00ebl.\n30\u00a0Ideo statuit illi testamentum pacis,\n principem sanctorum et gentis su\u00e6,\n ut sit illi et semini ejus sacerdotii dignitas in \u00e6ternum.\n31\u00a0Et testamentum David regi filio Jesse de tribu Juda,\n h\u00e6reditas ipsi et semini ejus:\n ut daret sapientiam in cor nostrum,\n judicare gentem suam in justitia,\n ne abolerentur bona ipsorum:\n et gloriam ipsorum in gentem eorum \u00e6ternam fecit.]","title":"Vulgate: Sirach: Sirach Chapter 45","type":"page"}