{"collection":"Bible & Christianity","html_url":"https://unchartedknowledge.5gfusion.net/browse/bib/vul/sir050.htm","path":"bib/vul/sir050.htm","source_url":"https://sacred-texts.com/bib/vul/sir050.htm","text":"1\u00a0[Simon, Oni\u00e6 filius, sacerdos magnus,\n qui in vita sua suffulsit domum,\n et in diebus suis corroboravit templum.\n2\u00a0Templi etiam altitudo ab ipso fundata est,\n duplex \u00e6dificatio, et excelsi parietes templi.\n3\u00a0In diebus ipsius emanaverunt putei aquarum,\n et quasi mare adimpleti sunt supra modum.\n4\u00a0Qui curavit gentem suam,\n et liberavit eam a perditione:\n5\u00a0qui pr\u00e6valuit amplificare civitatem,\n qui adeptus est gloriam in conversatione gentis,\n et ingressum domus et atrii amplificavit.\n6\u00a0Quasi stella matutina in medio nebul\u00e6,\n et quasi luna plena, in diebus suis lucet:\n7\u00a0et quasi sol refulgens,\n sic ille effulsit in templo Dei.\n8\u00a0Quasi arcus refulgens inter nebulas glori\u00e6,\n et quasi flos rosarum in diebus vernis,\n et quasi lilia qu\u00e6 sunt in transitu aqu\u00e6,\n et quasi thus redolens in diebus \u00e6statis:\n9\u00a0quasi ignis effulgens,\n et thus ardens in igne:\n10\u00a0quasi vas auri solidum,\n ornatum omni lapide pretioso:\n11\u00a0quasi oliva pullulans, et cypressus in altitudinem se extollens,\n in accipiendo ipsum stolam glori\u00e6,\n et vestiri eum in consummationem virtutis.\n12\u00a0In ascensu altaris sancti\n gloriam dedit sanctitatis amictum.\n13\u00a0In accipiendo autem partes de manu sacerdotum,\n et ipse stans juxta aram:\n et circa illum corona fratrum:\n quasi plantatio cedri in monte Libano,\n14\u00a0sic circa illum steterunt quasi rami palm\u00e6:\n et omnes filii Aaron in gloria sua.\n15\u00a0Oblatio autem Domini in manibus ipsorum\n coram omni synagoga Isra\u00ebl:\n et consummatione fungens in ara,\n amplificare oblationem excelsi Regis,\n16\u00a0porrexit manum suam in libatione,\n et libavit de sanguine uv\u00e6.\n17\u00a0Effudit in fundamento altaris\n odorem divinum excelso Principi.\n18\u00a0Tunc exclamaverunt filii Aaron,\n in tubis productilibus sonuerunt:\n et auditam fecerunt vocem magnam in memoriam coram Deo.\n19\u00a0Tunc omnis populus simul properaverunt,\n et ceciderunt in faciem super terram,\n adorare Dominum Deum suum,\n et dare preces omnipotenti Deo excelso.\n20\u00a0Et amplificaverunt psallentes in vocibus suis,\n et in magna domo auctus est sonus suavitatis plenus.\n21\u00a0Et rogavit populus Dominum excelsum in prece,\n usque dum perfectus est honor Domini,\n et munus suum perfecerunt.\n22\u00a0Tunc descendens, manus suas extulit\n in omne congregationem filiorum Isra\u00ebl,\n dare gloriam Deo a labiis suis,\n et in nomine ipsius gloriari:\n23\u00a0et iteravit orationem suam,\n volens ostendere virtutem Dei.\n24\u00a0Et nunc orate Deum omnium, qui magna fecit in omni terra,\n qui auxit dies nostros a ventre matris nostr\u00e6,\n et fecit nobiscum secundum suam misericordiam:\n25\u00a0det nobis jucunditatem cordis,\n et fieri pacem in diebus nostris in Isra\u00ebl per dies sempiternos:\n26\u00a0credere Isra\u00ebl nobiscum esse Dei misericordiam,\n ut liberet nos in diebus suis.]\n \n27\u00a0[Duas gentes odit anima mea:\n tertia autem non est gens quam oderim:\n28\u00a0qui sedent in monte Seir, et Philisthiim,\n et stultus populus qui habitat in Sichimis.]\n \n29\u00a0[Doctrinam sapienti\u00e6 et disciplin\u00e6 scripsit in codice isto\n Jesus, filius Sirach, Jerosolymita,\n qui renovavit sapientiam de corde suo.\n30\u00a0Beatus qui in istis versatur bonis:\n qui ponit illa in corde suo, sapiens erit semper.\n31 Si enim h\u00e6c fecerit, ad omnia valebit, quia lux Dei vestigium ejus est.]","title":"Vulgate: Sirach: Sirach Chapter 50","type":"page"}