{"collection":"Bible & Christianity","html_url":"https://unchartedknowledge.5gfusion.net/browse/bib/vul/sir049.htm","path":"bib/vul/sir049.htm","source_url":"https://sacred-texts.com/bib/vul/sir049.htm","text":"1\u00a0[Memoria Josi\u00e6 in compositionem odoris facta\n opus pigmentarii.\n2\u00a0In omni ore quasi mel indulcabitur ejus memoria,\n et ut musica in convivio vini.\n3\u00a0Ipse est directus divinitus in p\u0153nitentiam gentis,\n et tulit abominationes impietatis.\n4\u00a0Et gubernavit ad Dominum cor ipsius,\n et in diebus peccatorum corroboravit pietatem.]\n \n5\u00a0[Pr\u00e6ter David et Ezechiam et Josiam,\n omnes peccatum commiserunt:\n6\u00a0nam reliquerunt legem Altissimi reges Juda,\n et contempserunt timorem Dei.\n7\u00a0Dederunt enim regnum suum aliis,\n et gloriam suam alienigen\u00e6 genti.\n8\u00a0Incenderunt electam sanctitatis civitatem,\n et desertas fecerunt vias ipsius in manu Jeremi\u00e6.\n9\u00a0Nam male tractaverunt illum\n qui a ventre matris consecratus est propheta,\n evertere, et eruere, et perdere,\n et iterum \u00e6dificare, et renovare:\n10\u00a0Ezechiel, qui vidit conspectum glori\u00e6\n quam ostendit illi in curru cherubim.\n11\u00a0Nam commemoratus est inimicorum in imbre,\n benefacere illis qui ostenderunt rectas vias.\n12\u00a0Et duodecim prophetarum ossa pullulent de loco suo:\n nam corroboraverunt Jacob,\n et redemerunt se in fide virtutis.]\n \n13\u00a0[Quomodo amplificemus Zorobabel?\n nam et ipse quasi signum in dextera manu:\n14\u00a0sic et Jesum filium Josedec,\n qui in diebus suis \u00e6dificaverunt domum,\n et exaltaverunt templum sanctum Domino,\n paratum in gloriam sempiternam.\n15\u00a0Et Nehemias in memoriam multi temporis,\n qui erexit nobis muros eversos,\n et stare fecit portas et seras,\n qui erexit domos nostras.]\n \n16\u00a0[Nemo natus est in terra qualis Henoch,\n nam et ipse receptus est a terra:\n17\u00a0neque ut Joseph, qui natus est homo princeps fratrum,\n firmamentum gentis, rector fratrum, stabilimentum populi:\n18\u00a0et ossa ipsius visitata sunt,\n et post mortem prophetaverunt.\n19\u00a0Seth et Sem apud homines gloriam adepti sunt,\n et super omnem animam in origine Adam.]","title":"Vulgate: Sirach: Sirach Chapter 49","type":"page"}