{"collection":"Bible & Christianity","html_url":"https://unchartedknowledge.5gfusion.net/browse/bib/vul/sir046.htm","path":"bib/vul/sir046.htm","source_url":"https://sacred-texts.com/bib/vul/sir046.htm","text":"1\u00a0[Fortis in bello Jesus Nave, successor Moysi in prophetis,\n qui fuit magnus secundum nomen suum,\n2\u00a0maximus in salutem electorum Dei,\n expugnare insurgentes hostes,\n ut consequeretur h\u00e6reditatem Isra\u00ebl.\n3\u00a0Quam gloriam adeptus est in tollendo manus suas,\n et jactando contra civitates rhomph\u00e6as!\n4\u00a0Quis ante illum sic restitit?\n nam hostes ipse Dominus perduxit.\n5\u00a0An non in iracundia ejus impeditus est sol,\n et una dies facta est quasi duo?\n6\u00a0Invocavit Altissimum potentem,\n in oppugnando inimicos undique:\n et audivit illum magnus et sanctus Deus,\n in saxis grandinis virtutis valde fortis.\n7\u00a0Impetum fecit contra gentem hostilem,\n et in descensu perdidit contrarios:\n8\u00a0ut cognoscant gentes potentiam ejus,\n quia contra Deum pugnare non est facile.\n Et secutus est a tergo potentis:\n9\u00a0et in diebus Moysi misericordiam fecit,\n ipse, et Caleb filius Jephone,\n stare contra hostem, et prohibere gentem a peccatis,\n et perfringere murmur maliti\u00e6.\n10\u00a0Et ipsi duo constituti a periculo liberati sunt\n a numero sexcentorum millium peditum,\n inducere illos in h\u00e6reditatem,\n in terram qu\u00e6 manat lac et mel.\n11\u00a0Et dedit Dominus ipsi Caleb fortitudinem,\n et usque in senectutem permansit illi virtus,\n ut ascenderet in excelsum terr\u00e6 locum,\n et semen ipsius obtinuit h\u00e6reditatem,\n12\u00a0ut viderent omnes filii Isra\u00ebl\n quia bonum est obsequi sancto Deo.]\n \n13\u00a0[Et judices singuli suo nomine, quorum non est corruptum cor,\n qui non aversi sunt a Domino,\n14\u00a0ut sit memoria illorum in benedictione,\n et ossa eorum pullulent de loco suo:\n15\u00a0et nomen eorum permaneat in \u00e6ternum,\n permanens ad filios illorum, sanctorum virorum gloria.]\n \n16\u00a0[Dilectus a Domino Deo suo Samuel, propheta Domini,\n renovavit imperium,\n et unxit principes in gente sua.\n17\u00a0In lege Domini congregationem judicavit,\n et vidit Deus Jacob:\n et in fide sua probatus est propheta,\n18\u00a0et cognitus est in verbis suis fidelis,\n quia vidit Deum lucis.\n19\u00a0Et invocavit Dominum omnipotentem,\n in oppugnando hostes circumstantes undique,\n in oblatione agni inviolati.\n20\u00a0Et intonuit de c\u00e6lo Dominus,\n et in sonitu magno auditam fecit vocem suam:\n21\u00a0et contrivit principes Tyriorum,\n et omnes duces Philisthiim:\n22\u00a0et ante tempus finis vit\u00e6 su\u00e6 et s\u00e6culi,\n testimonium pr\u00e6buit in conspectu Domini et christi:\n pecunias et usque ad calceamenta ab omni carne non accepit,\n et non accusavit illum homo.\n23\u00a0Et post hoc dormivit: et notum fecit regi,\n et ostendit illi finem vit\u00e6 su\u00e6:\n et exaltavit vocem suam de terra in prophetia,\n delere impietatem gentis.]","title":"Vulgate: Sirach: Sirach Chapter 46","type":"page"}