{"collection":"Bible & Christianity","html_url":"https://unchartedknowledge.5gfusion.net/browse/bib/vul/th1001.htm","path":"bib/vul/th1001.htm","source_url":"https://sacred-texts.com/bib/vul/th1001.htm","text":"1 Paulus, et Silvanus, et Timotheus ecclesi\u00e6 Thessalonicensium in Deo Patre, et Domino Jesu Christo.\n2\u00a0Gratia vobis, et pax.\n Gratias agimus Deo semper pro omnibus vobis, memoriam vestri facientes in orationibus nostris sine intermissione,\n3 memores operis fidei vestr\u00e6, et laboris, et caritatis, et sustinenti\u00e6 spei Domini nostri Jesu Christi, ante Deum et Patrem nostrum:\n4 scientes, fratres dilecti a Deo, electionem vestram:\n5 quia Evangelium nostrum non fuit ad vos in sermone tantum, sed et in virtute, et in Spiritu Sancto, et in plenitudine multa, sicut scitis quales fuerimus in vobis propter vos.\n6 Et vos imitatores nostri facti estis, et Domini, excipientes verbum in tribulatione multa, cum gaudio Spiritus Sancti:\n7 ita ut facti sitis forma omnibus credentibus in Macedonia, et in Achaia.\n8 A vobis enim diffamatus est sermo Domini, non solum in Macedonia, et in Achaia, sed et in omni loco fides vestra, qu\u00e6 est ad Deum, profecta est ita ut non sit nobis necesse quidquam loqui.\n9 Ipsi enim de nobis annuntiant qualem introitum habuerimus ad vos: et quomodo conversi estis ad Deum a simulacris, servire Deo vivo, et vero,\n10 et exspectare Filium ejus de c\u00e6lis (quem suscitavit a mortuis) Jesum, qui eripuit nos ab ira ventura.","title":"Vulgate: 1 Thessalonians: 1 Thessalonians Chapter 1","type":"page"}