{"collection":"Bible & Christianity","html_url":"https://unchartedknowledge.5gfusion.net/browse/bib/vul/sol004.htm","path":"bib/vul/sol004.htm","source_url":"https://sacred-texts.com/bib/vul/sol004.htm","text":"1\u00a0[\n Oculi tui columbarum,\n absque eo quod intrinsecus latet.\n Capilli tui sicut greges caprarum\n qu\u00e6 ascenderunt de monte Galaad.\n2\u00a0Dentes tui sicut greges tonsarum\n qu\u00e6 ascenderunt de lavacro;\n omnes gemellis f\u0153tibus,\n et sterilis non est inter eas.\n3\u00a0Sicut vitta coccinea labia tua,\n et eloquium tuum dulce.\n Sicut fragmen mali punici, ita gen\u00e6 tu\u00e6,\n absque eo quod intrinsecus latet.\n4\u00a0Sicut turris David collum tuum,\n qu\u00e6 \u00e6dificata est cum propugnaculis;\n mille clypei pendant ex ea,\n omnis armatura fortium.\n5\u00a0Duo ubera tua sicut duo hinnuli,\n capre\u00e6 gemelli, qui pascuntur in liliis.\n6\u00a0Donec aspiret dies, et inclinentur umbr\u00e6,\n vadam ad montem myrrh\u00e6, et ad collem thuris.\n7\u00a0Tota pulchra es, amica mea,\n et macula non est in te.\n8\u00a0Veni de Libano, sponsa mea:\n veni de Libano, veni, coronaberis:\n de capite Amana, de vertice Sanir et Hermon,\n de cubilibus leonum, de montibus pardorum.\n9\u00a0Vulnerasti cor meum, soror mea, sponsa;\n vulnerasti cor meum in uno oculorum tuorum,\n et in uno crine colli tui.\n10\u00a0Quam pulchr\u00e6 sunt mamm\u00e6 tu\u00e6, soror mea sponsa!\n pulchriora sunt ubera tua vino,\n et odor unguentorum tuorum super omnia aromata.\n11\u00a0Favus distillans labia tua, sponsa;\n mel et lac sub lingua tua:\n et odor vestimentorum tuorum sicut odor thuris.\n12\u00a0Hortus conclusus soror mea, sponsa,\n hortus conclusus, fons signatus.\n13\u00a0Emissiones tu\u00e6 paradisus malorum punicorum,\n cum pomorum fructibus, cypri cum nardo.\n14\u00a0Nardus et crocus, fistula et cinnamomum,\n cum universis lignis Libani;\n myrrha et alo\u00eb, cum omnibus primis unguentis.\n15\u00a0Fons hortorum, puteus aquarum viventium,\n qu\u00e6 fluunt impetu de Libano.\n16\u00a0\n perfla hortum meum, et fluant aromata illius.]","title":"Vulgate: Song of Solomon: Song of Solomon Chapter 4","type":"page"}