{"collection":"Bible & Christianity","html_url":"https://unchartedknowledge.5gfusion.net/browse/bib/vul/sir048.htm","path":"bib/vul/sir048.htm","source_url":"https://sacred-texts.com/bib/vul/sir048.htm","text":"1\u00a0[Et surrexit Elias propheta quasi ignis,\n et verbum ipsius quasi facula ardebat.\n2\u00a0Qui induxit in illos famem:\n et irritantes illum invidia sua pauci facti sunt:\n non enim poterant sustinere pr\u00e6cepta Domini.\n3\u00a0Verbo Domini continuit c\u00e6lum,\n et dejecit de c\u00e6lo ignem ter.\n4\u00a0Sic amplificatus est Elias in mirabilibus suis.\n Et quis potest similiter sic gloriari tibi?\n5\u00a0qui sustulisti mortuum ab inferis de sorte mortis,\n in verbo Domini Dei:\n6\u00a0qui dejecisti reges ad pernicem,\n et confregisti facile potentiam ipsorum,\n et gloriosos de lecto suo:\n7\u00a0qui audis in Sina judicium,\n et in Horeb judicia defensionis:\n8\u00a0qui ungis reges ad p\u0153nitentiam,\n et prophetas facis successores post te:\n9\u00a0qui receptus es in turbine ignis,\n in curru equorum igneorum:\n10\u00a0qui scriptus es in judiciis temporum,\n lenire iracundiam Domini,\n conciliare cor patris ad filium,\n et restituere tribus Jacob.\n11\u00a0Beati sunt qui te viderunt,\n et in amicitia tua decorati sunt.\n12\u00a0Nam nos vita vivimus tantum:\n post mortem autem non erit tale nomen nostrum.]\n \n13\u00a0[Elias quidem in turbine tectus est,\n et in Eliseo completus est spiritus ejus:\n in diebus suis non pertimuit principem,\n et potentia nemo vicit illum:\n14\u00a0nec superavit illum verbum aliquod,\n et mortuum prophetavit corpus ejus.\n15\u00a0In vita sua fecit monstra,\n et in morte mirabilia operatus est.]\n \n16\u00a0[In omnibus istis non p\u0153nituit populus,\n et non recesserunt a peccatis suis,\n usque dum ejecti sunt de terra sua,\n et dispersi sunt in omnem terram:\n17\u00a0et relicta est gens perpauca,\n et princeps in domo David.\n18\u00a0Quidam ipsorum fecerunt quod placeret Deo:\n alii autem multa commiserunt peccata.\n19\u00a0Ezechias munivit civitatem suam,\n et induxit in medium ipsius aquam:\n et fodit ferro rupem,\n et \u00e6dificavit ad aquam puteum.\n20\u00a0In diebus ipsius ascendit Sennacherib,\n et misit Rabsacen, et sustulit manum suam contra illos:\n et extulit manum suam in Sion,\n et superbus factus est potentia sua.\n21\u00a0Tunc mota sunt corda et manus ipsorum:\n et doluerunt quasi parturientes mulieres.\n22\u00a0Et invocaverunt Dominum misericordem,\n et expandentes manus suas extulerunt ad c\u00e6lum:\n et Sanctus, Dominus Deus, audivit cito vocem ipsorum.\n23\u00a0Non est commemoratus peccatorum illorum,\n neque dedit illos inimicis suis:\n sed purgavit eos in manu Isai\u00e6 sancti prophet\u00e6.\n24\u00a0Dejecit castra Assyriorum,\n et contrivit illos angelus Domini:\n25\u00a0nam fecit Ezechias quod placuit Deo,\n et fortiter ivit in via David patris sui,\n quam mandavit illi Isaias, propheta magnus,\n et fidelis in conspectu Dei.\n26\u00a0In diebus ipsius retro rediit sol,\n et addidit regi vitam.\n27\u00a0Spiritu magno vidit ultima,\n et consolatus est lugentes in Sion\n usque in sempiternum.\n28\u00a0Ostendit futura,\n et abscondita antequam evenirent.]","title":"Vulgate: Sirach: Sirach Chapter 48","type":"page"}