{"collection":"Bible & Christianity","html_url":"https://unchartedknowledge.5gfusion.net/browse/bib/vul/sir051.htm","path":"bib/vul/sir051.htm","source_url":"https://sacred-texts.com/bib/vul/sir051.htm","text":"1\u00a0Oratio Jesu filii Sirach. [Confitebor tibi, Domine rex,\n et collaudabo te Deum salvatorem meum.\n2\u00a0Confitebor nomini tuo,\n quoniam adjutor et protector factus es mihi,\n3\u00a0et liberasti corpus meum a perditione:\n a laqueo lingu\u00e6 iniqu\u00e6, et a labiis operantium mendacium:\n et in conspectu astantium factus es mihi adjutor.\n4\u00a0Et liberasti me, secundum multitudinem misericordi\u00e6 nominis tui,\n a rugientibus pr\u00e6paratis ad escam:\n5\u00a0de manibus qu\u00e6rentium animam meam,\n et de portis tribulationum qu\u00e6 circumdederunt me;\n6\u00a0a pressura flamm\u00e6 qu\u00e6 circumdedit me,\n et in medio ignis non sum \u00e6stuatus;\n7\u00a0de altitudine ventris inferi,\n et a lingua coinquinata, et a verbo mendacii,\n a rege iniquo, et a lingua injusta.\n8\u00a0Laudabit usque ad mortem anima mea Dominum,\n9\u00a0et vita mea appropinquans erat in inferno deorsum.\n10\u00a0Circumdederunt me undique, et non erat qui adjuvaret:\n respiciens eram ad adjutorium hominum, et non erat.\n11\u00a0Memoratus sum misericordi\u00e6 tu\u00e6 Domine,\n et operationis tu\u00e6, qu\u00e6 a s\u00e6culo sunt:\n12\u00a0quoniam eruis sustinentes te, Domine,\n et liberas eos de manibus gentium.\n13\u00a0Exaltasti super terram habitationem meam,\n et pro morte defluente deprecatus sum.\n14\u00a0Invocavi Dominum patrem Domini mei,\n ut non derelinquat me in die tribulationis me\u00e6,\n et in tempore superborum, sine adjutorio.\n15\u00a0Laudabo nomen tuum assidue,\n et collaudabo illud in confessione:\n et exaudita est oratio mea,\n16\u00a0et liberasti me de perditione,\n et eripuisti me de tempore iniquo.\n17\u00a0Propterea confitebor, et laudem dicam tibi,\n et benedicam nomini Domini.]\n \n18\u00a0[Cum adhuc junior essem, priusquam oberrarem,\n qu\u00e6sivi sapientiam palam in oratione mea.\n19\u00a0Ante templum postulabam pro illis,\n et usque in novissimis inquiram eam:\n et effloruit tamquam pr\u00e6cox uva.\n20\u00a0L\u00e6tatum est cor meum in ea:\n ambulavit pes meus iter rectum:\n a juventute mea investigabam eam.\n21\u00a0Inclinavi modico aurem meam,\n et excepi illam.\n22\u00a0Multam inveni in meipso sapientiam,\n et multum profeci in ea.\n23\u00a0Danti mihi sapientiam dabo gloriam:\n24\u00a0consiliatus sum enim ut facerem illam.\n Zelatus sum bonum, et non confundar.\n25\u00a0Colluctata est anima mea in illa,\n et in faciendo eam confirmatus sum.\n26\u00a0Manus meas extendi in altum,\n et insipientiam ejus luxi;\n27\u00a0animam meam direxi ad illam,\n et in agnitione inveni eam.\n28\u00a0Possedi cum ipsa cor ab initio:\n propter hoc, non derelinquar.\n29\u00a0Venter meus conturbatus est qu\u00e6rendo illam:\n propterea bonam possidebo possessionem.\n30\u00a0Dedit mihi Dominus linguam mercedem meam,\n et in ipsa laudabo eum.\n31\u00a0Appropiate ad me, indocti,\n et congregate vos in domum disciplin\u00e6.\n32\u00a0Quid adhuc retardatis? et quid dicitis in his?\n anim\u00e6 vestr\u00e6 sitiunt vehementer.\n33\u00a0Aperui os meum, et locutus sum:\n Comparate vobis sine argento,\n34\u00a0et collum vestrum subjicite jugo:\n et suscipiat anima vestra disciplinam:\n in proximo est enim invenire eam.\n35\u00a0Videte oculis vestris, quia modicum laboravi,\n et inveni mihi multam requiem.\n36\u00a0Assumite disciplinam in multo numero argenti,\n et copiosum aurum possidete in ea.\n37\u00a0L\u00e6tetur anima vestra in misericordia ejus,\n et non confundemini in laude ipsius.\n38\u00a0Operamini opus vestrum ante tempus,\n et dabit vobis mercedem vestram in tempore suo.]","title":"Vulgate: Sirach: Sirach Chapter 51","type":"page"}