{"collection":"Bible & Christianity","html_url":"https://unchartedknowledge.5gfusion.net/browse/bib/vul/sir047.htm","path":"bib/vul/sir047.htm","source_url":"https://sacred-texts.com/bib/vul/sir047.htm","text":"1\u00a0[Post h\u00e6c surrexit Nathan,\n propheta in diebus David.\n2\u00a0Et quasi adeps separatus a carne,\n sic David a filiis Isra\u00ebl.\n3\u00a0Cum leonibus lusit quasi cum agnis,\n et in ursis similiter fecit sicut in agnis ovium, in juventute sua.\n4\u00a0Numquid non occidit gigantem,\n et abstulit opprobrium de gente?\n5\u00a0In tollendo manum,\n saxo fund\u00e6 dejecit exsultationem Goli\u00e6:\n6\u00a0nam invocavit Dominum omnipotentem,\n et dedit in dextera ejus tollere hominem fortem in bello,\n et exaltare cornu gentis su\u00e6.\n7\u00a0Sic in decem millibus glorificavit eum:\n et laudavit eum in benedictionibus Domini,\n in offerendo illi coronam glori\u00e6:\n8\u00a0contrivit enim inimicos undique,\n et extirpavit Philisthiim contrarios usque in hodiernum diem:\n contrivit cornu ipsorum usque in \u00e6ternum.\n9\u00a0In omni opere dedit confessionem Sancto,\n et Excelso in verbo glori\u00e6.\n10\u00a0De omni corde suo laudavit Dominum:\n et dilexit Deum, qui fecit illum,\n et dedit illi contra inimicos potentiam:\n11\u00a0et stare fecit cantores contra altare,\n et in sono eorum dulces fecit modos.\n12\u00a0Et dedit in celebrationibus decus,\n et ornavit tempora usque ad consummationem vit\u00e6,\n ut laudarent nomen sanctum Domini,\n et amplificarent mane Dei sanctitatem.\n13\u00a0Dominus purgavit peccata ipsius,\n et exaltavit in \u00e6ternum cornu ejus:\n et dedit illi testamentum regni,\n et sedem glori\u00e6 in Isra\u00ebl.]\n \n14\u00a0[Post ipsum surrexit filius sensatus,\n et propter illum dejecit omnem potentiam inimicorum.\n15\u00a0Salomon imperavit in diebus pacis,\n cui subjecit Deus omnes hostes,\n ut conderet domum in nomine suo,\n et pararet sanctitatem in sempiternum.\n Quemadmodum eruditus es in juventute tua,\n16\u00a0et impletus es, quasi flumen, sapientia,\n et terram retexit anima tua.\n17\u00a0Et replesti in comparationibus \u00e6nigmata:\n ad insulas longe divulgatum est nomen tuum,\n et dilectus es in pace tua.\n18\u00a0In cantilenis, et proverbiis,\n et comparationibus, et interpretationibus, mirat\u00e6 sunt terr\u00e6:\n19\u00a0et in nomine Domini Dei,\n cui est cognomen Deus Isra\u00ebl.\n20\u00a0Collegisti quasi auricalcum aurum,\n et ut plumbum complesti argentum:\n21\u00a0et inclinasti femora tua mulieribus:\n potestatem habuisti in corpore tuo.\n22\u00a0Dedisti maculam in gloria tua,\n et profanasti semen tuum,\n inducere iracundiam ad liberos tuos,\n et incitari stultitiam tuam:\n23\u00a0ut faceres imperium bipartitum,\n et ex Ephraim imperare imperium durum.\n24\u00a0Deus autem non derelinquet misericordiam suam:\n et non corrumpet, nec delebit opera sua,\n neque perdet a stirpe nepotes electi sui,\n et semen ejus qui diligit Dominum non corrumpet.\n25\u00a0Dedit autem reliquum Jacob,\n et David de ipsa stirpe.\n26\u00a0Et finem habuit Salomon cum patribus suis.]\n \n27\u00a0[Et dereliquit post se de semine suo, gentis stultitiam,\n28\u00a0et imminutum a prudentia, Roboam,\n qui avertit gentem consilio suo:\n29\u00a0et Jeroboam filium Nabat, qui peccare fecit Isra\u00ebl,\n et dedit viam peccandi Ephraim:\n et plurima redundaverunt peccata ipsorum.\n30\u00a0Valde averterunt illos a terra sua.\n31\u00a0Et qu\u00e6sivit omnes nequitias,\n usque dum perveniret ad illos defensio,\n et ab omnibus peccatis liberavit eos.]","title":"Vulgate: Sirach: Sirach Chapter 47","type":"page"}